2000FUN論壇

標題: [80後認真討論區]探究人生問題之如何創出一片天[字海類] [打印本頁]

作者: benny 時間: 10-12-20 09:30 PM 標題: [80後認真討論區]探究人生問題之如何創出一片天[字海類]

我的經歷(非重點)可跳到[重點區]到睇

我經歷,由2kf註冊起計,打網遊打到今年12月頭先介到,

註冊個年開始,我係學校既成績由全級第3變到全級尾20,

精英班中既最差之人,由我17歲講起,書讀唔成,因為單親屋企,無人管,

網遊上引中哂毒,但我亦知我媽搵8K3個人洗,好辛苦,而我媽唔靠綜援,所以我就出黎打工,

仲記得第一次去m記見工,竟然係唔請我,但我無灰心,再搵,終於第一份工就做外賣仔pt,做到我中四畢業,

升唔到上中5,就真真正正咁踏入社會大學,由維修學徒,做左3日就比人炒左(無社會經驗,係咁做錯野)..

hea足1個月都搵唔到工,之後有朋友家族做清潔公司,就去左做,我覺得,馬死落地行,清潔行業雖然係好差,但係,

無工做既時候,你乜都要做無得選擇,就係咁,我一做做左半年,名義上都叫一個清潔科文,呢半年可以叫地獄,得閒朝8晚10,

又得閒朝8晚12,第2朝就返8點,洗廁所,拖地,乜都要做,d水黑過墨豆,但係無手套比你載,就咁用手渣個地拖頭,終之做左半年,

想轉行試下,輾轉間做過slas一個月,百街汁貨2個月,一直到18歲,就開始我人生既顛峰黃金時代,做速遞,呢份工係報紙睇到家,

話人工可以10k,就去見,成功左,之後第一個月朝8晚8,得8000蚊,但係第2個月升到1萬2,因為係抽俑,得3500底,其他係俑金,

我咩都肯做,貨有幾重唔理照搬,所以就有d同事好錫我,我既人工得閒上到萬8,最少都萬2,一做就3年,可惜儲唔到錢,

自問理財真係差到爆,有錢就洗,每月比完4000~5000蚊家用,都仲有錢洗,因為我又唔追名牌,唔追電話,唯獨都係網遊引太深,

5k6k咁玩,so儲唔到錢-3-唔係中毒太深,當年可能讀到理科升埋上去。直到今年6月我無再做,因為我覺得,我仲咁後生,

呢份工剩係賣時間賣勞力,賣得幾耐,宜家搵到呢個數字,我諗我可以係出面再搵高d,我就本住呢個雄心,再開拓另一條路。

唔做前已經搵左第2份工,就係酒店度做侍應生,8k一個月包食,未接觸過呢d咁高級既職位,個心緊係難免興奮,緊張,

幻想係酒店入面升到高層個畫面,當然,我每次都好天真,以為好易,入到去都想像又係另外一回事,我既雄心,比一班hea既人侵食,

原來做酒店,係好舒服,番朝早6點,做到11點就開始等3點收工,但係我做慣左不停有野做既公司,一出黎就咁hea,個心好唔安樂,

仲要見到d經理係下面打機,電腦睇戲,你有事唔理最緊要唔好搞到佢地,要搞就自己搞掂,我hea緊你咪埋黎,

天皇老子無面比咁既工作環境...無哂心機做,又唔做。然後有人介紹賣骨灰龕位,呢份都只係pttime咁做,因為唔洗返公司,

d 客都係coldcall,係我層面好難搵客,所以就無全力做,再經人介紹做地產,可惜自己唔夠學歷,入行失敗,

結果我9月報左中5夜校黎讀(有d野真係整定,今年年尾政府推出個政策就打謝地產界,我就咁擋左一劫)

又搵到份係貨櫃馬頭做驗櫃員,渣住部機,r住春袋,等個貨櫃佬埋黎講個貨櫃邊度爛,拎部機出黎入低佢,就係咁easy,

都係hea工一份,可惜10條line,10間貨櫃,朝8晚5企係度吸廢氣吸到個人都想死,個太陽仲要哂落黎,日新270,由低做到高,

係高處既時候自己整番自己去低處,係高處自己捉唔緊高處應該捉既野,係低處又成日諗自己係咪on9左應該係番個度打死一世工呢?

