2000FUN論壇

標題: 個人感想之對戰心態D6篇 [打印本頁]

作者: HKPoorGuy 時間: 11-8-30 06:08 PM 標題: 個人感想之對戰心態D6篇

(MENG都轉過黎呢度吹水既時候,順手POST埋篇文係度唔使麻煩大家轉載)

其實好耐之前已經有人想我寫第二篇關於D6既野..
不過呢個暑假博殺搵銀..連去玩既時間都冇乜.
返學個陣又忙第D野,唔會咁好心機寫文..
琴晚係暑假最後一日返工..用埋最後番工時間寫下文都好.

技術同戰術既野,坊間開始有討論同起色,
而且唔同人會開始建立自己一套既對戰方式,
再講就有D「沈」,不如講講反而對戰更加基本既野:心態.
係D5個陣其實我都已經寫左篇有關心態既文章.
不過D6既全國對戰同D5真係兩個世界,係時候寫篇update d既版本.

1. 永遠高估對手

係D5個陣我提過唔好低估對手,如今同日本仔對戰,無論咩場合都好,先高估對手,永遠有著數.

店內對戰大家圍內玩,對手水平同風格永遠有得預算.但係全國對戰,你連對手係邊個都未知,更何況日本個邊而家已經有一大批人開第二三四張卡玩,一開波就走去玩全國TUNE車,大把50LV以下既高層MASTER或甚至MASTER+充斥市場,實行扮豬食老虎,對住低LV更加唔應該手軟或手下留情.

而且講進步同演化,日本人不論級數定階段都比海外玩家更快更高水平.因為D6始終係高消費,日本個邊到而家都係100YEN玩兩鋪為主,計番即係港紙一鋪5蚊有多,玩全國又可以一變三既時候,日本人熱衷對戰比TA多好多.實際上,TA有唔少既野,都係由對戰試番黎加以改良既結果.至於海外玩家,意識形態上都係玩TA既多,玩對戰既少,因此對戰論班數無可能夠日本仔鬥.

再者,SEGA設計既對戰系統,好容易造成玩家錯覺.香港地真正坐得穩MASTER+位置既,我知道同我見過既人到而家都係唔超過十個.就算係我自己,可能連輸幾鋪之後再係彈番落去對番D MASTER.因此,當大部分人仲係度對緊D MASTER,以為自己可以輕輕鬆鬆贏到日本仔既時候,其實已經係比個系統fake左. 事實上一見到MASTER+,除左自己唯一個條主場之外都係九死一生.當然要解決問題唔係一朝一夕,但心態永遠都係最基礎既野:記著呢個世界永遠係天外有天,人外有人,一山還有一山高.

2. 抹走所謂的「道德標準」

香港人打機.往往自立門戶有好多不成文規定,無論頭D,灣岸,甚至其他GAME都係.而呢D規定往往就建立左一般香港人既底層意識.例如:開後追垃圾也,玩夾車狗西也.但呢D規定,一黎邊個發明無從考究,只係一D社會共同價值觀.二黎呢D規定合唔合理,亦冇一個標準既答案,最多只係人云亦云.但係應用係頭D上,情況就好不一樣.

講下歷史.SEGA自從D3完左之後,頭D基本上都係每兩年幾就玩一代畫.係商業層面黎講,呢個時期稱之為產品既生命週期.基本上SEGA預計得到,大慨產品流入市場兩三年之後,玩家就會失去新鮮感,覺得隻GAME悶,另外隻game亦好難再有高收費,因此就算D5本身個系統設計優良,大可以整個D5 EXP 3.0加全國對戰之時,SEGA仍然大刀闊斧推出一個改頭換面既D6,此舉亦成功吸引左一堆玩左灣岸3好耐既玩家轉投.熜後追呢樣野,我聽番黎就係源自於D3(我冇玩過D3),就當熜後追o係D3係合理都好,D6同D3根本就己經完全唔同,但有唔少香港人既意識形態仍然係偏向熜後追.至於呢樣野係好定唔好,一黎我未有資格評論,二黎好視乎個場對戰兩邊所諗既野係點.對於我而言,我只係視為對手弱點用黎攻擊.至於夾車或其他野,我都係一樣手法處理.

