2000FUN論壇

標題: 顛沛流離的生活 (完成) [打印本頁]

作者: 皚霙．云云 時間: 03-11-20 05:09 PM 標題: 顛沛流離的生活 (完成)

關於我的童年生活, 我諗如果有睇過文學版我寫的某篇故事,
應該都知道大概了... 但應該都好多人未睇過, 同埋都好長篇,
所以... 起度簡單咁講下 la, 希望睇完的人, 都明白到 : 幸福唔係必然的~

未出世篇 :

話說, 我老豆阿媽一齊果陣, 我公公係一 d 都唔鐘意我老豆的,
因為我老豆份人太過要面, 但自己又唔係真係好叻喎, 同埋成日唔多出聲,
好似好 cool 咁, 又唔識同人溝通, 所以公公一 d 都唔鐘意佢~

直到談婚論嫁, 我公公就極力反對, 跟住我媽就離家出走以示反抗,
因我媽第一個鐘意的人就係我老豆, 後尾公公搵番佢, 答應佢 la~

跟住都有擺過酒, 好好睇睇咁嫁出架, 都成十幾廿圍酒架,
但 d 擺酒 $$ 全部都係我公公比, 因我老豆 d 親人起大陸的~

果時結完婚冇耐我就出世, 但我媽就極度唔鐘意我, 討厭我,
本來廿幾年黎都唔知點解佢唔鐘意我架, 以上我媽同我老豆的認識,
擺酒呢 d 野, 都係上兩個星期左右, 經由我三舅父同我講番我先知...

果晚三舅父同我講左好多以前我媽同我老豆 d 野比我知,
亦因為咁, 我先知道番自己比阿媽討厭的原因, 及算係我的身世之謎...

講番我的經歷, 果陣我出世, 我媽跟本唔鐘意湊我, 所以每隔一段時間,
我老豆就帶我番大陸比佢阿媽湊我, 直到要開始番學先冇再番去~

但就起我應該係三歲左右卦, 因我剩係記得果陣我岩岩番幼稚園低班,
我唔記得我係因為乜野事比佢整到我入左廠, 但果時我記得佢點虐待我,
係成日都唔比野我食, 同埋搵張棉被焗住我, 唔準我伸個頭出來透氣...

可能就係咁終於有次暈左所以入左廠卦... 呢次事件後, 鬧到上左法庭,
果時係兒童法庭, 仲記得個法官問我想同阿媽住定係婆婆住,
咁我當然揀婆婆 la, 雖然果陣我對婆婆係冇乜印象, 但總好過對住阿媽~

點解我媽咁憎我呢? 而家知 la, 講埋大家知, 就係因為佢一直唔當我係佢個女,
亦因為原來罪魁禍首係我老豆, 因我媽離家出走過, 佢成日話呢胎唔係佢的~

加上我媽細個發過次燒, 個腦係有少少問題(又未至於係傻婆果隻)
我老豆又講埋 d 咁既野, 所以咪覺得係我害到我老豆唔信佢咁囉...

幼稚園篇 :

幼稚園中班就同婆婆住 la, 婆婆住鄉村的, so 我細細個就識耕田果 d 野,
雖然未有氣力幫婆婆耕田, 但除草呀, 施肥呀, 收割呢 d, 都慢慢學識~

仲有其他家頭細務, 都學會自己做, 因果陣我公公都仲有番工,
屋企得我同婆婆兩個, 仲有個四舅父起度, 但都係成日番工,
so 可以話同婆婆相依為命都差唔多, 好多野都要自己學, 自己做~

小學篇 :

到小學一年班, 我都唔記得左點解, 明明監護人轉左係我婆婆,
但小一又要我番番大埔同屋企人住(我父母住大埔, 婆婆住粉嶺)

呢一年痛苦囉... 日日都比阿媽打到隻野咁, 又係午餐唔比我食,
成日要我罰企及 "抆" 耳仔, 功課都唔比我做, 番到學校同老師講,
又有邊個老師會信一個阿媽會唔比個女做功課架...... -_-

咁就要罰留堂做 la, 但如果我遲番屋企, 我媽又會以為我自己走去玩,
又會打我一餐飽既當午餐, 因我果陣番上午校的, 所以起小一果時,
我就被訓練到有超高速的做功課能力, 大約十五分鐘內, 會做晒 d 功課走人~

但 d 功課正常跟本唔可能咁快做晒, 但因為我呢 d 特殊情況,
不論寫字, 腦部運算, 乜都逼住要開 turbo 進行, 所以小一我就開始受到訓練~

然後有一次, d 功課真係多到乜咁, 足足用左半個鐘先做得晒,
點解我會咁記得, 因為要趕住番屋企, 要分秒必爭, 所以係成日望住 d 時間~

果次番到去, 平時逼人逼 lift, 呢 d 行貨大話冇得講架 la,
你地會話點解唔直接同佢講話罰留堂做功課哩, 因為我一早試過,
但佢總會話因為我百厭先會罰留堂, 所以更抵打, 乜都佢講晒架~

呢次遲咁耐, 比佢打到死囉, 打左餐飽就逼我罰企走廊, 果陣係住公屋的,
果時應該係二, 三月左右, 上學期尾定下學期岩岩開始咁架......

仲係好凍, 咁岩又要落雨, d 雨撇入黎好凍, 又好肚餓, 呢一刻,
我呢生人第一次諗自殺, 我想搭 lift 走左廿五樓跳樓, 死左去好過...

當我靜靜地走到 lift 口, 就有一個念頭出左黎(就係呢個白痴念頭救左我)

果陣我諗, 萬一跳落黎唔死得, 入左廠比阿媽知道左, 又捉番我番屋企打,
話我好麻煩到佢, 咁我咪仲慘? 所以冇走去跳樓... (係咪真係好白痴哩... -_- )

但係, 我又真係好想擺脫阿媽, 又好凍好肚餓, 於是走左番學校,
果陣有個主任仲未走, 佢都算係有 d 知我 d 野架, 對我好好,
同埋有個書記, 帶我落小食部買野比我食, 真係好好...

但不久佢地話要送我番屋企, 我死都唔滯, 最後我竟然記起婆婆屋企電話,
於是打電話比婆婆, 咁岩果日公公起屋企, 最後由我公公接左我走......

但因為我跑左番學校, 我媽虐待我 d 野又爆左出黎, 因果時上兒童法庭,
已經算係備過案, 今次虐待事件又再次發生, 於是出左個人生保護令比我...

由小一下學期開始, 我就同番婆婆一齊住, 婆婆做番我監護人,
同埋有埋人生保護令, 若我媽再打我的話, 可以話佢會比人拉...

之後同番婆婆住, 因為又大個左 d, 又學埋其他家務, 煮飯煮餸呀,
洗碗洗衫呀, 耕田除草呀, 收割洗菜拎去賣呀等等等等......

我公公就起酒樓做大廚, 婆婆都煮左幾廿年飯, so 我起佢地身上學到好多,
甚至糖水呀, 年糕呀, 蘿蔔糕, 竽頭糕, 角仔, 炸蝦片呢 d, 都識整架~

但好景不常既... 我婆婆又唔想我兩母女關係咁樣, so 小三定小四開始,
一到聖誕假新年假呢 d 長假期, 都逼我番去, 當然又係過埋 d 奴隸式生活 la...

而呢個時候, 就係佢積積埋埋發洩的時候, 一樣日日罰企唔比坐,
食飯都係企起度食, 仲要 "抆" 住耳仔, 對手唔準垂低~

行過唔順眼又踢下我, 刮下我, 甚至佢自己鬧到火火地, 就黎 d 勁料,
全程我都係唔敢駁咀架, 冇出過半句聲, 佢都可以越講越火就搵我出氣~

扯住我 d 頭髮就兜頭兜腦咁撞埋牆度, 我一喊佢就仲打得勁, 仲打得狠,
拎住條兩呎長成吋厚的木棍一野一野咁打落黎, 一隻手打一隻手扯我撞牆...

果陣係假期唔洗番學, 佢都唔會帶我出街見人, so 佢可以毫不留手咁打,
周身又瘀又腫, 額頭又起晒瘤, 見血先停手, so 我而家額頭睇落去冇乜野,
但摸落去 d 骨唔係平的, 係凹凸不平的, 呢段期間, 令我學識忍喊......

不過, 主要都係同婆婆住, 所以呢幾年生活, 都算係快快樂樂咁過 la~

雖然有比同學笑過冇阿爸阿媽錫, 話阿爸阿媽唔要我先會同婆婆住,
亦曾經因為做錯一 d 小小事, 就比人話冇父母教係差 d 架 la...

亦試過有次突然打風落雨, 個個同學有人黎接放學, 但我就孤伶伶一個,
冒著雨自己跑番屋企, 果段路跑番去都要三個字架, 同埋都有比人蝦過,
小學我讀過三間, 幸好 d 成績都冇因為咁而變得唔好......

初中篇 :

中一黎 la, 因為 d 大人一早商量左要我搬番大埔住, 所以都揀番大埔區的中學,
主要係我老豆一定要我番去住, 於是又展開我的地獄式生活, 又過著苦日子...

我大埔屋企, 計埋我一家八口, 父母, 及我五個弟妹, 我係大家姐,
除左排第五果個係細佬, 全部都係女, so 我有一個細佬四個妹...