[重點部份]
可能有朋友無睇上面,唔緊要,我都知道好長,上面係我既人生我既經歷,我從自己既經歷得到1d別人無既野,無睇既朋友,

上面所講既重點都係,高處捉不緊,低處未見低。接上文,我係貨櫃站度無所事事,忽發奇想,同同事傾有關聖誕節做生意既野,

點知有3條友和應,仲愈傾愈興奮,最後我地開始實踐我地既創業路,一開始講左好多幻想系既野,大家都覺得唔work,

第2日我就提出led燈配上diy聖誕帽.然後一致同過此方案,中間我都問過人意見,有人覺得我白痴,有人亦覺得哂錢,但我覺得點都要試,

堅持己見,最後畫好圖,sd左比生產帽既公司~得到既答案係...成本貴,2黎要生產量都幾高下,3黎就算有錢定大量...

人地都做唔切比我地...(個陣11月29號)..最後唯有放棄呢個計劃..又再諗過第2個,一直到12月10號,我同1個夥伴親自上廣州睇貨買辨,

我21歲仔,第一次上廣州,搵到d香港未有既貨!見識到咩叫地大!1層批發市場夠你行一個鐘,1個批發市場8層高,行到你傻,

唔自己走出去真係唔知第2個地方係點!最重要係個過程全部都係靠自己,一腳踢,睇完貨辨問價寫地址拎卡片,再上淘寶睇下有無其他批發平,

再睇yahoo拍賣有無人賣,然後番到黎香港走圍走睇下有無人賣件貨,個經驗真係打工無,我見過既人唔少亦唔算多,

屎忽鬼老土怪都見過,hea人無雄心無鬥志既人都認識過,好多80後90後既後生都係幾個心態,份工最緊要hea,容易上手,

人工高,有福利,辛苦少少都唔肯做,最快間公司升職快,但又唔知原來炒人仲快,吹開水,問未來諗住點,我想買家r35黎渣,

但..你點做先搵夠錢買..?計劃如何?無言而對,方向頓失,今日我嘗試開創自己既事業,唔知會唔會成功,無人支持都要企硬行落去,

時間浪費左太多,無咩時間再比我博殺,唔知大家點睇我,又唔知我可唔可以啟發到你地,你地既未來又係點行?安份打工等升職?一世做苦力?10

年後周街大學生中5無地方企?30歲要讀番夜校!?你地會點樣計劃自己既未來?

[ 本帖最後由 benny 於 10-12-20 09:42 PM 編輯 ]

作者: poon2701 時間: 10-12-20 09:36 PM

其實你識唔識分行架..........

作者: a1213220 時間: 10-12-20 10:06 PM

我睇哂~~~~
樓主依家幾歲?

作者: benny 時間: 10-12-20 10:07 PM

原帖由 a1213220 於 10-12-20 10:06 PM 發表
我睇哂~~~~
樓主依家幾歲?

現年21~下年22了

多謝你收看

作者: a1213220 時間: 10-12-20 10:09 PM

原帖由 benny 於 10-12-20 10:07 PM 發表

現年21~下年22了多謝你收看

21歲就搞事業...

加油

作者: benny 時間: 10-12-20 10:11 PM

原帖由 a1213220 於 10-12-20 10:09 PM 發表

21歲就搞事業...
加油

1-15歲幻年期~16-19反叛+瘋狂玩樂時期 20-21 追求理想時期~我無出街玩都成年半

生活充實總好過大顛大肺既時期,宜家個個都起馬中6出黎,不出10年周街都係高學歷,而且通漲高,人工不漲,打工係有出頭,但袋錢袋最大既永遠係老闆....我追求唔係安穩收入..反之係大起大跌既人生,人生路不平坦,先叫人生

[ 本帖最後由 benny 於 10-12-20 10:13 PM 編輯 ]

作者: 惡魔的呢喃 時間: 10-12-20 10:12 PM

我想問樓主搞事業的資本多少- -....

又想係邊賣...

我份工都係hea工...

不過工字不出頭...學下你投資事業可能都幾好...

