2000FUN論壇

標題: 旅行團的浪漫邂逅, 卻被我一手的毀了..........心痛夢碎, 恨錯難返 :( [打印本頁]
作者: 劍天影    時間: 13-1-4 04:35 AM     標題: 旅行團的浪漫邂逅, 卻被我一手的毀了..........心痛夢碎, 恨錯難返 :(

本帖最後由 劍天影 於 13-1-4 01:39 PM 編輯

唔好意思,我知道篇野真係有少少長,但我想講清楚個情況同故事既發展,比大家分析下,有5-10分鐘耐性先好睇落去
我已將篇野分段,方便大家容易 d 去睇,我亦都好希望會有有心人睇下,比 d 意見! 在此先感謝各位路過同睇過既朋友! 新年快樂!

[少少關於我既背景,可略過: 我係男仔,今年24歲,剛剛大學畢業,極遺憾地從未拍過拖! 我一直好想尋找一段戀情,但總是陰差陽錯...
以往既8年我只係鐘意過幾個女仔,但我個性被動,因此全部都只係暗戀,苦戀
我17歲個年,有一個我鐘意既女仔三番四次向我暗示,但我都冇理到佢,陰差陽錯,我選擇左暗戀,苦戀,到最後都沒有結果!
17至23歲,我發奮圖強,發狂咁讀書同考試,亦因為我個性問題,什麼都要贏,到最後中學同大學畢業時都係全級第一,但換來既卻係我內心入面最大既空虛同寂寞,我一點都不開心...
16至21歲時,我都有鐘意既女仔,有目標,只係我冇去追,但在22至24歲時期,可能因為班上好少女仔,所以我連對象目標都找不到,更加寂寞同痛苦,什至感到絕望]


入正題.......剛剛聖誕節同我阿媽參加了一個10天美國旅行團, 有個女仔坐我前面, 佢地係一家四口黎旅行 (父母+1個仔+1個女)

我第一眼見到個女仔就對佢有好感...形容下佢先,長烏黑頭髮,個樣好清純好靚,由於佢日日都坐我前面,我觀察到佢同佢家人既相處,對佢個性有基本了解,我一日比一日更加鐘意佢...
旅遊巴士上日日都調位,但日日個女仔都係被安排到坐o係我前面,也許這也算是一種奇妙的緣份吧!

第一日同第二日: 我同個女仔大家都有眼望望, 四目交投時, 有觸電既感覺

第三日同第四日: 自由活動時間太多,冇太多機會見面,但見到時都有一點點既眼神接觸,我亦feel到佢有望我,並有甜絲絲既感覺 (當然我明白呢個"可能"係錯覺)  第四日係聖誕節,我當時真係覺得呢個係我人生最開心既聖誕節!

第五日同第六日: 指定觀光點很多,自由活動時間很少,有好多好多機會同佢擦身而過,有絕佳機會去認識佢,同佢有眼神接觸但我卻故意回避,佢望過黎時,我裝作望第二度,因為我本人比較怕羞!
過左呢兩日之後,我發現我真係好鐘意佢,對佢動左真情!!!! 我對佢朝思暮想,無時無刻都在留意佢既行蹤,嘗試接近佢,但都係冇勇氣去同佢講野! 同時,我感到佢父母,佢哥哥,同我阿媽成為我同個女仔講野最大既障礙,因為好難搵到機會係佢單獨企o係到!  我要同佢講野又要不被發現既話,只有好短時間,根本講唔哂我想講既野,因此我就諗到交字條比佢話真心想同佢做朋友,並留低Facebook,e-mail...博一博都好!

第七日: 幾乎全日都自由活動,大家眼神接觸既機會好少! 但當晚我在酒店拎左幾張紙,並諗好點寫想同佢真心交個朋友既內容,同時寫入我既Facebook,e-mail比佢,我打算在第9日或第10日o係佢單獨既時候交張字條比佢, 原因係第9日同第10日既行程會有大量時間同機會可以同佢擦身而過,佢亦應該會有單獨既時候! 我知道呢個方法佢會 add 我既成功率不高,但即使只有 1%, 0.1% 我都願意去做! 就算做不到情人,同佢做個朋友都好!!!

第8日下午!!! 突變... 導遊突然話佢地一家四口已經提早搭飛機離開左,幾乎完全冇可能既事發生左,當時我真的心碎,好心痛,最慘係我仲要o係我阿媽面前裝作冇事!! 我知道我呢一世都唔會再見到佢, 要同佢永別!!! 我真係好後悔當初點解唔同佢打下招呼同講下野,亦好後悔點解唔早d留低 Facebook,e-mail比佢,但一切都已經太遲! 能夠做到朋友最好,做唔到我都冇遺憾,至少我有努力過,但最後我完全冇努力過真係好後悔...點解人往往都係失去左先識得後悔?  機會是很少,但回想8日黎我都有一兩次絕佳既機會,但我冇採取主動...
我之後不停同自己講,我可以失敗,我可以接受被拒絕,但卻不能讓自己後悔同有遺憾! 我當時真係後悔到不得了...早知係咁,點解我唔早d主動去認識佢? 係呢個時候如果可以比我再見到佢,我真的什麼都不怕,失敗,被拒絕也不怕!