其實想講既係,無論你個人有冇呢D標準都好,對戰只係講一樣野:贏定輸.你輸左一場對戰,對手做既野又完全係系統確定為合法途徑既時候,你所謂既標準可能有好多都係狗屁.比太多標準綁住自己,最後只會變成自殺.

3. 忌七情上面

香港人打機,無論咩game都好,好多時輸左就發脾氣/暴噪/火滾/埋怨,etc.係機鋪呢d人流多既地方更加表露無違.基本上只要係賽車game,無論頭D/灣岸/BG都好,都總會有一堆人入錢係為左表現自己,多於係真係打機.人往往喜歡表現自己,同時希望掩飾自己既不足及心靈空虛,係機鋪呢D地方完全體現得到.事無大小爆太,爆油門,爆粗,甚至郁手打人打MON,其實都係同一道理.

但係對戰都係個樣野:贏定輸.輸左對戰就算事後問候人地老母又好,點樣數臭對面又好,你仍然改變唔到輸呢一個事實.而七情上面往往只係比人知道你EQ低,而唔係強者既表現.事實上,我睇過唔少人對戰,其實好多時都有贏既機會,只係好多時唔抵得對面夾一夾,比人搞到失控,就放棄唔玩.又或者係一兩個急彎懶型扭到個太震到隔離部機都feel到,最後搞到彎心食左屎又冇得玩.如果我係日本仔,出trip去香港機鋪行一轉,基本上就可以起到大部分香港人既底.

全國對戰其中一樣特色就係,你同你對手唔會知道對手100%底細,事實上,高層次既對戰往往係靠一d對手估你唔到既位而贏人.因此,對手知道你越少,甚至對你產生錯覺,你既勝算就會提高.但調番轉,你個人七情上面,往往等同比對手知道更加多你既底.全國對戰永遠山水有相逢,越比對面知道得少野,越對自己有著數.

4. 找尋輸的理由,不是輸的藉口

香港人打機第二個普遍問題係,輸左一場對戰,往往搵藉口俾自己等自己feel comfort.去新之城呢d旺鋪行一轉,不難聽到d人輸左就賴後追,賴部機,賴對面狗西,etc.但都係個句,輸就係輸,再講咩野都係無補於事.有好多人明白呢個簡單道理,但係實際係咪講一套做一套又唔知了.

如果真係想自己有進步,輸左對戰之後應該問問自己,有d咩位做漏左/做錯左/做得唔夠?對手通常係某d路段會有d咩傾向?通常有邊d位蛇日會比人夾死?某d位處理得唔好係因為個個位既道路架構問題,方便對手做一d舉動,定係個個位自己通常處理有問題?

每場對戰,無論輸左定贏左,無論從宏觀定微觀角度出發都好,都可以有大把野諗.因為每場對戰都係電腦計算出黎既結果,就算兩者勢均力敵,電腦判斷唔到邊個贏,最後都會反映於終點前睇到兩者彊持不下,最後就睇邊個運氣好或閘車閘得好.因此,每場對戰絕對有數得計,絕對有根據判斷邊個輸邊個贏.至於要點樣從呢方面去令自己進步,唯有多看對戰,無論係自己定人地對戰都好,發掘一d邏輯出黎,然後再慢慢試下睇下係咪work.經驗同進步亦都係咁樣慢慢累積得番黎.

5. 將對手的東西化做自己的東西

對面贏得你,就肯定有D位係佢做得好過你,個D位極有可能係你可以學習既地方.對戰比人捉到路,比人係某d位玩死/夾死,其實係普遍不過既事.天下間只有玩真車先唔會有夾車既情況出現,要旨意一隻賽車game冇夾車係根本冇可能出現.但另一邊廂,冇人話過你唔可以夾埋一份,實際上大家鬥夾,而你夾死對面,即係你比對手技高一籌,呢個先係對戰既真理.