作者: |民| 時間: 10-12-20 10:13 PM

字海
活生生溺弊了說

作者: benny 時間: 10-12-20 10:16 PM

原帖由 惡魔的呢喃 於 10-12-20 10:12 PM 發表
我想問樓主搞事業的資本多少- -....

又想係邊賣...

我份工都係hea工...

不過工字不出頭...學下你投資事業可能都幾好...

哈哈,我地呢d個本最高都係1500-2000咋,當然地加埋我有3個人,2000*3=6000蚊左右~至在打響個名有人識家咋,邊度賣,多數都係租一間格仔鋪,網上宣傳,大陸搵貨賣,香港搵貨番大陸賣,兩邊發展,而我地既目標係黎緊新年係街度賣野~入d貨都唔算好貴

咩都試,創業前期,老闆係公司唯一員工~

作者: benny 時間: 10-12-20 10:17 PM

原帖由 |民| 於 10-12-20 10:13 PM 發表
字海
活生生溺弊了說

睇多陣交流下啊~

作者: 惡魔的呢喃 時間: 10-12-20 10:17 PM 標題: 回復 6# benny 的帖子

有理想是好事...不然..真的很沒意思...

不過也要計劃... 不然只是大話...

就賣聖誕帽一言... 我猜也不會大起大跌- -

衰左都係1m-2m 搵到都係5-6m比盡d 都係10m左右...

作者: 惡魔的呢喃 時間: 10-12-20 10:19 PM 標題: 回復 9# benny 的帖子

如果你要賣到有名聲

你的產品一定要有一個記憶點先,,

不然你如何突出重圍....

作者: benny 時間: 10-12-20 10:20 PM

原帖由 惡魔的呢喃 於 10-12-20 10:17 PM 發表
有理想是好事...不然..真的很沒意思...

不過也要計劃... 不然只是大話...

就賣聖誕帽一言... 我猜也不會大起大跌- -

衰左都係1m-2m 搵到都係5-6m比盡d 都係10m左右...

嘿嘿.....計劃多元化,生意唔只一單,賺錢唔只一次,我地小試牛刀,蝕小錢賺經驗,總好過蝕大錢又蝕經驗

作者: Dying_Otto 時間: 10-12-20 10:21 PM

樓主加油~~~~~

創業之路是不易的

作者: benny 時間: 10-12-20 10:23 PM

原帖由 惡魔的呢喃 於 10-12-20 10:19 PM 發表
如果你要賣到有名聲

你的產品一定要有一個記憶點先,,

不然你如何突出重圍....

名聲要靠一點一滴儲,突出重圍就係要跟時間競賽,我睇到件貨宜家旺角未有賣住@@我今星期尾開賣就放圖上黎比你地睇下@@

作者: 惡魔的呢喃 時間: 10-12-20 10:24 PM 標題: 回復 13# benny 的帖子

....聖誕帽賣一賣不賣...

新年賣利事封好不好賣一賣又不賣

如何能做出...名堂...

除非你的產品件件也有...記憶點姐係d人見到就會好想好想買...

一係就記得... 格仔鋪...唔係唔得...機率低...

作者: benny 時間: 10-12-20 10:25 PM

原帖由 Dying_Otto 於 10-12-20 10:21 PM 發表
樓主加油~~~~~
創業之路是不易的

一開始搵夥伴既時候,比人拒絕~比人當傻仔,當我講廢話~都有半年之長~先搵到宜家呢兩個人同我一齊起家

路雖難行,但你唔行,打後仲難行~你因世界而變,但我卻要世界因我而變

作者: 惡魔的呢喃 時間: 10-12-20 10:26 PM 標題: 回復 17# benny 的帖子

樓主你是理想主義者... 很多成功人士也是理想主義者...失敗人士也是...希望你成功啦

也不錯 ...我只可留名睇結果...

祝你成功...

作者: benny 時間: 10-12-20 10:28 PM

原帖由 惡魔的呢喃 於 10-12-20 10:24 PM 發表
....聖誕帽賣一賣不賣...

新年賣利事封好不好賣一賣又不賣

如何能做出...名堂...

除非你的產品件件也有...記憶點姐係d人見到就會好想好想買...

一係就記得... 格仔鋪...唔係唔得...機率低 ...