第9日同第10日: 回程路上,我都係在痛苦中渡過,對佢有無盡既思念,掛住一個人真係好辛苦,我呆望住佢天天坐我前面的影子,回味住同佢走過千山萬水,一起看過月圓月缺,一起見證過多少個日出日落,我既夢徹底被粉碎...我可能親手斷送左我一生既幸福...我一次又一次咁斷送美好姻緣,真係好無奈...

到而家由佢走既時候已經過左5日,呢5日5夜我既情緒都好波動,更辛苦既係我又要裝作冇事,我既心情到而家都仲未平伏到,真係好辛苦! 日日都仲回味緊同佢一齊既日子,由第1日到第8日所有同佢一齊擦身而過既片段! 我有時覺得,係唔係如果從來都冇遇到佢會更加好呢? 到底今次是緣是債是場夢? 8日既快樂,長期既痛苦,值得嗎?
想要再見到佢,又知道不可能發生,想要忘記她,卻又忘不了,真係好辛苦好辛苦!!

有兩首經典歌既歌詞真係唱出我而家既心聲...我而家真係好 down...
劉錫明 - 是緣是債是場夢
http://www.youtube.com/watch?v=z9jD99Uyh9E
劉德華 - 一起走過的日子
http://www.youtube.com/watch?v=KqlfGFXPA4A

講左出黎舒服左 d, 我今次 post 出黎係希望:
1. 有人可以真心安慰下我
2. 認真檢討下今次我做錯左 d 咩, 我冇同佢講野, 但我亦有苦衷, 因為個女仔既父母同哥哥成日都o係佢身邊, 我好難搵到機會入手, 有冇人可以教下我點可以o係呢個環境搵到同佢講野既機會?
3. 我原本諗住選擇第9日或第10日o係佢單獨既時候鼓起勇氣交張字條比佢,因為我知道最後2日會有好多機會見到佢! 能夠做到朋友最好,做唔到我都冇遺憾,至少我有努力過! 一切都已準備好,但有邊個可以諗到佢會突然消失?
問世間,情為何物,直教生死相許......
作者: 〞kIu﹑    時間: 13-1-4 02:03 PM

好戲劇性呀...但真係點解會走得咁急?
其實識左幾日 感情都唔係好深厚
我覺得你好快就會忘記佢架啦

就當發左場夢啦
作者: 劍天影    時間: 13-1-5 03:06 PM

本帖最後由 劍天影 於 13-1-5 03:11 PM 編輯

明明應該有10日時間比我, 我一切都已準備好, 亦可以鼓起最大勇氣去同佢做個朋友, 但點解個天最後要咁對我?
我真係發夢都諗唔到會有咁既突變......如果我一早知道只有8日時間, 我一定會更加主動, 更加早有所行動, 但問題係我根本完全唔知既情況下咁樣玩我, 真係好慘!  
就算到最後佢唔肯同我做朋友我都唔介意, 因為至少我可以同自己講我有努力過.......但由此至終我都冇機會同佢講野, 根本冇機會比我去努力, 因為一個變數就將我玩殘.....最慘既係我之後既後悔同遺憾....我可以接受失敗,我可以接受被拒絕,但絕不能讓自己後悔同有遺憾!
多日以來我同佢朝夕相對, 我係真心想識佢, 我已經對佢動左真情, 不能自拔......我對佢既感覺同任何其他女仔都不一樣, 上一次我鐘意人已經係4年前既事........我並不輕易動情.....唔通我同佢真係有緣無份?
就算到最後我只係同佢做到普通朋友,我都無悔......但我連呢個機會都冇...........

我想要忘記她,卻又忘不了,真係好辛苦!!!  思念一個人真係好辛苦!!

作者: loveyoujj520    時間: 13-1-5 09:14 PM

本帖最後由 loveyoujj520 於 13-1-5 09:27 PM 編輯

我唔明一拖再拖有咩用加上世事係有好多變數  一定要係最尾個日先比得佢?   越早比唔係越好咩    同埋認朋友唔一定只識個女仔   識埋佢父母丫哥都可以既
唔好咩都怪天    你自己做既選擇就要自己去受返    8日時間唔係多但都唔少   你自己就一拖再拖  你怪得邊個?   要怪只可怪自己當日點解要做呢個決定   

你同佢溝通既機會大把   你可以主動問下佢地邊到好玩/多美食 有咩地方好介紹都可以傾到計   冇介紹錯你又可以多謝人地  又搵到機會傾計  你可以用呢個做開頭

你仲要人地單獨先比張紙條佢  哥仔轉個位諗  你係個女仔  有個男仔係你單獨一個人時冇拉拉比張紙條你  你會點樣諗人   要人加你fb都要有理  唔係我想做同你做朋友人地就要加你fb     最好搵個理由  如你地大合照左  你可以用呢個理由問佢地拎fb  話第時sd返相比佢地  要做到呢步  你要首先有溝通先   冇溝通呢一步可以miss左佢

呢次天比左個機會你    但你唔珍惜一拖再拖  以為你想要幾多日機會天就比幾多你    機會係話黎就黎 話走就走  唔會等你一個人
作者: sukiyaya    時間: 13-1-5 09:16 PM

本帖最後由 sukiyaya 於 13-1-5 09:20 PM 編輯

回覆 劍天影 的帖子

樓主~既然是有緣無份的, 及早放開吧!!