第一年番番去, 當然挨唔住 la, 好唔開心, 加上又係成日比阿媽打,
最經常性係掌括, 差唔多日日都係面腫腫咁番學, 寫週記都有寫下,
於是班主任搵學校的輔導老師同我傾計, 我就講晒 d 唔開心事出黎 la...

點知佢話會打電話比我媽傾下, 我力勸佢唔好架 la, 但當然唔成功 la,
心裡唯有摶佢講得掂我媽 la, 點知呢日放學番屋企就... 唉......

番到去咪即開片囉... 話我好唱佢, 講佢壞話, 話我咁想死就比我死,
佢亂刮左好多巴之後, 我都暈暈地, 跟住拉左我出窗口, 我地住 17 樓,
當我清醒番 d, 就見到自己上半身已在窗外, 佢剩係扯住我條校服裙咋~

又比佢鬧左一輪, 問我仲係咪想死咁果 d la, 我當然話唔係 la, 最後先冇事...
但呢件事後, 佢更加更加憎我, 我亦都更加更加憎佢, 第日番到學校,
我同樣面腫腫, 一臉愁容, 我同輔導老師講唔好再搵我阿媽, 佢都無奈答應...

之後幾日我媽都唔比我食飯, 話由得我死, 果幾日真係起廁所飲水喉水,
我對下個妹起 d 早餐度收埋 d 野食比我食, 起學校 d 同我請我食包咋...

到星期日果日, 仲起老豆面前屈我話我唱佢, 但因為我妹偷偷幫我講過好說話,
篤爆埋佢幾日唔比我食飯, 講埋我曾經暈低過, 後尾先冇事, 我媽都唔敢再餓我~

跟住中一生活營度信左主, 因我地係教會學校, 信左主後開始學習唔恨阿媽,
當然都要少少日子 la, 但最後都係變得唔再憎佢, 會體諒佢, 但我仍然好唔開心~

後尾果陣 d 同學興玩界手, 我又學左, 每次比媽打完我就自己界手發洩,
有時比佢鬧得嚴重 d 又界, 你地想像唔到佢鬧人有幾勁, 係極度之侮辱,
極度之尖酸刻薄, 極度之傷你自尊心, 仲要勁多都係無中生有, 屈得就屈~

到左中二, 咁我中學時我老豆已經係番大陸做野的, 星期六晚凌晨時份先番黎,
星期日一日起屋企, 星期一就倒塔咁早番番上去, so 我媽先咁為所欲為~

一直以黎我老豆都算對我好, 都好錫我, 但我媽就勁唔鐘意 la,
假如星期日佢想打我或鬧我時我爸有幫過口, 星期一就連本帶利比番我...

所以, 我寧願老豆唔好幫口, 但中二呢年... 有次訓訓下覺, 比 d 野整醒左,
發現原來係我老豆非禮我, 對手起我身上亂摸, 我嚇到勁驚, 又唔敢出聲,
於是扮轉身, 我郁佢先停左手, 跟住走左......

呢一晚開始, 我連老豆都唔信 la, 佢老豆都驚埋, 老豆唔知我知道佢做過呢 d 野,
但我因為知道, 都有留意到佢的目光, 成日都係注意住我胸部, 連我媽都發覺到~

我媽就當場又講 d 令我難堪的說話, 話咩個女開始發育 la, 又咩突晒點呀咁,
果陣先剛剛發育, 佢都未帶我買 bra 的, 就係呢次先開始帶我去買 bra~

跟住每個星期六我都唔敢訓著, 但阿媽係規定幾點上床訓就幾點上床訓,
又唔準關房門, 所以只好詐訓, 雖然做左成日家務好累, 但真係唔敢訓......

等到老豆番, 等佢沖埋涼, 訓覺 la, 我先敢安心訓, 但當然中途都一樣有事,
佢仍然有走黎摸我, 每次我都係用同一招, 而每一次我個心都係更加痛...

一直最尊敬, 最信任的老豆, 對我做 d 咁既野, 真係失晒望, 死晒心, 灰鬼晒架~

後尾更發現佢偷窺我沖涼, 因為公屋廁所門鐵制的, 用一條圓柱小鐡鎖住咋嘛...
但果個拉鎖位係有條縫的, 佢就起果度偷窺比我發現, 之後就用毛巾遮住...

因為佢個個星期都走黎摸我, 終於比我媽發現左, 就話我勾引老豆,
想搵老豆做後台, 起成班細佬妹面前都講埋 d 下流說話侮辱我,
甚至起報紙睇到 d 老豆強姦個女的新聞, 就指住話睇我老豆幾時姦左我~

所以起細佬妹面前, 都真係冇晒尊嚴, 佢地都可以蝦番我轉頭, 我教佢地,
佢地唔聽, 仲要砌我生豬肉話我打佢地, 因我媽唔比我打佢地的~

其實我媽都明知佢地屈我, 但都話 : 咁又點呀, 係打你就打你架 la, 洗擇日架~

而起學校我就對人歡笑, 番到屋企就背人愁, 我要做晒家務, d 妹訓晒 la,
我先可以做功課, 溫書, 有次我溫緊書, 話我 d 燈光令到佢訓唔著, 熄鬼晒,
我唯有起露台靠著微弱的光線溫書, 後尾索性走入廁所開燈關埋門溫書做功課~

起學校我成績名列前茅既... 好多老師都識我, 都好錫我, 因為我知道自己讀到書,
亦真係好鐘意讀書, 亦有因為唯有讀書先增添到我少少的自信, 所以我好勤力~

我老豆就越來越猖狂, 成日詐 d 易就撞落我度, 尤其係撞我心口,
甚至 d 眼神越來越猥瑣咁盯實我胸部, 行到邊望到邊, 真係好惡頂...

到左中三, 有次我媽唔知發咩神經, 連續幾日都心情勁差, 打得我好勁,
終於有晚又係比細佬妹老屈, 又比佢打, 但佢今次真係打得好勁,
用 d 鐵衣架打我, 打到衣架都可以斷爛, 我真係忍唔住喊 la...

佢見到我喊, 咪更打得勁囉... 打爛左兩個衣架之後, 幸好我對下個妹又幫我求情,
咁多個妹, 係佢同我最 fd, 因為年紀較接近 la, 佢又係我媽最錫的其中一個,
另一個當然係細佬 la, 所以佢求情有時都可以幫到我既, 今次又係佢救番我...

之後我又走去界手, 今次界得好深, d 血流得好快, 但係真係唔覺得痛囉...
因為個心的痛楚比起隻手果 d, 痛好多好多倍, 身體上的痛已經麻木左...

跟住呢一晚, 同樣被老豆非禮, 因為呢晚係星期六, 又係用果招 la...
但心裡真的好難受, 到第日, 因為唔想 d 傷痕現晒出黎, 所以著長袖衫~

下午果時阿媽同 d 細佬妹落左樓下公園玩, 我就沖涼先 la, 到佢地番黎,
就要同佢地沖涼呀, 放水呀, 搵定衫呀咁架 la, 諗住好好地沖個涼 la...

點知突然發現我老豆又偷窺緊, 仲要唔知點解佢會開到個門, 我嚇到乜咁,
佢行入黎睇到 d 傷痕只係講左幾句野, 但個腦剩係諗住想非禮我,
佢摸我果陣, 我真係好嬲亦好驚, 喊住叫佢走, 佢越摸越過份, 幸好呢個時候,
d 細佬妹番黎的聲音傳黎, 佢就立即走番出廳, 我就起廁所度繼續喊...

呢一晚終於發生大件事了, 可能連續兩日都身心疲憊, 睡得很睡,
加上星期日晚應該沒事發生, 所以都好安心咁訓覺, 點知訓訓下,
老豆又起度非禮我, 仲要爬上黎紮住我, 我真係嚇到乜都醒晒~

就起佢想再格硬黎時, 我媽發現左 la, 就好似電視的捉姦在床咁斷正,
仲諗住我媽今次會幫我 la 卦, 點知佢竟然係扯我出露台, 關上露台個門,
仲除埋我 d 衫, 話我咁鐘意用呢 d 手斷勾引老豆, 而家就比我光明正大咁做~

呢一刻真係無地自容, 咁大個女, 赤裸起父母面前, 仲要老豆的目光極都淫穢,
我終於發爛話係老豆非禮我唔係我勾引佢, 但我媽乜都唔聽唔信, 鬧番我,
仲捉住我叫我老豆過黎姦埋我, 今次我真係發癲 la, 發狂咁掙扎出我媽的挾制~

我衝左入房鎖住個門, 我媽唔想驚醒 d 細佬妹, so 起出面話睇我明天走得去邊~

呢一晚我真真正正崩潰, 寫定遺書比我對下個妹, 諗住第日就自殺死左去好過...
第日我一早就離開屋企, 番到學校同 d 同學講定晒 d 類似永別咁既說話 la...

因為有個好好的老師同我都幾 fd, 佢睇得出我有自殺的念頭, 搵學校社工同我傾,
當然傾完都得唔到咩幫助, 老豆果 d 野我都有講埋出黎, 但我叫佢唔好報警,
因為老豆係成個家的經濟支柱, 唔可以有事, 否則咁大個家庭真係唔知點算...