聖誕帽呢,我地宜家diy左30頂出黎,可惜整唔切+成本大,我地既風格有別於傳統聖誕帽,而我今次係大陸搵到既產品,就我自己都已經比佢吸引到,好新式既野!所以我覺得你所講既記憶點,能做到!3個人既腦永遠解決唔哂d問題@@都係上網交流搵靈感好

作者: benny 時間: 10-12-20 10:32 PM

原帖由 惡魔的呢喃 於 10-12-20 10:26 PM 發表
樓主你是理想主義者... 很多成功人士也是理想主義者...失敗人士也是...希望你成功啦

也不錯 ...我只可留名睇結果...

祝你成功...

不甘心就要行,我同你都係人,我能想到既,你都能想到,何必睇人結果,成與敗,最重要係成功必驕傲,在高處捉緊你應捉的東西,而敗,亦不要放棄,重新站穩腳就可以,你甘心做被操控者?

作者: 龍奈 時間: 10-12-20 10:41 PM

努力

作者: benny 時間: 10-12-20 11:00 PM

原帖由龍奈於 10-12-20 10:41 PM 發表
努力

多謝支持!!

作者: 雲之盜 時間: 10-12-20 11:05 PM

樓主,我們來比賽一下,誰能把理想堅持得更長久。

作者: benny 時間: 10-12-20 11:12 PM

原帖由 雲之盜 於 10-12-20 11:05 PM 發表
樓主,我們來比賽一下,誰能把理想堅持得更長久。

要堅持理想,就要從實踐中堅持~你既理想係~?

作者: |民| 時間: 10-12-20 11:19 PM

已閱
值得深思
不過暫時希望繼續學業
祝你生意興隆

作者: benny 時間: 10-12-20 11:21 PM

原帖由 |民| 於 10-12-20 11:19 PM 發表
已閱
值得深思
不過暫時希望繼續學業
祝你生意興隆

當年我中四得經濟見得下人

其實全肥

我都想返番過去進修學業

作者: 雲之盜 時間: 10-12-20 11:25 PM

原帖由 benny 於 10-12-20 11:12 PM 發表

要堅持理想,就要從實踐中堅持~你既理想係~?

我既理想係能夠環遊世界所有國家,
每個國家都stay一段日子(即係唔係一兩日果d呢)
我需要有一定財富等我有足夠選擇權去感受每個國家既各種生活,
不論貧富我都希望可以體驗得到。

然後等我完全旅程後,我要教其他年青人點樣獲得財務自由。
自由定義人人不同,但好大程度上都需要建立o係擁有財務自由既狀態下。
(我個人甚至認為無一種自由可以建立o係無財務自由既狀態下)
想想看,人生於世本來是自由的,卻無處不在地被奴役。
究竟有幾多人把每日珍貴的時間生命尊嚴被迫地出賣給企業家和資本家?
有幾多家庭問題因為父母沒有時間和金錢而產生?
父母離世,什麼財產也沒留下,除了一屁股的債和爛攤子。
有多少夢想因為金錢上的缺乏而胎死腹中,從來沒被實踐?

定義是主觀的,錢是客觀的存在。我只幫忙解決客觀問題。
得到財富之後想做乜野,我管唔到,亦唔想理會。

我只提供選擇權

作者: benny 時間: 10-12-20 11:31 PM

原帖由 雲之盜 於 10-12-20 11:25 PM 發表

我既理想係能夠環遊世界所有國家,
每個國家都stay一段日子(即係唔係一兩日果d呢)
我需要有一定財富等我有足夠選擇權去感受每個國家既各種生活,
不論貧富我都希望可以體驗得到。

然後等我完全旅程後,我要教其 ...

環遊世界唔難,但睇下你想用咩方式去遊走呢個世界,係我國度,環遊世界係有財富既人去第2個國家旅遊購物,而體驗世界係用自力更生既方式遊走呢個世界,行到邊度,停低係邊度,用自己一套生存方法係世界每個角落生存,呢種真係要好大勇氣同埋無懼既精神先做到,比起我既理想,呢個理想實踐度好高難度!

作者: 雲之盜 時間: 10-12-20 11:40 PM

原帖由 benny 於 10-12-20 11:31 PM 發表

環遊世界唔難,但睇下你想用咩方式去遊走呢個世界,係我國度,環遊世界係有財富既人去第2個國家旅遊購物,而體驗世界係用自力更生既方式遊走呢個世界,行到邊度,停低係邊度,用自己一套生存方法係世界每個角落生存,呢種真 ...