而去到MASTER+既水平,已經係講緊點樣同人玩心理戰,做d咩野等對面判斷錯誤,etc.所以我蛇日同人講:玩得對戰個人諗野要好仆街.因為每場對戰我都會諗定點樣害死對面,無論用軟定硬手段都好.對手既底線,情感,自尊心,通通都可以作為攻擊對象.做到殺人唔眨眼,方為上者.要做到呢個層次,只有學習高手既對戰取向,並化為己用先做得到.全國對戰雖然有一半係鬼車,但仍可反映對手唔同路段既對戰取向.最重要既係,對戰發揮自己100%水準先係尊重對手同對戰既表現,對戰後大家都可以係朋友.總好過你讓我讓,冇料都要扮四條.

P.S. 澄清

WINNER寄張卡過黎比我幫手打分一事,相信有唔少人都已經知道.有樣野要講番既係,WINNER自己本身有資金,再加上佢自己TA水平,要自己打彩火係冇難度.佢俾錢我,係想知道有關我對戰策略同打法既資料,呢D先係佢俾錢既原因.因此各位唔好諗到WINNER好似請槍打分咁,我一日玩得幾十蚊,唔係日日打,而家仲要分兩張卡打,冇番一年半載佢張卡都唔會彩火.仲有我同佢有協定,佢會幫我試我既理論係實踐上係work or not(因為我唔得閒同冇錢試).因此呢個deal係雙贏,而佢本人係樂意咁樣做.

作者: Amuse 時間: 11-8-30 06:15 PM

TONG大又發表心得

我戈篇係小毛見大毛

作者: KT- 時間: 11-8-30 06:57 PM

EQ!...很好的心理分析.

作者: Eddy:) 時間: 11-8-30 07:50 PM

支持支持:)....篇文講得好岩~

作者: 口者口者 時間: 11-8-30 08:11 PM

TONG大你將佢變左中文版非常好~~

作者: 狂野殺神 時間: 11-8-30 09:07 PM

好

好

作者: Amuse 時間: 11-8-30 09:22 PM

口者口者發表於 11-8-30 08:11 PM
TONG大你將佢變左中文版非常好~~

NO呀...呢個唔係上次戈個黎呀...
=.=

作者: twswts 時間: 11-8-30 09:39 PM

本帖最後由 twswts 於 11-8-30 09:40 PM 編輯

Amuse 發表於 11-8-30 06:15 PM
TONG大又發表心得
我戈篇係小毛見大毛

先睇完你果篇再睇TONG大果篇會得著仲多
又可以上精置頂啦

作者: 口者口者 時間: 11-8-30 09:44 PM

Amuse 發表於 11-8-30 09:22 PM
NO呀...呢個唔係上次戈個黎呀...
=.=

你唔講真係唔知=0=以為仲係之前果個英文版添

作者: S_ANT 時間: 11-8-30 11:39 PM

曾經聽人講過
D2,3 興起熄後追文化,係因為某個網站ge 要員帶起...XD

作者: meme7878 時間: 11-8-31 12:17 AM

編文真係講得幾啱
諗起以前d2果時
唔踩BREAK熄後追真係會比人小

作者: twswts 時間: 11-8-31 12:17 AM

口者口者發表於 11-8-30 09:44 PM
你唔講真係唔知=0=以為仲係之前果個英文版添

英文版果個長依個咁多>_<

作者: CBAABC 時間: 11-8-31 01:15 AM

學習了.

作者: pk1234856 時間: 11-9-5 09:15 PM

心理戰

編文真係表逹左玩D6心得
thx:smilie_:):

作者: ivan19940117 時間: 11-9-18 12:08 PM

我睇完編文真係玩得好左，thx

作者: C字 時間: 11-10-12 09:50 AM

十足十有個涼介咁

作者: mt3113 時間: 11-10-18 01:00 AM

找尋輸的理由,不是輸的藉口 <----最認同係E個
爆機者,多數係D廢人先會咁做.... 正常有番咁上下實力既人... 以打TA既冷靜頭腦...唔會連少少野都接受唔到...要發脾氣...

不同我再加多一個POINT　　（未到最後。。。。仲未輸！）

作者: 剎那88 時間: 11-11-14 07:29 PM

東韋囝抽韋囝抽東耒耒耒

作者: clarko221 時間: 11-12-7 09:41 PM

学习了。

歡迎光臨 2000FUN論壇 (https://www.2000fun.com/)