放學校就諗住去自殺 la, 所幸的是, 也許神真係保守著我, 絕處也可逢生,
有個好同學收留左我, 同學個媽中一都識我架 la, 都知道下我屋企 d 事,
都當左我半個女咁架 la, 起佢屋企住左幾個月, 呢幾個月搵左學校社工,
聯絡番社署, open 番我以前被虐的 file, 跟住法律判番我同婆婆住...

番番去婆婆度果陣, 真係好似仿如隔世般的感覺, 婆婆好慈愛咁安慰我,
都終於明白到我同阿媽呢個結係解唔開架 la, 叫我唔好唔開心, 比心機讀書...

於是, 由中三下學期開始, 我就同番婆婆住, 婆婆永遠都係我的避風塘,
亦係我最愛最愛的親人, 不知應該叫親人定親戚好 la, 但在我心裡就如親人般~
而我好記得, 岩岩番去呢一日, 婆婆佢岩岩撞傷左個鼻, 我不知幾心痛...

高中篇 :

中四開始, 公公都冇再番工 la, 我就靠住佢地的仔女, 即係我 d 舅父阿姨,
比佢地的家用, 及佢地自己的積蓄, 黎對我供書教學, 我都開始同人補習,
自己賺番少少, 起買教科書呀呢 d 額外支出, 都唔洗佢地比......

中五就冇再幫人補習 la, 因自己讀商科學校, 但自蔫考英中果份英文卷,
學校教唔到呢個 level, so 自己報左一個補習班, 比心機去讀書......

點知... 起會考放榜前一晚, 我老豆打電話黎話失業, 要我出黎做野,
果陣我唔信, 以為係媽叫佢叫我唔好讀, 因以前我媽話我讀完中三後,
就要出黎幫補家計, 唔準我讀書, 但講左陣, 真係失左業, 申請緊綜援...

而第日放榜, 真係天意卦... 全校都睇好我的成績, 點知竟然連重讀資格都冇,
咁... 無奈 la, 咪出黎做野囉, 我知道好多人失望, 尤其係我婆婆, 但佢仲安慰番我~

初入社會篇 :

因為竟然真係考唔到中六, 連 repeat 的資格都冇的成績實在對我打擊太大,
因以往就算任何小測大測大考, 只要比預期低 5 分我都已經傷心到喊,
低 10 分或以上真係人都頹埋, 喊幾日 tim, so 今次打擊真係摧毀左我...

為左屋企, 一日做兩份工, 一份全職一份兼職, 其他時間就一係訓, 一係去玩,
因為個人頹晒, 放 "pair" 晒自己, 識埋 d 唔係太好的人, 起寫我生活版,
都有篇文講過, <一段少為人知的往事>, 大家可以睇番 la~

之後, 屋企的經濟總算穩定番落黎, 出左黎做野後, 我都開始嘗試面對母親,
兩三個月番去一次, 記得第一次番番去, 個心情真係好忐忑, 好不安, 好矛盾,
幸好... 第一次冇乜特別事, 之後就 keep 住隔兩三個月就番去一次~

而且 d 弟妹都慢慢長大, 都唔再係以前咁 la, 好多野都明白左,
都尊重番我呢個大家姐, 都會好掛住我, 成日叫我番去探佢地,
每逢佢地大考後, 考到好成績就叫我送禮物, 我都會番去陪佢地買禮物~

工作穩定篇 :

而跟住我都搬左出黎九龍住, 因為都係九龍番工, 交通太唔方便, 亦太長時間,
之前都有比番 d 零用錢婆婆公公, 搬左出黎少見左, 就冇再比過 la......

但都有間中番去探下佢地, 或落雨翻風都打個電話問候佢地, 提醒佢地著多件衫,
工作方面都轉番一份, 穩穩定定咁生活, 但... 好景不常既......

平時我訓覺一定會熄電話架, 但有幾日唔知點解我唔熄, 有朝我妹打比我,
話我婆婆過左身, 果陣真係唔信架, 因為十多日前的大年初一, 番去過年時,
婆婆仲同我地有講有笑, 好健康, 冇乜事架, 但都立即換衫飛的入去~

番到久違了的粉嶺, 看到婆婆躺在某張梳化上, 冰冷的身軀, 我真係冇晒思想,
跟住就哭喊 la, 個心好痛, 好後悔點解以往唔多 d 番黎, 未請過佢去飲酒,
未買過新衫比佢, 未真正同佢講過一句我愛佢, 好多... 好多野都未做過...

唯一慶幸的... 婆婆係訓住覺咁安詳而去的, 之後發現公公唔見左,
原來公公腸癌的病情又復發, 入左廠留醫, 本來... 大家都有心理準備,
公公會先去, 但婆婆... 就真係好突然, 突然到... 冇人承受到呢個事實...

冇人敢講比公公知, 直到公公出院先知道, 果日我好記得公公的老淚縱橫,
埋怨自己點解會咁岩入左醫院, 就連老婆去左幾日先知, 話出左院連老婆都冇埋~

講到呢度... 又忍唔住喊 tim......

同埋, 公公本來係個幾肥下的老人家, 但果日見佢, 瘦左好多好多,
之後婆婆落葬了, 這已是兩星期後的事, 我就哭足兩個星期, 未肯面對現實...

而公公更加消瘦, 瘦到... 慘不忍睹, 本來醫生話公公仲有半年左右架...
但因為婆婆呢件事, 三個月後, 公公都去埋, 呢次公公係起醫院,
呢朝又係我妹打比我叫我趕入去, 我飛的入到去, 公公都已經昏迷了...

我同 d 舅父好大聲咁同佢講野, 佢似有反應, 又似無反應, 全身插晒喉,
我真係唔想咁樣, 跟住突然公公好辛苦咁, 叫醫生黎, 我地出番病房外,
但都看到醫生搶救, 最後... 公公都去埋, 搶救果刻, 我真係好心痛好心痛...

連續兩個最錫我, 亦都係我最錫的親人都相繼離去, 我真係再一次崩潰,
以前我好多時都同公公駁咀, 因為佢好鬼長氣, 又好鬼傳統, 成日批評我 d 衣著,
又成日捉我講道理, 坐住起度聽佢講半粒鐘以上野都得架......

但呢一刻, 我真係好希望再聽佢對我訓話, 好希望佢再鬧下我話下我,
小學已經讀過 [樹欲靜而風不息, 子欲養而親不在] 呢兩句話, 雖然明白點解,
但到左呢種時刻, 先真真正正咁用心去感受到呢兩句的意境, 同深切體會到種感覺~

但日子還是要活下去, 最後都係唯有收藏住 d 悲傷, 繼續過日子,
但係... 每逢翻風落雨的日子, 有寒流的日子, 我仍然習慣拎起電話,
想打個電話番去提醒佢地小心, 慰問一下, 但... 已經係冇人接聽了...

近期篇 :

而呢幾年, 我仍然係 keep 住隔冇耐就番下屋企, 探下 d 細佬妹,
同母親的關係都算係好, 正宗果隻相見好同住難, 試過番去密番 d,
我媽又係變番以前個款咁, 所以有時入大埔, 都約細佬妹出黎見,
帶佢地食下 d 好野, 都未必番屋企, 細佬妹都識諗, 唔會比阿媽知~

但聽 d 細佬妹講番我知, 原來平時我媽都久不久又發下神經,
又講番話我中學果時幾唔聽話, 又話我家務又唔幫手做, 又話我唔係佢個女,
起佢心入面, 仍然覺得我唔係佢個女, 同埋認定果陣我起屋企乜貢獻都冇...

真係好傷心, 好心死, 原來呢幾年的努力都係白費的, 但佢始終係我阿媽,
所以我仍然盡番做人個女的責任, 母親節都會買野送比佢, 請佢上酒樓食飯,
呢一日佢先當我係佢個女, 但係聽住街上周圍播住 <真的愛你> 呢首歌,
我心入面唯一想到的, 就只有我婆婆, 一個對我無私奉獻出愛的親人...

到上年年頭, 屋企又再陷入前所未有的灰色陰霾中, 因為... 因為......
竟然揭發左我老豆的醜聞, 果日我番到屋企, 我媽就捉左我入房傾計,
講出我老豆偷窺我 d 細妹去廁所及沖涼, 我聽到非常震驚~

廚房同廁所中間係同一面牆, 就起廚房灶底下面竟然鑿左個窿,
可以偷窺到廁所入面, 而個窿仲係向廁所方向梯形擴大, 精心設計的~

我真係火都黎埋, 但心裡的陰影都同時湧上心頭, 自己都打左個冷顫,
我同番我媽講, 話果陣佢非禮我都係咁 la, 你而家先知道有幾嚴重?

我媽竟然話 : 啊~~~ 原來果陣你離家出走番番阿婆度, 就係因為你老豆?
我心裡苦笑, 我媽就係咁, 精神真係有 d 錯亂, 記憶模糊, 雖然我走有因為老豆,
但最主要都係因為佢, 但而家佢唔記得, 算 la, 咪點頭將 d 責任推埋落老豆度囉~

最嚴重係, 揭發果時, 老豆正偷窺緊我第二個妹沖涼, 嚇到我個妹走左出街,
半夜先夠膽番黎, 仲係喊住咁走, 我知道呢件事後, 就急召 d 妹番黎......