我覺得,要真正體驗世界,
你必需要先有權去選擇任何既體驗方式。
環遊世界的確唔難,我大可以馬上成為背包流浪客,
去到邊就一邊打工一邊旅行。
但記住永遠有個資本社會你無法靠呢種方式去體驗,要去果度係需要香噴噴既鈔票。
一個有錢人有權選擇一蚊都唔帶去旅行,一個窮人冇辦法o係每一個佢逗留既國家花費一百萬港幣。
我想環遊世界係因為我自己都想尋找自由既真正定義。
係咪想做乜就做乜咁就算係自由呢? 我好想試下呢個狀況,然後睇下自己有冇感覺到"自由"。
要搵到真正答案,選擇權係好重要,而錢就係選擇權中既重要的環節。當然,健康都好重要。

我認為,要成為背包流浪客當然需要好大勇氣,但要由低下階層衝上去上流社會
再去實踐自己既理想,就需要更加大既勇氣。

作者: benny 時間: 10-12-20 11:43 PM

原帖由 雲之盜 於 10-12-20 11:40 PM 發表

我覺得,要真正體驗世界,
你必需要先有權去選擇任何既體驗方式。
環遊世界的確唔難,我大可以馬上成為背包流浪客,
去到邊就一邊打工一邊旅行。
但記住永遠有個資本社會你無法靠呢種方式去體驗,要去果度係需要香噴 ...

先遊走中國

中國資本主義仲未成熟

體驗一個中國,我諗得著都唔少,但想同做又係2回事,我由幻想變理想再實行....都好幾年

想左好幾年,開始做就得1個半月

樓主既計劃如何?

作者: ahl0kJ 時間: 10-12-20 11:48 PM

祝你成功...

作者: J.辛尼迪 時間: 10-12-20 11:49 PM

睇哂,樓主加油

好小見到有d 2x咁唔怕捱

作者: benny 時間: 10-12-20 11:53 PM

原帖由 J.辛尼迪 於 10-12-20 11:49 PM 發表
睇哂,樓主加油
好小見到有d 2x咁唔怕捱

捱慣左就覺得無咩野,低至清潔上至苦力,1頓拉街3.5一個人上落貨都係咁

作者: lee111 時間: 10-12-20 11:59 PM

係一個飽和度極高的城市
創業?

你有想過什麼叫突破意念嗎?
不是的話

嘿嘿嘿嘿

蝕撚死人

作者: 老翁 時間: 10-12-21 12:01 AM

發展極限開始現形
如果香港仲係重視金融

早抖啦

作者: benny 時間: 10-12-21 12:03 AM

原帖由 lee111 於 10-12-20 11:59 PM 發表
係一個飽和度極高的城市
創業?

你有想過什麼叫突破意念嗎?
不是的話

嘿嘿嘿嘿

蝕撚死人

嘿嘿...大陸市場比較有發展空間,大陸對各國品牌既需求量十分之高,香港係飽和度高,但係我賣精品

希望d人行行下街屎忽痕會幫親下

作者: 雲之盜 時間: 10-12-21 12:04 AM

原帖由 benny 於 10-12-20 11:43 PM 發表

先遊走中國中國資本主義仲未成熟體驗一個中國,我諗得著都唔少,但想同做又係2回事,我由幻想變理想再實行....都好幾年想左好幾年,開始做就得1個半月樓主既計劃如何 ...

我既計劃由我中三下學期已經開始著手實行。
我首先需要大量知識、智慧、人脈同埋起始資金。

所以我由中三下學期開始大量閱讀,
邏輯思考、商業、金融、投資、管理、溝通及人際關係、演講以及各種世俗文化書籍;商業雜誌、報紙,
加加埋埋已經睇過超過350本。我唔鐘意中學既教育制度,
亦都認為中學教既知識有起碼95%會被浪費掉,所以知識根本唔係最重要,
反而思考能力、學習能力、判決力、分析力先至係最重要,所以我選擇睇課外書,唔睇教科本。
我自從中一時o係網吧做part time之後,就冇再問屋企拎過生活費,
當然我依然住屋企人既地方,食屋企人煮既野,用屋企人既水電煤。
中四五我根本冇時間溫書,會考我只有12分。
我知道冇可能一路返工一路讀中六七去升大學,因為全職學生有好多都做唔到,
我冇理由做到,畢竟會考20分既人唔係廢既。

