2000FUN論壇

標題: [轉帖]天水圍的日與夜觀後感 [打印本頁]

作者: 宇宙乂微塵 時間: 09-4-1 08:28 PM 標題: [轉帖]天水圍的日與夜觀後感

終於看了《天水圍的日與夜》這部有不少好評的電影，這部電影自從在電影節首播以來，一直都得到不少正面的評價，可惜到正式上畫時，全港只得一間戲院作一日一場式既放映，有心睇都唔係咁易睇到，有少少諷刺既係，天水圍既戲院都無得放呢一部《天水圍的日與夜》，不過，我幾肯定就算有得播，大部份既天水圍居民還是會覺得這部電影甚為沉悶，原因後表，但絕對和觀眾質素無關。

這部電影講的其實就是生活，一個平凡港式家庭的生活，電影內既片段大家都應該熟口熟面，假期時在屋企hea足一日，去朋友屋企打機打牌，阿媽同鄰居異常地熟絡，阿媽闊綽地叫自己去幫鄰居，以月餅做正餐，等等既事例，或多或少都發生過係大家身上。難得既係這電影真係可以好平凡寫實咁展示出來，電視劇都經常有日常生活情節，但大多都拍得超現實，要將生活平實咁表達出來，並唔係講咁易，因為當中仲要含蓄地表達各人內心情感微妙既轉變。

話呢部電影接近真實生活，又其實有一點諷刺，因為當中有些片段可能大家以為好常見，但諗真一點，原來已經好耐無試過。最大既事例，就係一家人坐低食飯，唔駛用電視送飯，雖然係電影中我地見到佢地兩母子好似唔多對話，但好明顯可以感覺到佢地實際係好friend，好多野都可以放開咁傾，唔覺有咩秘密，呢種親子關係，用錢都買唔到。

呢一點不平凡既就係，佢地母子二人都樂天知命，縱使唔係大富大貴，但只要生活快樂，多餘既物資係唔需要既。值得一提，兩人既生命力都好強，佢地應該係屬於對環境適應力好強既人，佢地似乎好識得在現有既環境中找尋快樂，快樂其實可以好簡單。

你有壓力，我有壓力，電影內梁進龍一句不經意既說話，絕對值得大家反思一下。片中佢既老師陳玉蓮話佢情緒處理得好，有咩事都可以好冷靜，梁進龍講出一句，因為無事發生左而已。其實好多野，放開咁睇，其實都好小事，永遠都唔會有絕路，失去得多，其實都係因為要求得太多。

文首既時候，曾經話過天水圍居民唔會覺得呢部電影特別吸引，最大既原因，就係因為片中既就係佢地既生活，日見夜見既野，又有咩咁特別，值得去劇院睇？我住係元朗，同天水圍好近，都有好多住係天水圍既朋友，但從唔覺得佢地有咩問題。社會上成日講既天水圍問題，根本上就係俾人刻意放大，然後乘機抽水，最無良既其實係打造呢一個形象既人。

天水圍有三樣野特別多，屋村多窮人多南亞裔人多。屋村多實際上係全港既形象，沙田葵青等地咪又係咁多屋村，除非你係活係《四葉草》式超現實生活，我唔信你唔會無住係屋村既朋友，你又覺得佢地有無問題？窮人多根本唔代表人既質素低，人窮反而能夠提升生命力，人窮反而可以令人更珍惜自己擁有既野，踢一場波要既錢唔多，但我好肯定得到既快樂比去燒錢遊樂場推二百蚊銀仔多好多倍，一家人圍埋好迫咁食餐飯，一定開心過自己一個對住一部60吋既電視食鮑魚。香港聲稱自己係國際城市，竟然可以因為一個小市鎮有太多南亞裔人而形成一個問題？難道只有歐美係國際，南亞非洲等地就唔係國際？好老實講，我見過唔少南亞人都係好人，好多時係地鐵都以佢地既讓座速度最快，自己見到都感到唔好意思。更加值得一提既係，佢地好少向我地爭取甚麼福利，佢地多數只係要求平等對待，同大家無分別既係，只係想搵到食，可以養活到自己同家人而已。

呢篇可能講得太多社會問題，太少電影了，但其實都係想大家可以放低對天水圍人和少數族裔既偏見。
link:http://darthmikemovie.blogspot.com/2008/08/way-we-are.html

作者: Fai704 時間: 09-4-1 09:07 PM

好文~~~雖然係轉貼但都比個good你

作者: 不敵...+＋ 時間: 09-4-1 11:51 PM

題材雖好...但有時候我覺得成日標籤天水圍
自己就有少少反感!
令人覺得天水圍好似好悲涼咁

作者: 宇宙乂微塵 時間: 09-4-2 12:04 AM

原帖由 不敵...+＋ 於 2009-4-1 11:51 PM 發表
題材雖好...但有時候我覺得成日標籤天水圍
自己就有少少反感!
令人覺得天水圍好似好悲涼咁

A
B
C君

冇計啦
始終天水圍係一個新市鎮
而且好多新移民
比人用有色眼鏡睇都係冇辦法

作者: 芝仔=] 時間: 09-4-2 01:17 PM

多d人了解天水圍
三不管黑勢力圍城呢類都係講現實社會問題不過冇乜人睇..

作者: 人非草木 時間: 09-4-2 06:25 PM

日與夜已經係許鞍華導演黑暗三部曲裹面最為陽光的作品
第二部曲夜與霧所講既野更為悲情同黑暗

作者: scorpioccy 時間: 09-4-5 10:02 AM

係咪同圍城差唔多架？

作者: 火野亂太郎 時間: 09-4-14 01:41 PM

我一諗起有d七八十歲既公公婆婆執紙皮都唔去囉綜援(佢地話有手有腳唔想靠政府)

再諗起個單上哂新聞既大陸新移民家庭食毒cake事件....我就火都黎...

...萬幾2萬唔夠佢地用??佢地話我d仔女想學乜學乜....學你#$%^&....

個個有人有腳又有身份証都唔去搵野做係屋企做廢人等政府養

歡迎光臨 2000FUN論壇 (https://www.2000fun.com/)