最後番黎係第二個妹, 我同對下三個妹暱起房度傾計, 第二個妹未知我知道件事,
我剩係間接咁話我知道左 d 你未想我知道的事, 佢諗一諗就立即崩潰咁喊出黎...

我攬住佢, 安慰佢, 自己都喊架 la, 因為自婆婆公公去世後, 我最錫的親人,
就係我班細佬妹, 任何人傷害佢地, 比傷害我更加痛, 我對下三個妹都係受害者,
但佢地都比我教到算幾識諗, 都仲處理到心理上的唔開心, 都仲撐得住~

但唯獨第二個妹, 佢比較遲熟 d, 亦比夠鑽牛角尖, 加上佢仲要面對會考...
見到佢咁, 我真係個心痛到無法形容, 你地唔諗都唔會明白到我地的感受...

我同佢講番話自己當初都比過老豆非禮, 等佢知道我係明白佢既感受,
佢先喊完之後, 肯慢慢講番自己的感受出黎, 我一面輔導佢, 一面勸佢~

我地 4 個商議左好耐, 開頭對下個妹堅持想報警, 跟住我講番 d 利弊出黎,
報警後真係好大件事, 首先一定會到我媽崩潰, 因佢實在太愛我老豆~

呢件事, 佢都只係鬧過下我老豆咋, 因為佢跟本唔識處理屋企的問題,
d 細佬妹都係我教, 佢跟本唔識教, 有問題佢攪唔掂都係打電話叫我同細佬妹傾~

於是我約我老豆出黎談判, 我真係唔想再面對佢, 但無法不面對,
因為我係大家姐, 因為頭家可以話精神方面我係支柱, 我係話事人~

我同佢約法三章, 講到明話我地幾個妹都唔會再認佢做老豆, 唔會再叫佢做老豆,
最好笑係, 我講呢件事時, 佢竟然仲可以話冇做過, 我當然有大佢, 話再有發生,
一定會報警, 成個過程雖時半小時左右, 我都好辛苦咁忍住 d 眼淚同心痛......

呢件事後, 晚餐食飯時, 分開兩批食, 我老豆阿媽同最細果兩個食先,
最主要係等老豆食完番番入房, 我媽先叫果三個妹出黎食飯~

點知我 d 妹話番比我知, 話我老豆鬧佢地, 話 : 咁樣都算係一家人咩,
食飯都要分開兩批, 當佢唔係老豆呀, 邊有咁樣做人個女架~

於是我再搵我老豆出黎, 清清楚楚咁同佢講多次, 我話而家就係擺明唔認你,
你自己做過乜自己知, 佢想我地叫你老豆米洗旨意, 連見到你都唔想見,
一見到你, 就諗起你呢個所謂既老豆對自己既女做過 d 乜野野出黎~!

終於呢次之後, 我老豆都唔敢再出聲 la, 但屋企裡, 每次邊個妹沖涼,
其他妹或者阿媽都會自動自覺把守住老豆個房門口, 就好似睇水咁,
就算去廁所, 都一樣會搵人睇住, 雖然個窿都已經用紅毛泥封左...

你地話, 呢個家庭係個點樣既家庭, 出出入入步步為營, 每分每秒都提心吊膽,
同埋 d 妹可以話一番屋企就暱入房, 直到老豆暱入房先會出廳睇下電視~

冇人鐘意見到老豆, 一見到佢只會唔開心, 尤其更害怕老豆 d 目光,
呢種感受我最明白, 當初我都忍受過, 就算著住衫, 比佢一望都好似透視左咁~

事隔年多, 而家我都仍然會久不久打電話問下佢地, 老豆有冇咩異常舉動,
所幸都冇 la, 但係呢件事後, 我就極度恨我老豆, 我都唔會再叫佢做老豆,
同 d 細妹講開佢, 我只會稱呼佢做李生, 因我地姓李......

抒發篇 :

而家對下個妹都讀完大學副學士了, 都出來社會工作了, 再對下果個,
都中七了, 再對下果個今年會考, 又要幫佢地補習了, 跟住仲有個細佬同細妹...

唔知點解, 佢地個個都係數理方面比較強, 係得我一個文科強 d,
所以我都係幫佢地補中文科架 je... 佢地呢 part 真係好弱下...

但對於呢一頭家, 我真係唔知點去形容, 一個精神叫正常又唔係,
唔正常又唔係的阿媽, 一個無恥到都唔知點樣形容佢好既老豆,
慶幸我 d 細佬妹個個都好乖好生性, 好聽我話, 都好比心機讀書...

我雖不是家庭的經濟支柱, 但卻是精神支柱, 教育支柱, 真的好重負擔,
但我肯揹, 因為, 班細佬妹係我最疼愛的弟妹, 當然錫還錫, 我唔會竉壞佢地,
我都識教佢地, 所以佢地都好鐘意同我傾計, 同我分享佢地的生活瑣事~

睇住佢地逐個成長, 自己都好安心, 想當年佢地每個岩岩出世, 我都有份湊的,
唯一美中不足, 就真係老豆呢個死結, 呢個陰影, 好怕日後起佢地心理有影響...

因為自己都一樣有受到影響... 其實我由有記憶開始, 直到今時今日,
以往的陰影都係揮之不去, 每一晚睡覺, 我都會發形形式式不同的惡夢,
一晚好幾個, 甚至經常都好似電視劇情咁, 驚叫著咁嚇醒, 滿頭冷汗~

當中佔大部份的都係我媽做主角, 比佢追殺追打, 困著虐待, 我逃命等等等等...
有時就係被老豆污辱的惡夢, 有時就係其他怪異離奇的惡夢, 晚晚都係咁...

所以, 就算我訓幾多都好, 都係冇質量的睡眠, 呢 d 心理困擾, 都唔知直到幾時,
先擺脫到, 可能一世都擺脫唔到, 因為 d 陰影真係驅之不散, 如影隨形......

亦都可能因為以往一直慣左孤獨一人, 咩都自己諗, 自己計劃, 自己實行,
亦慣左隱藏自己真正的情緒, 唔想比人睇穿, 唔想比人知道黎到傷害我,
所以只要我唔願意, 就冇人睇得出我做既野係為乜, 或者我心裡的感受係點...

奉勸篇 :

睇完呢個現實故事, 真係好希望各位為人兒女的, 真係明白到箇中的道理~

呢個故事有兩個道理 :
一個係 : 樹欲靜而風不息, 子欲養而親不在
另一個係 : 幸福, 並不是必然的

我成日都會提醒自己, 雖然睇落我個故事係好慘, 但係比我更慘的,
一定仲大有人在, 所以我唔會怨天尤人, 反而我會去諗, 正因為咁,
先會有今日成功的我, 能獨立生活的我, 能幫助番細佬妹的我~

我咁難挨都走到今時今日的人生, 反而身於幸福中的你地, 又係點呢?

埋怨父母太過管束, 埋怨父母太過長氣同傳統, 埋怨父母比零用錢少,
埋怨父母成日鬧你, 埋怨父母成日打你, 埋怨父母唔了解你... etc.

但係起我眼中, 呢 d 都已經係種福氣, 至少你地都仲有個家, 仲有個屋企,
有咩事都唔會有家歸不得, 都仲有餐飽飯食, 都仲有父母照顧你地~

而我, 真係萬一一個唔好彩失業, 我都唔知點算, 果個家我冇可能番去住,
否則以往的事只會歷史重演, 甚至我同阿媽呢幾年黎建立番的關係都會破裂番~

你地試想一下, 萬一你日日埋怨著的父母真係突然離開人世, 你地會點?
你地的生活會點? 你地個家會點? 認真咁去思一思, 想一想, 你地會點...

同埋, 相比番你地而家對父母的諸多埋怨, 諸多不滿, 比起我呢 d 往事,
你地又會點做? 你地又會點樣面對? 你地果 d 仲算唔算係好悲慘呢?

所以... 真係好希望各位, 睇完之後唔好睇完就算, 真係認真咁去諗下,
諗下以上的問題, 當你地埋怨時, 又諗下我以上的問題, 諗下呢個故事,
我諗... 你地的怨氣或者會少好多, 甚至都唔會再嬲你地的父母......

最後, 睇完呢個故事, 可以去番文學版的精華帖子入面,
搵番我另一篇作品, <跟痛苦的回憶說再見>, 呢篇係以故事形式寫成的,
可以當睇一個故事咁睇, 好睇過呢度的第一身陳述既......

比埋條 link 你地 la, click 一 click 個故事名就得架 la~ <跟痛苦的回憶說再見>

[ Last edited by 皚霙．云云 on 2004-6-30 at 06:35 PM ]

作者: 老友記 時間: 03-11-20 05:57 PM

云云的生命歷程真係可以拎黎做教科書, 或者係 case study. 希望睇過你呢篇文的青少年人都能好好珍惜自己的幸福啦.

要知道好多人根本在係搏鬥一輪之後先可以生存...

作者: 偉哥 時間: 03-11-20 06:28 PM

-.-我個童年都係唔好過....但我係給我老豆\"/唔係阿媽
阿媽對我都幾好-o-............但我同老豆ga關係由細到宜家都好似仇人(開得波個種-.-)
細個我都係由我婆婆(婆婆對我勁好..好到無法用文字來易容...雖然她已去世左很多年..但我還是好掛住她)照顧....我婆婆去左世後.....我就..唉...........從此沒有好日子過...................................................