所以我走左去讀澳洲果d high dip,然後升澳洲大學,
當然只係o係香港讀既遙距大學學位課程。
如今小弟都21歲,下年2月就22歲。我大學畢業了。
為左將來環遊世界有用,我一年前開始學始西班牙語。
因為我冇考a level,會考英文只得D (Syllabus B)
自問英文肯定唔夠高材生,所以我必須要有自己既定位,
要學d人地唔識既野。剛好西班牙文o係地球上有4億人使用,
南美洲絕大部份國家都用西班牙文做官方語言,2012世界杯2014奧運主辦國都係巴西。
此舉必然做就無數商機,我要做既野就係順洪流而上。
巴西雖然用葡萄牙文為母語+官方語言,因由於鄰近各國全部都用西班牙文,
所以佢地有接受教育既國民都需要學西班牙文(就像我們要學普通話)

我宜家搵梗工,目標係o係大公司做管理實習生。
如果唔得我會轉做trading或者merchandising,希望可以學多d生意上既野。
如果可以,2年後我會讀個碩士學位課程,盡快將自己打造成Management Level。
25歲前我必須擁有第一筆起始資金開始我第一盤生意。
南美洲係我既目標市場,雖然黎梗20年應該都係中國既世界,
但係未來既世界係資源導向既世界,偏偏南美洲擁有絕佳既天然資源,
佢地既人均GDP,識字率,大學畢業生既數字宜家係用好高既速度上升梗。
我相信,10年後既南美,就係10-15年前既中國,
我俾10年時間自己,俾10年時間南美。

你說,賭上一生需要勇氣嗎?

[ 本帖最後由雲之盜於 10-12-21 12:06 AM 編輯 ]

作者: benny 時間: 10-12-21 12:04 AM

原帖由老翁於 10-12-21 12:01 AM 發表
發展極限開始現形
如果香港仲係重視金融早抖啦

唔緊要,當宜家仲有時間蝕既時候,就要係跌既時候搵出跌既原因,唔係到30歲既時候,真係蝕唔起..家庭父母....

後生仲未有咩負擔,上到25歲就開始負擔黎料,過多10年周街都中6,渣住張中5都驚

作者: benny 時間: 10-12-21 12:11 AM

原帖由 雲之盜 於 10-12-21 12:04 AM 發表

我既計劃由我中三下學期已經開始著手實行。
我首先需要大量知識、智慧、人脈同埋起始資金。

所以我由中三下學期開始大量閱讀,
邏輯思考、商業、金融、投資、管理、溝通及人際關係、演講以及各種世俗文化書籍; ...

可能我肯讀書既話,都會睇到你睇既野

我睇既係一個小小既市場

再由一個小小既市場睇一個大市場

但你睇既係世界性

其實計劃如是,但總有變數

我個人認為,計劃不能過短亦不能過長

[ 本帖最後由 benny 於 10-12-21 12:12 AM 編輯 ]

作者: 雲之盜 時間: 10-12-21 12:28 AM

原帖由 benny 於 10-12-21 12:11 AM 發表

可能我肯讀書既話,都會睇到你睇既野我睇既係一個小小既市場再由一個小小既市場睇一個大市場但你睇既係世界性其實計劃如是,但總有變數我個人認為,計劃不能過短 ...

我覺得,讀唔讀書根本唔影響你能否實現理想
(除非你理想係做太空人之類)
學無先後,達者為先。
事實上經過貿發局統計,學歷低既人生意成功既機率o係學歷高既人既 5 倍! 500%!
你有你的實幹、執行力、街頭智慧。
我有我的知識、分析力、書本智慧。
世界如此大,鈔票如此多,實在無須比較!
各做各的,各贏各的。