作者: 馬伕@o@ 時間: 03-11-20 06:38 PM

云云童年咁慘嫁>o<

我童年都係-.- 成日俾我呀哥打.....

宜在不會了因為佢唔夠我愀-.-

作者: 傻傻地 時間: 03-11-20 07:17 PM

云云俾佢阿媽咁打法..
而家係咪應該銅皮鐵骨呢=_________="

講真...父母咁對自己..
云云好慘>...<

作者: Chiu 時間: 03-11-20 07:50 PM

Originally posted by 傻傻地 at 2003-11-20 07:17 PM:
云云俾佢阿媽咁打法..
而家係咪應該銅皮鐵骨呢=_________="

講真...父母咁對自己..
云云好慘>...<

佢可能已經練成金鐘罩......or 玉女心經！

作者: 『魔鬼仔』 時間: 03-11-20 08:42 PM

咁有心機打咁多字既

作者: 乖乖女^^ 時間: 03-11-20 09:20 PM

云云姐,點解咁似你之前文學板個故事既??

作者: 東邪23 時間: 03-11-20 11:11 PM

你幾大呀???
me住大埔too ar~~

作者: mibsos 時間: 03-11-20 11:31 PM

真係夠哂曲折離奇呀＝＿＝～
仲好慘／．＼～．．．．．

作者: 皚霙．云云 時間: 03-11-21 01:40 AM

Originally posted by 李斯得林 at 2003-11-20 07:48 PM:
我想問.......係咪文學版果篇跟痛苦的回憶說再見~
既主角小雨既個一篇丫....................??
如果係個篇...我都有睇,仲留左下言~

冇錯... 就係果篇... 果陣... 我冇講主角係自己...

Originally posted by 乖乖女^^ at 2003-11-20 09:20 PM:
云云姐,點解咁似你之前文學板個故事既??

因為果個就係我個真實的故事...
果陣... 都未太敢直接面對,
所以咪冇話係自己的故事囉...

Originally posted by mibsos at 2003-11-20 11:31 PM:
真係夠哂曲折離奇呀＝＿＝～
仲好慘／．＼～．．．．．

仲會不斷更新架, 記住留意~

作者: 皚霙．云云 時間: 03-11-21 01:58 AM

Originally posted by 李斯得林 at 2003-11-21 01:50 AM:
下................開頭睇個篇都有估過下咁....
不過咁慘.......有點兒太戲劇化,所以以為係你作出黎既小說~

唉~估唔到咁既事會係現實中發生......
世事真係,一個故事比令一個故事淒慘,自己相對真係幸福得多 ...

呢度寫的, 會補述番好多細節, 或者仲有 d 寫故事時冇寫到果 d,
因為個故事果陣要黎比賽, so 要內容連貫 d, 好多都刪略左......

作者: 。嵐風。 時間: 03-11-21 02:13 AM

有咁既老豆老母好慘…
期待下一篇@0@ (有小小追小說既Feel= =)

作者: 【ㄓㄟ峰ㄟㄓ】 時間: 03-11-21 04:24 AM

云云，無論你細個，到大個出黎玩，到愛情比人玩，你都重噤堅強
真係想識下你！！～點都好～！！過左去嚕～
希望你以後生活會好ｄ丫

作者: 。嵐風。 時間: 03-11-21 04:53 AM

真人真事格外睇得入肉…
得罪講句…你老豆老母變態的
如果你既事情發生係我身上…我諗我已經去左自殺-.-

仲有你都幾大勇氣…比老豆性侵犯都敢講出黎…
其他女仔未必敢……

作者: ．茶茶． 時間: 03-11-21 05:10 AM

睇完真係睇到喊 /.\
如果我係我估我一早自殺左 or 離家出走喇 /.\

作者: 。嵐風。 時間: 03-11-21 05:40 AM

Originally posted by 神三茶茶 at 2003-11-21 05:10 AM:
睇完真係睇到喊 /.\
如果我係我估我一早自殺左 or 離家出走喇 /.\

估唔到茶茶星人都係性情中人…
@0@

作者: 鸚明神鵡 時間: 03-11-21 06:14 AM

繼續等睇你既下回分解~

作者: speedo 時間: 03-11-21 07:22 AM

想問下。。。。你有無打番你阿媽？
比我一定還手。。。。
女仔又點，唔還得手？一於同佢撐到行

作者: 。嵐風。 時間: 03-11-21 08:09 AM

Originally posted by speedo at 2003-11-21 07:22 AM:
想問下。。。。你有無打番你阿媽？
比我一定還手。。。。
女仔又點，唔還得手？一於同佢撐到行

試問咁細個既女仔
點同一個幾廿歲既女人打…

作者: speedo 時間: 03-11-21 08:19 AM

Originally posted by 。嵐風。 at 2003-11-21 08:09 AM:

試問咁細個既女仔
點同一個幾廿歲既女人打…

用棍。。。。。掃把都得。。。。都幾廿歲。。骨質梳鬆呀。。。
比人拉咪話自衛ｌｏｒ

作者: 。嵐風。 時間: 03-11-21 09:56 AM

Originally posted by speedo at 2003-11-21 08:19 AM:

用棍。。。。。掃把都得。。。。都幾廿歲。。骨質梳鬆呀。。。
比人拉咪話自衛ｌｏｒ

= =
咁世界上無人驚比老豆打啦……
用武器實嬴格-.-

作者: 傻貓＃ 時間: 03-11-21 11:37 AM

睇完云云既經歷令我覺得自己係一個生在福中不知福既細路~ ~...

作者: Killer001 時間: 03-11-21 11:51 AM

妳老豆正一人渣,佢無資格做男人!

作者: 我係少呂布 時間: 03-11-21 12:11 PM

哦...

原來係咁...
不過冇計啦... ...
此終都係有血緣關係...

作者: 萬人敵 時間: 03-11-21 12:31 PM

雨云既人生經歷只有k驅先可以形容到 -_-"
我細個果時我阿媽都好鐘意打我架...
鐵騰條,衣架,地拖棍...乜架餐都用過咁滯...
最勁果獲用個鐵角(鐵角=書架用黎頂住d書果個架)飛埋黎...就咁就爆左光=.=
不過後尾我學識左一樣野令到佢再唔敢打我啦...
就係笑啦=,= 比忍喊更高level!!
佢一打我我就笑...笑到佢唔敢打我-.-v

作者: 皚霙．云云 時間: 03-11-21 12:57 PM

Originally posted by 。嵐風。 at 2003-11-21 04:53 AM:
真人真事格外睇得入肉…
得罪講句…你老豆老母變態的
如果你既事情發生係我身上…我諗我已經去左自殺-.-

仲有你都幾大勇氣…比老豆性侵犯都敢講出黎…
其他女仔未必敢……

之前起文學版個故事... 我都未敢承認係自己的故事哩...

Originally posted by 神三茶茶 at 2003-11-21 05:10 AM:
睇完真係睇到喊 /.\
如果我係我估我一早自殺左 or 離家出走喇 /.\

呢度講得輕鬆好多架 la, 咁如果你睇我文學版果篇故事形式,
一定仲喊得厲害...... -_- 因為有 d 情節我都一路寫一路喊...

Originally posted by speedo at 2003-11-21 07:22 AM:
想問下。。。。你有無打番你阿媽？
比我一定還手。。。。
女仔又點，唔還得手？一於同佢撐到行

我至細都好驚阿媽架 la... 仲邊度會夠膽還有哩...
加上佢打人真係好勁架... 還左手又點, 下次咪又係再打過...
同埋... 始終我還有都唔係咁好嘛... 慣左默默忍受...

作者: 瓊‧邦喬飛 時間: 03-11-21 01:09 PM

云云原來都有個咁不愉快既經歷...

作者: 。嵐風。 時間: 03-11-21 01:27 PM

不用理會
LAG了
按多一下
SORRY

[ Last edited by 。嵐風。 on 2003-11-21 at 01:32 PM ]

作者: 。嵐風。 時間: 03-11-21 01:31 PM

加油！寫下回寫下回……很多人等著你呢…

[ Last edited by 。嵐風。 on 2003-11-21 at 01:33 PM ]

作者: 跆拳一生 時間: 03-11-21 02:14 PM

好慘咁WOR

作者: 皚霙．云云 時間: 03-11-21 05:08 PM

Originally posted by 萬人敵 at 2003-11-21 12:31 PM:
雨云既人生經歷只有k驅先可以形容到 -_-"
我細個果時我阿媽都好鐘意打我架...
鐵騰條,衣架,地拖棍...乜架餐都用過咁滯...
最勁果獲用個鐵角(鐵角=書架用黎頂住d書果個架)飛埋黎...就咁就爆左光=.=
不過後 ...

我界手果時... 就真係笑住咁界... -_-

Originally posted by 瓊‧邦喬飛 at 2003-11-21 01:09 PM:
云云原來都有個咁不愉快既經歷...

你而家先知... -_-

作者: 老友記 時間: 03-11-21 05:26 PM

其實云云係文學版入面o個篇文章, 當中的描述更加詳細. 大家可以去文學版精華區搵黎睇睇.

作者: 瓊‧邦喬飛 時間: 03-11-21 05:53 PM

Originally posted by 紅雨．云云 at 2003-11-21 05:08 PM:

我界手果時... 就真係笑住咁界... -_-

你而家先知... -_-

係

不過你真係夠堅強...比著係我可能做左傻事

作者: qqwwee 時間: 03-11-21 06:41 PM

你真係好慘.............睇到我有d想哭~>_<

作者: 555123321 時間: 03-11-21 08:47 PM

痴#線.....
其實我覺得你唔應該咁做架~
其實可以一早報警啦~
你fathermother根本唔係人黎既(得罪講句.....)
俾著我一早離家出走~
去邊都好~一定唔會返home~
返到去俾人打....唉!!

[ Last edited by 紅雨．云云 on 2003-11-21 at 08:56 PM ]

作者: 。嵐風。 時間: 03-11-21 11:52 PM

Originally posted by 555123321 at 2003-11-21 08:47 PM:
痴#線.....
其實我覺得你唔應該咁做架~
其實可以一早報警啦~
你fathermother根本唔係人黎既(得罪講句.....)
俾著我一早離家出走~
去邊都好~一定唔會返home~
返到去俾人打....唉!!

[[i ...

果時仲細…唔返屋企邊個比飯你食?
佢老豆真係唔係人，如果我生在佢既家庭
我一早開左佢拖

作者: Chiu 時間: 03-11-22 12:16 AM

其實故事主角一早已經選擇好堅強生活！和佢一早願諒她的雙親！只是她感到遺憾是沒法報答照顧她的兩老！

作者: 。嵐風。 時間: 03-11-22 12:29 AM

我已經將文學區既文章ＳＡＶＥ左落黎做收藏XD.....

作者: 傻魚 時間: 03-11-22 12:59 AM

我睇到一半喊左出黎

作者: 過來人 時間: 03-11-22 02:07 AM

如果我好似云云咁~
我比老豆非禮.....我實會顛左咁拎把刀......
顛左咁閹左老豆....-.-"
等佢有得睇無得咩=x=".....
比阿媽我日日都試-.-....都云云你差唔多
都入過廠~流哂血呀~拿起手就拎黎打咁啦~/~

作者: 入黎睇野 時間: 03-11-22 02:35 AM

如果我係你細佬就好
一定會幫你打#你老豆老母
裝個女沖涼咁#變態個死#街

[ Last edited by 紅雨．云云 on 2003-11-22 at 01:43 PM ]

作者: HiMsPaCe 時間: 03-11-22 03:03 AM

wa =..= 同文學版個篇有得fight =_=..........今次唔可以一次睇晒=.= 要分開慢慢睇.......

作者: yeah~~ 時間: 03-11-22 09:20 AM

Originally posted by 紅雨．云云 at 2003-11-20 05:09 PM:

果陣我諗, 萬一跳落黎唔死得, 入左廠比阿媽知道左, 又捉番我番屋企打,
話我好麻煩到佢, 咁我咪仲慘? 所以冇走去跳樓...

25樓跳落去都唔死真係奇聞
哈哈........好天真呀

作者: 皚霙．云云 時間: 03-11-22 01:45 PM

Originally posted by Chiu at 2003-11-22 12:16 AM:
其實故事主角一早已經選擇好堅強生活！和佢一早願諒她的雙親！只是她感到遺憾是沒法報答照顧她的兩老！

我只係原諒母親, 並沒有原諒父親~

Originally posted by yeah~~ at 2003-11-22 09:20 AM:
25樓跳落去都唔死真係奇聞
哈哈........好天真呀

我自己都覺得自己當時呢個諗法勁白痴,
天真... 好聽 d je... 事實係白痴... -_-

不過都係多得呢個白痴的諗法, 先至救番自己一命,
同埋... 另一個角度睇, 都睇得出我係幾咁驚阿媽~

作者: 令狐新 時間: 03-11-22 02:01 PM

提示: 作者被禁止或刪除內容自動屏蔽

作者: 皚霙．云云 時間: 03-11-22 02:19 PM

Originally posted by 令狐新 at 2003-11-22 02:01 PM:
睇完之後,真係好感觸.我仲睇埋文學版果個添...睇果個睇到眼濕...
咁小燕(你對下果個妹)係文中好似未受到爸媽既無理對侍,
現實中又係唔係呢?同埋咁而家小雨個老豆同你地既關係又係點呢?

佢係我媽既掌上明珠嘛... 點會有無理對待哩...

而同老豆的關係, 呢度呢篇係最新架 la, 文學版個故事係兩年前寫架 la,
而呢度呢篇, 由近期篇開始就係講緊而家的情況, 咪唔認個老豆囉...

作者: Chiu 時間: 03-11-22 04:44 PM

Originally posted by 紅雨．云云 at 2003-11-22 01:45 PM:

我只係原諒母親, 並沒有原諒父親~

我自己都覺得自己當時呢個諗法勁白痴,
天真... 好聽 d je... 事實係白痴... -_-

不過都係多得呢個白痴的諗法, 先至救番自己一命,
同埋... 另一個角度睇, 都睇得出我係 ...

其實如果妳dad再沒有重犯這些事！咪願諒佢！最重要他不再犯！我相信妳的媽咪可能要睇下心理醫生or 要食D震靜藥！佢應該有少少精神分裂！可能因為妳dad 生意失敗之後做成的不良影響！

作者: 十極真人 時間: 03-11-22 06:40 PM

終於睇完la 睇完之後我都會好好做人唔會成日激阿媽阿爸多謝你既分享

作者: 畸K 時間: 03-11-22 07:22 PM

Originally posted by Chiu at 2003-11-22 16:44:

其實如果妳dad再沒有重犯這些事！咪願諒佢！最重要他不再犯！我相信妳的媽咪可能要睇下心理醫生or 要食D震靜藥！佢應該有少少精神分裂！可能因為妳dad 生意失敗之後做成的不良影響！

我估佢媽媽唔係精神分裂
而係唔太肯面對現實

相反,云云無論遇到咩逆境都好堅強咁面對
真係一樣米養百樣人......

作者: 熊丫 時間: 03-11-22 07:42 PM

你個童年好慘呀．．．．．．．．

作者: 『神姐』 時間: 03-11-22 08:48 PM

i support you ar
俾d心機啦@@
世上無難事ar!!!!!
其實邊個人細個冇衰野嫁,只小你敢講出黎,
所以睇過你呢篇野既人都一定會支持你!!!!!!!!!!
希望你以後既生活比現在更好吧!!!!

作者: 過來人 時間: 03-11-22 09:29 PM

其寊我都好明白點解云云你地唔認個老豆-x-
比著我都認唔落啦....
個老豆連個女都想搞...
根本就唔可以稱得上為一個"爸爸" o_o
無報警搞大件事我覺得已經好比面佢-.-
我覺得就算認番佢...
我都面對唔到佢lor-_-比老豆睇到哂,面阻阻咁

作者: 畸K 時間: 03-11-22 10:43 PM

Originally posted by 過來人 at 2003-11-22 21:29:
我覺得就算認番佢...
我都面對唔到佢lor-_-比老豆睇到哂,面阻阻咁

咁又唔係既....
你一出世,你爸爸媽媽同d醫護都睇晒你啦
而且做body check果陣醫生又何嘗唔係睇晒你呢?
只係云云爸爸唔止睇,
仲摸佢就真係有損風化,道德淪亡既

作者: 亞豪 時間: 03-11-22 11:50 PM

咁細過就經歷咁多喇~真係睇到想喊!_!

作者: 俠三仙仔 時間: 03-11-23 12:10 AM

睇完後....原來我係咁幸福....

我問"樹欲靜而風不息, 子欲養而親不在"
↑點解?

作者: lhwhihi 時間: 03-11-23 12:23 AM

本是同根生,相煎何太急

點解你媽媽會咁架...兩個都係自己個女...點解...

你爸爸又係咁...咸濕都唔好咁出面啦...
「看到父親真的開始把褲子脫去, 她再也不能忍受」
我剩係諗個情景已經好驚...何況係你?
如果我係你...唔會再理d咩理唔理智,豁出去,一於同佢死過...
又可能直接跳落去,了結左自己算喇

點解d人咁鐘意張自己既快樂建築係別人既痛苦身上?

作者: 亞豪 時間: 03-11-23 01:47 AM

如果我係你既話~知道老豆原來係咁會即刻講比人聽
因為諗下自己對下仲有3個妹~搞得自己~實搞埋自己個妹
但係可能仲有好多顧慮既~你都唔駛咁唔開心~~~~

作者: 陳永仁 時間: 03-11-23 03:51 AM

嘩~睇晒^

好多好多感想,但要用文字表達番出黎有d困難~

但~幸福係唔係必然,應該話幸福係後天既...

作者: 皚霙．云云 時間: 03-11-23 04:13 AM

Originally posted by Chiu at 2003-11-22 04:44 PM:
其實如果妳dad再沒有重犯這些事！咪願諒佢！最重要他不再犯！我相信妳的媽咪可能要睇下心理醫生or 要食D震靜藥！佢應該有少少精神分裂！可能因為妳dad 生意失敗之後做成的不良影響！

唔理佢會唔會再犯, 呢 d 野跟本不能饒恕~!!