我個人認為,成功根本就冇得計劃出黎^^"
成功係靠努力同埋勇氣,敢於捉緊機會,創造機會。
所以一個標準既生意人,應該要好似隻狗咁!
無時無刻嗅出每一個商機,見機行事隨機應變。
而唔係成為一個書呆子! 讀得書多,為人一世打工既機率越高。
世界每秒都在變,今日既計劃書,聽日隨時可以變廢紙。
所以我由頭到尾都話,我地學過既知識絕大部份都會被浪費掉,
你諗唔諗到有咩事業係同時需要識
地理、經濟、化學、物理、生物、中史、文言文、世史、微積分?
我就諗唔到喇!!! 不過,當你經過大量學習唔同範疇領域既知識,
就會鍛鍊出學習力,適應力,抗壓力同埋意志,支撐你去面對未來既未知既困難同逆境。

作者: 冰心冷刃 時間: 10-12-21 12:57 AM

作者: benny 時間: 10-12-21 06:53 PM

原帖由 雲之盜 於 10-12-21 12:28 AM 發表

我覺得,讀唔讀書根本唔影響你能否實現理想
(除非你理想係做太空人之類)
學無先後,達者為先。
事實上經過貿發局統計,學歷低既人生意成功既機率o係學歷高既人既 5 倍! 500%!
你有你的實幹、執行力、街頭智慧。
...

咁我加埋你咪食到大茶反

哈哈

作者: 老翁 時間: 10-12-21 06:54 PM

原帖由 benny 於 10-12-21 06:53 PM 發表

咁我加埋你咪食到大茶反哈哈

理論就是這樣來的

作者: benny 時間: 10-12-21 06:55 PM

原帖由 冰心冷刃 於 10-12-21 12:57 AM 發表

我有方向~有理念,宜家就係實踐既階段

作者: benny 時間: 10-12-21 06:56 PM

原帖由老翁於 10-12-21 06:54 PM 發表

理論就是這樣來的

理論係死

人係生,理論係由無變到有,而跟理論做野既人,永遠得不到進步

作者: 老翁 時間: 10-12-21 06:58 PM

原帖由 benny 於 10-12-21 06:56 PM 發表

理論係死人係生,理論係由無變到有,而跟理論做野既人,永遠得不到進步

其實你不明理論既含意

作者: benny 時間: 10-12-21 07:03 PM

原帖由老翁於 10-12-21 06:58 PM 發表

其實你不明理論既含意

每個人理解能力都唔同~理解出黎既意思又唔一樣~願聞其詳!

作者: ~KTx 時間: 10-12-21 07:12 PM

搵錢, 你想搵既不斷去試唔放棄, 我相信總有一日會搵到 lol

作者: benny 時間: 10-12-21 07:18 PM

原帖由 ~KTx 於 10-12-21 07:12 PM 發表
搵錢, 你想搵既不斷去試唔放棄, 我相信總有一日會搵到 lol

除左搵錢,我仲想做d人地未做過既野,就好似創業咁

5成得個諗字,3成人一有失敗就放棄,1成人緊持到一半,另外個1成,就係成功既人

作者: 惡魔的呢喃 時間: 10-12-21 07:56 PM

未來企業家...加油...

我資本家泥...做老闆唔岩我...

我喜歡錢搵錢...你上市我睇你年報睇買唔買啦kaka

生意太困身...我的目標也是環遊世界同體驗同食盡美食..

要太量時間同金錢..同青春..25前我都未有第一桶金的話...

只好平淡過一世...

世界上成功的創業者...冇一成..咁多...

(睇成功定義...我定義就係現金流100m美元,,,) 香港好似得1m人有現金流100m仲唔知係唔係企業家

[ 本帖最後由惡魔的呢喃於 10-12-21 07:59 PM 編輯 ]

作者: benny 時間: 10-12-21 08:21 PM

原帖由 惡魔的呢喃 於 10-12-21 07:56 PM 發表
未來企業家...加油...

我資本家泥...做老闆唔岩我...

我喜歡錢搵錢...你上市我睇你年報睇買唔買啦kaka

生意太困身...我的目標也是環遊世界同體驗同食盡美食..

要太量時間同金錢..同青春..25前我都 ...

哈哈~我個人定義做老闆已經係~唔好理賺定蝕,佢做緊既野已經唔係員工可以體驗得到~我都係諗住25歲前如果發唔到圍,就搵一間行業專注咁做.做到升職賺既錢能夠養到頭家就足夠

作者: 雲之盜 時間: 10-12-23 12:46 AM

其實創富又唔駛話限時限刻既我覺得
創造現金流亦都無需要太過著意用邊種途徑
根本投資同做生意需要太多同樣既技能

如果你投資股票,你都需要知道果個行業如何運作,
果間公司營運得好唔好,條數靚唔靚,未來前景(both公司同產業/板塊),
宜家係咪抵買....如果你本身做開某一行,係會有優勢(除非你平時返工根本係發夢on99)
如果你識做果間生意,甚至做梗果行生意,o係投資上你就更加有優勢。

同理,一個專業投資者肯定需要懂得有效分配資源,評估風險,
難道有呢d技能做生意會冇優勢? 9成創業失敗原因在於現金流管理。

搵錢就係搵錢,條條大路通羅馬。唔會話過左25歲之後就要甘於平淡。
事實上根據統計好多低下階層同中產上位時都係40-50歲。
呢10年先至係創業家既黃金十年!
因為累積比較多既人脈、經驗、才能、資金,而且人既成熟程度、處事處世手法亦都比較好。

只要搵到錢,誰管你投資物業、古董、鐘錶、金幣、郵票?
反而,如果我地學既野唔夠多,睇事物既眼光咪窄囉!
咁樣好容易錯失機會! 最錯就係唔願意接觸未曾接觸既事物,
如果你肯既話,就算他日唔成功你都唔會遺憾。因為你已經充分咁體會左人生,
你擁有好多唔同既經歷,比其他人都多。最重要,起碼你有做過!
你可以大大聲咁同人講:你估話咁易咩仆街!
呢句野係無做過既人冇資格而又成日講!

作者: ~沖v靈~ 時間: 10-12-23 01:05 AM

我覺得樓主最好識一d專業才能
同埋真係睇清楚呢家個市道係點樣先好創業
因為我覺得樓主未有足夠既準備同認知....
冇lala入市有好多問題出現左要解決既時候就出事la
所以希望樓主真係做足事前功夫先去馬....

作者: 禮哥仔 時間: 10-12-23 05:39 AM

120%支持你加油不過從面相黎睇無咩老闆相=.=總之你要要加油啦

作者: +:阿天:+ 時間: 10-12-23 02:06 PM

睇得出樓主擁有
e家一般年青人冇既野
就係鬥志同決心
我相信你的生意會越黎越好
"沒有不可能的事,只有不願做的人"

作者: 冰心冷刃 時間: 10-12-23 04:02 PM

原帖由 +:阿天:+ 於 10-12-23 02:06 PM 發表
睇得出樓主擁有
e家一般年青人冇既野
就係鬥志同決心
我相信你的生意會越黎越好
"沒有不可能的事,只有不願做的人"

作者: ~KTx 時間: 10-12-23 05:30 PM

原帖由 benny 於 10-12-21 07:18 PM 發表

除左搵錢,我仲想做d人地未做過既野,就好似創業咁 5成得個諗字,3成人一有失敗就放棄,1成人緊持到一半,另外個1成,就係成功既人

創業大把人創過=.=

最多你自創個無人做過既行業出來...
例如: 上門清潔電腦...(主機+keyboard)  好似未聽過有人做d咁既野
好耐之前新聞  話  幫有錢人汁狗屎都搵到錢-,-

講真, 乜都試得, 成唔成功  要試完先知

作者: 遊戲如人生 時間: 10-12-23 05:53 PM

我同樣有著樓主既想法
香港打工跟本就係on9 做埋都唔夠生活
唔洗講咩一個人係香港最基本我覺得係一個住所
但你計計如果係香港要打幾耐工先夠買起一層樓?
所以我都劑過創業我同樓主一樣我出黎做野5年
個個都話想創業但十成有9都係得過講
好唔容易比我遇上一個同伴係幾個月前陪我試過一次創業(賣iphone4套)
雖然最後都係蝕本收場原因係太過主力入某幾種貨散唔到咁到多,應該要多元化d 種類入多d 數量入少d 試下個市場先
蝕本唔緊要我覺得最重要係我賺到經驗
正在打算倦土重來樓主不如pm傾下=]

作者: lovemsc 時間: 10-12-23 06:39 PM

留名學野~

歡迎光臨 2000FUN論壇 (https://www.2000fun.com/)