我媽果度... 唉... 叫佢睇醫生不如殺左我先 la~

佢日常生活好正常, 只係對住我先會有問題 je~ -_-

Originally posted by 十極真人 at 2003-11-22 06:40 PM:
終於睇完la 睇完之後我都會好好做人唔會成日激阿媽阿爸多謝你既分享

好開心真係可以幫到你~

Originally posted by 新玩家-武當 at 2003-11-22 10:43 PM:
咁又唔係既....
你一出世,你爸爸媽媽同d醫護都睇晒你啦
而且做body check果陣醫生又何嘗唔係睇晒你呢?
只係云云爸爸唔止睇,
仲摸佢就真係有損風化,道德淪亡既

或者你唔係女性, 或者你唔明白被親人偷窺果種感受...

醫生就算 body check 都一樣會尷尬 la, 但被親人偷窺喎,
仲要發現果陣, 都已經 keep 左段日子, 果種驚的感覺係好強烈架~

仲要係自己的親人, 至親的親人所做, 你真係唔明果種心裡的感受架 la~

Originally posted by 俠三仙仔 at 2003-11-23 12:10 AM:
睇完後....原來我係咁幸福....

我問"樹欲靜而風不息, 子欲養而親不在"
↑點解?

當樹想靜下, 但一陣陣的風卻不停地吹來;
當想養番自己的父母, 可是他們卻都已不在人世...

意思係解作, 好多野當你想去做的時候, 已經冇左個機會......

Originally posted by 亞豪 at 2003-11-23 01:47 AM:
如果我係你既話~知道老豆原來係咁會即刻講比人聽
因為諗下自己對下仲有3個妹~搞得自己~實搞埋自己個妹
但係可能仲有好多顧慮既~你都唔駛咁唔開心~~~~

實在... 真係太多顧慮 la......

太多太多的顧慮了, 非三言兩語所能道盡~

[ Last edited by 紅雨．云云 on 2003-11-23 at 04:16 AM ]

作者: 路途(政仔) 時間: 03-11-23 12:15 PM

云云真係好慘~
我就好好多啦~
我都好鬼憎我老豆(直程想開片果隻

)~詳細我唔講啦~
我阿媽係對我好好o既~但...

~詳細我又唔講啦~

作者: 我係阿旺 時間: 03-11-23 01:29 PM

自己老豆(裝)自己沖涼仲要比老母話自己勾引老豆
比我我一定係床頭收埋把刀等佢一黎就(隊)佢=.=

作者: 傻囡 時間: 03-11-23 07:27 PM

咁你應該放棄以前既野,向將來出進

而唔係發生左呢d事,都唔會培養到而家既你出黎喇

作者: Chiu 時間: 03-11-23 07:42 PM

云好想問妳一個問題！如果妳dad再犯妳們打算怎樣解決個問題？

作者: Chiu 時間: 03-11-23 07:43 PM

Originally posted by 陳永仁 at 2003-11-23 03:51 AM:
嘩~睇晒^

好多好多感想,但要用文字表達番出黎有d困難~

但~幸福係唔係必然,應該話幸福係後天既...

仁哥！我覺得幸福是自己爭取享受！

作者: 能戶耕平 時間: 03-11-23 09:07 PM

VANI想做既係警世...唔係比人話慘呢... ...

(真的想不到會有這個主題唷
算是更面對人生嘛?... ...)

作者: 【津彌】 時間: 03-11-24 12:15 AM

你都好慘下woo 比阿爸阿媽咁對待

睇完你篇野我都覺得自己都ok幸福下身邊有好多人鍚我亦都好多謝你教識左我"幸福唔係必然"

作者: 紫雲飛 時間: 03-11-24 12:31 AM

如果係我一定會打#你老母同你老豆

[ Last edited by 紅雨．云云 on 2003-11-24 at 02:36 PM ]

作者: 陳永仁 時間: 03-11-24 02:11 AM

Originally posted by Chiu at 2003-11-23 19:42:
云好想問妳一個問題！如果妳dad再犯妳們打算怎樣解決個問題？

呢個問題...

人都大了,不會吧??

作者: 皚霙．云云 時間: 03-11-24 02:35 PM

Originally posted by Chiu at 2003-11-23 07:42 PM:
云好想問妳一個問題！如果妳dad再犯妳們打算怎樣解決個問題？

而家... 都冇乜問題, 我諗都唔會再有架 la, 因都冇機會落手咯~

+上而家個個都一樣步步為營, 佢自己都知衰, 除左食飯去廁所,
佢都係暱埋起自己間房多, so 應該都唔會再發生 or 有機會發生...

but 如果真係... 到時... 唉... 又頭痛囉... 唔想諗住 la......

Originally posted by 【津彌】 at 2003-11-24 12:15 AM:
你都好慘下woo 比阿爸阿媽咁對待
睇完你篇野我都覺得自己都ok幸福下身邊有好多人鍚我亦都好多謝你教識左我"幸福唔係必然"

咁真係好希望你會一直都記得呢個故事, 時時刻刻都提醒著自己,
"幸福唔係必然", 要好好珍惜而家身邊的幸福, 唔好糟蹋呀~~~

作者: kristie31 時間: 03-11-24 05:25 PM

你中文真係好勁AR~....
好似D書咁呀..
好慘AR~你....
多口問下...你而家幾多歲?

作者: ★☆蝦餃☆★ 時間: 03-11-24 06:51 PM

初初睇我都以為係你作既.....
但睇落去...又覺得係真嫁喎 =.=
我覺得你好偉大 @o@

作者: 肥Ming 時間: 03-11-24 08:30 PM

多謝分享...我諗你寫曬出來應該會舒服曬...
一般人要面對過去好難...不過你好勇敢~
云妮拿番來啦~(我擺明就呃post啦~)

唔好再諗住自殺啦...你都捱左咁多次啦...
會苦盡甘來嫁~你諗下有幾多人支持你同需要你就知道自己幾重要啦~

作者: 乖乖女^^ 時間: 03-11-24 08:41 PM

云云姐如果冇d咁既過去,邊會有今時今日咁堅強既你呢

作者: 佛法無邊 時間: 03-11-24 10:53 PM

1,你老母簡直衰到貼地......

2,果位李生...可以話係一個『人渣』............

:ro10:

3,祝你生活幸福快樂.........:D5:D5

[ Last edited by 佛法無邊 on 2003-11-24 at 10:54 PM ]

作者: 汶汶 時間: 03-11-24 11:16 PM

云云加油呀

個衰人會有報應架

作者: Chiu 時間: 03-11-24 11:20 PM

Originally posted by 汶汶 at 2003-11-24 11:16 PM:
云云加油呀
個衰人會有報應架

我覺得如果佢再沒有重犯應該forgive him 話晒都是dad

作者: 陳永仁 時間: 03-11-25 12:25 AM

云云還是同屋企人一齊住?

作者: 好可愛羊wing 時間: 03-11-25 01:21 AM

云云.........
我同你真係有D似ar....
我爸爸同你媽媽一樣law.....由細到大都唔鍾意我
佢覺得係因為我，我細佬先會弱智........
唉.......
不過冇去到你咁嚴重........
我媽媽鍚我law...~!!!

仲有好多感覺都好似ga......唔知點講好ar!!!

不過，你經歷0既都比我多好多........

作者: 阿新 時間: 03-11-25 01:34 AM

[quote]Originally posted by Chiu at 2003-11-24 11:20 PM:

我覺得如果佢再沒有重犯應該forgive him 話晒都是dad [/quote

呢d有違道德既野..一次不忠,百次不容啦....老豆都冇面比啦.

作者: 皚霙．云云 時間: 03-11-25 02:01 PM

Originally posted by Chiu at 2003-11-24 11:20 PM:
我覺得如果佢再沒有重犯應該forgive him 話晒都是dad

不可原諒~!!

dad 唔係大晒, 唔係一定要原諒, 就係因為佢係 dad 仲做 d 咁既野,
更加不可原諒~!! 呢 d 唔係打下咁簡單, 係心靈上的傷害黎架~!!

Originally posted by 陳永仁 at 2003-11-25 12:25 AM:
云云還是同屋企人一齊住?

當然唔係 la... 中學果陣又同番婆婆住之後, 都冇同過屋企人一齊住 la...
now 我係獨立生活架... 但我 d 細佬妹就係同父母一齊住......

Originally posted by 阿新 at 2003-11-25 01:34 AM:
[quote]Originally posted by Chiu at 2003-11-24 11:20 PM:

我覺得如果佢再沒有重犯應該forgive him 話晒都是dad

呢d有違道德既野..一次不忠,百次不容啦....老豆都冇面比啦. [/quote]
冇錯, 絕對同意, 而且仲要唔係第一次架 la~

作者: 阿新 時間: 03-11-25 02:10 PM

云云,你幾時再寫下呢d野...我覺得可以幫到好多人知道佢地而家身在幸福中..

作者: 皚霙．云云 時間: 03-11-25 03:40 PM

Originally posted by 阿新 at 2003-11-25 02:10 PM:
云云,你幾時再寫下呢d野...我覺得可以幫到好多人知道佢地而家身在幸福中..

我的故事... 真係可以寫本好厚好厚的書了......

當然我有時間都可以再寫下既... 例如我的工作變遷咁 la...

不過真係多謝你的支持, 希望你都同樣領悟到幸福並唔係必然的道理~^^

作者: 鳳彩蝶 時間: 03-11-25 04:03 PM

睇完之後我差D喊左出黎
估唔到云云有個咁慘既過去~
唉................
表面風光,但背面就傷痕累累~
我都唔知講咩好啦~
唔開心既事已經成過去啦
樂觀d面對未來既日子~
加油

作者: Chiu 時間: 03-11-25 07:31 PM

Originally posted by 紅雨．云云 at 2003-11-25 02:01 PM:

不可原諒~!!

dad 唔係大晒, 唔係一定要原諒, 就係因為佢係 dad 仲做 d 咁既野,
更加不可原諒~!! 呢 d 唔係打下咁簡單, 係心靈上的傷害黎架~!!

當然唔係 la... 中學果陣又同番婆婆住之後, 都冇同過屋企 ...

我好明白他對妳們的心靈上的傷害！但如果確實他再沒有重犯！應該比次機會他重新做人！妳當他是一個罪人或者一個釋囚犯都好！
以神願諒世人立場來說！如果有機會被他重新機會！我都唔希望他會再犯傷害妳的妹妹們！但妳都唔想在有生之年不再認他！以上個人意見！如果令妳唔開心
i am soo sorry.............God will bless you and your family

作者: K.I.M 時間: 03-11-26 02:35 AM

我老豆同你個個差唔多,由細到大都唔比家用比我老母,乜野都唔理,講野又打橫黎講,我
都同我老豆開過幾次拖,好在我老母女強人姐,識自己出去搵錢,宜家搞埋美容院,唔係我
同我家姐我老母3個訓街都似~我老豆D衰野講唔完~.~我老母唔係為左我同我家姐一
早同佢離婚啦~我老豆個家姐又係,姐係我姑媽,佢好@不知所謂,以前我地窮個陣,睇唔
起我地,新年個陣黎都唔黎下我地屋企,有乜節日個陣,到宜家啦~前個排我老母間美容
院開張,佢就黎剪綵個D乜@野,睇到佢就火爛滾,所以之前佢個孫1個月大擺酒我老母叫我去飲我都唔@去~兩姐弟都一@樣~

[ Last edited by 鳳彩蝶 on 2003-11-26 at 03:59 PM ]

作者: 皚霙．云云 時間: 03-11-26 04:01 PM

Originally posted by Chiu at 2003-11-25 07:31 PM:
我好明白他對妳們的心靈上的傷害！但如果確實他再沒有重犯！應該比次機會他重新做人！妳當他是一個罪人或者一個釋囚犯都好！
以神願諒世人立場來說！如果有機會被他重新機會！我都唔希望他會再犯傷害妳的妹妹們 ...

我知道係應該原諒佢, 但係, 呢 d 野... 唔係一句原諒就原諒到,
而且... 我個口跟本都講唔出, 個心都真係做唔到, 我無能為力~

佢攪我我都或者冇咁恨佢, 但佢傷害到影響到我 d 細妹,
我就無法不恨佢, 我唔敢講會唔會一世都唔原諒佢,
但... 我諗短期內, 我都冇可能會原諒到佢或接受番佢~

一想到... 細妹佢地每次去親洗手間, 都要站崗咁既生活環境,
一想到... 細妹佢地當初果種害怕的樣子, 果種心靈受創的樣子,
與及那哭泣的樣子, 我真的無法原諒, 無法原諒~~~

Originally posted by 無聊的Gary at 2003-11-26 02:35 AM:
我老豆同你個個差唔多,由細到大都唔比家用比我老母,乜野都唔理,講野又打橫黎講,我
都同我老豆開過幾次拖,好在我老母女強人姐,識自己出去搵錢,宜家搞埋美容院,唔係我
同我家姐我老母3個訓街都似~我老豆D衰野講唔 ...

唉... 都真係... 家家有本難唸的經, 各有各的不同生活...
正所謂... 同人唔同命, 同遮唔同柄, 唉......

唯有做好自己, 因為以往的事已經過去左,
但將來的事, 可以自己控制, 可以自己掌握,
做好自己, 提昇自己, 將來的生活, 是屬於自己的~

Originally posted by 鳳彩蝶 at 2003-11-25 04:03 PM:
睇完之後我差D喊左出黎
估唔到云云有個咁慘既過去~
唉................
表面風光,但背面就傷痕累累~
我都唔知講咩好啦~
唔開心既事已經成過去啦
樂觀d面對未來既日子~
加油

謝謝你~~~

好喜歡你果句, "表面風光, 但背面就傷痕累累",
我也常用一句話 : "對人歡笑背人愁", 同樣是我的寫照~

p.s. 諗住留埋個言先改 gary 個留言, 點知比你快我步 tim, 呵~^^

[ Last edited by 紅雨．云云 on 2003-11-26 at 04:04 PM ]

作者: 鳳彩蝶 時間: 03-11-26 04:35 PM

Originally posted by 紅雨．云云 at 2003-11-26 04:01 PM:

謝謝你~~~

好喜歡你果句, "表面風光, 但背面就傷痕累累",
我也常用一句話 : "對人歡笑背人愁", 同樣是我的寫照~

p.s. 諗住留埋個言先改 gary 個留言, 點知比你快我步 tim, 呵~^^

証明你教導有方囉cccc
"對人歡笑背人愁"
呢句成日用丫嗎~
咪轉下囉

作者: 阿新 時間: 03-11-27 04:54 AM

係囉...好多人成日都話自己既父母煩...又或者話佢地管住晒...其實佢地都係關心你先會煩你架o者..唔通食飽飯冇野做係度晒口水咩.(除非佢口水多得滯)..管你,都係唔想你學壞o者(除非佢唔比飯or連街都唔比就冇野講啦)..比起云云既經歷...已經幸福得多喇

我整咁多括號既原因..係因為真係有呢d人.唔好成日話,邊有父母會咁對個仔女架.
試下親身感受云云呢段經歷既感受.......

作者: 皚霙．云云 時間: 03-11-27 01:48 PM

Originally posted by 阿新 at 2003-11-27 04:54 AM:
係囉...好多人成日都話自己既父母煩...又或者話佢地管住晒...其實佢地都係關心你先會煩你架o者..唔通食飽飯冇野做係度晒口水咩.(除非佢口水多得滯)..管你,都係唔想你學壞o者(除非佢唔比飯or連街都唔比就冇野講啦) ...

係囉... 有時見到 d fd 對 d 父母, 話佢地呢樣煩果樣煩,
又話佢地老土, 影衰佢地, 呢樣果樣, 我真係好鬼嬲架~

有 d 又蝦 d 老人家果 d, 我都好鬼憎呢 d 人~

作者: jacK少 時間: 03-11-27 02:12 PM

估唔到..云云咁多經歷...

作者: 啊輝 時間: 03-11-28 08:05 PM

雲雲d故事真係好感人~睇到我有點點淚光!
和有一點後悔果d

作者: 靜流ｖnｒ 時間: 03-11-29 02:20 AM

不幸...唔會只係發生係同一個人身上
都唔知點解咁多人埋怨人地咁幸福
自己就咁坎坷
可能佢地淨係睇到事情

作者: 星眼～＊ 時間: 03-11-30 12:18 PM

睇完...真係好難想象到你當時既心情同所受既壓力=.=

作者: 遜遜之2000fun 時間: 03-12-1 05:34 PM

慘~
我想問你一個問題~
你婆婆,公公住粉嶺邊到?

作者: ~海豚~ 時間: 03-12-4 04:55 AM

真係好慘.....
但係過左去就算.....
屋企人始終都係最親既人~~~
但係你呢個DADY......好似有D問題<唔好介意>
如果我係你.....我唸我真係會死左佢....
但係我覺得你好叻...咁細個識做咁多野...

作者: 皚霙．云云 時間: 03-12-4 02:45 PM

Originally posted by 遜遜之2000fun at 2003-12-1 05:34 PM:
慘~
我想問你一個問題~
你婆婆,公公住粉嶺邊到?

鄉村, 孔嶺~

Originally posted by ~海豚~ at 2003-12-4 04:55 AM:
真係好慘.....
但係過左去就算.....
屋企人始終都係最親既人~~~
但係你呢個DADY......好似有D問題<唔好介意>
如果我係你.....我唸我真係會死左佢....
但係我覺得你好叻...咁細個識做咁多野...

當環境逼住要做, 想唔識都唔得架 la, 逼住要識,
so 每個人都得, 差在肯唔肯去做架 je~~~

作者: tina0419 時間: 03-12-5 12:05 AM

不幸的家庭大有人在,所有人都不要放棄阿^^

作者: baba 時間: 03-12-5 10:28 AM

好慘唷>.<
如果我有d咁既爸爸媽媽,我一定唔會再認佢地~

作者: 遜遜之2000fun 時間: 03-12-5 10:38 AM

Originally posted by 紅雨．云云 at 2003-12-4 02:45 PM:

鄉村, 孔嶺~

當環境逼住要做, 想唔識都唔得架 la, 逼住要識,
so 每個人都得, 差在肯唔肯去做架 je~~~

下~
未聽過喎~
邊到黎架?

歡迎光臨 2000FUN論壇 (https://www.2000fun.com/)