天讓你們有緣見面，但不代表你們會有緣互相認識或一起。
既然個天都給了你一提示：你們是有緣無份的，不如及早放手吧!!

給一個機會放過自己，都給一個機會自己去認識下一個女孩吧。

*不過有時候，錯過了某些事或人，都不好將錯推落其他事上。因為機會是由自己創造的!
作者: 劍天影    時間: 13-1-6 01:33 AM

本帖最後由 劍天影 於 13-1-6 01:35 AM 編輯

世界真係有好多變數, 一切都會隨時變動, 機會真係一過左就冇...無奈......

我知道交字條呢個方法佢會 add 我既成功率不高
不過呢個好睇佢對我有冇好感,如果大家都有好感既話,我相信成功率會大增! 多日黎大家都有眼望望,呢個係有好感既跡象,當然呢個可能係我既錯覺,但最少我覺得值得一試,為自己既將來努力下
就算只有 1% 機會成功我都願意去做, I have nothing to lose! 就算做不到情人,同佢做個朋友都好!!  

愛最難既地方就係你永遠唔知佢對你有冇意思,如果我可以肯定佢對我有意思,我一定好快主動出擊

我選擇等到最後係因為我想用多幾日時間去認真觀察下,同埋等待時機成熟一 d 既時候先出擊,咁都有錯??

我發現我而家根本忘記唔到佢, 到最後攪成咁或許當初我冇遇到佢會更加好........


作者: loveyoujj520    時間: 13-1-6 05:25 PM

本帖最後由 loveyoujj520 於 13-1-6 05:29 PM 編輯
劍天影 發表於 13-1-6 01:33 AM
世界真係有好多變數, 一切都會隨時變動, 機會真係一過左就冇...無奈......

我知道交字條呢個方法佢會 add  ...


觀察   大家都唔識對方可以觀察到d咩     對望都唔一定係有好感   對望可以係有自信有禮貌  有d人係永遠唔會同人對望架  我唔知你有冇見過呢種人啦   

想同人做朋友最緊要係吸引到人    第二件事你地可以長期見臉你拖我冇野好講    你地見臉既日子最長都係得10日   你拖9日先想去行動    你真係當機會企定定等你咩   

你唔好將件事諗得太遠   你要做既係同佢做左朋友先    如果連朋友都唔係  你諗幾多事都係冇用   朋友多係冇壞既  你一拖再拖係因為你喜歡佢    如果你只係想同佢單單咁做個朋友會唔會拖足咁多日

你再諗下係唔係你自己既問題呢?    識個普通朋友要考慮咁多日定係你既社交能力差?  一個健談既人識朋友係好容易見一次以經可以做到朋友

比左機會你去同人做朋友  但你就白白浪費左8日時間   你冇得怪邊個   只可以怪自己點解要考慮咁耐  一拖再拖    識朋友係唔洗去考慮         
作者: 劍天影    時間: 13-1-8 02:16 PM

本帖最後由 劍天影 於 13-1-8 02:26 PM 編輯

唉, 我真係錯在一拖再拖, 唯有當買個教訓, 經一事, 長一智

不過到左今日我仍然好鐘意佢, 好掛住佢, 但可惜今生今世都冇可能再見到佢, 好灰......我真係唔知點先可以忘記到佢~~~~

要忘記一個人真係好難好難......有冇人可以教下我點做呀?
作者: 花濺淚v3v    時間: 13-1-9 03:21 PM

本帖最後由 花濺淚v3v 於 13-1-9 03:21 PM 編輯

你同佢完全唔認識
但係就幻想與佢經歷過萬千山水、陰晴月缺

你話你地四目交投
坦白講
你長期望住人地
人地會好尷尬
因為你長期望實佢
佢不時察覺到你望佢
係好正常

只怪當初無勇氣踏出第一步
宜家只可以繼續遐想同埋遐想

唔係話打擊你
但係你夠鐘死心

　
作者: 劍天影    時間: 13-1-10 02:39 AM

你話你地四目交投
坦白講
你長期望住人地
人地會好尷尬
因為你長期望實佢
佢不時察覺到你望佢
係好正常


其實唔係呀, 我可以話個情況係剛剛相反呀
因為佢日日坐我前面, 上落車, 觀光等等都經常o係我附近, 自然有好多機會見到大家, 有好多機會可以好自然咁望到
由細到大, 我鐘意人時都習慣係唔多望佢, 絕對唔係長期望實佢......我上面篇文章都有講到每次同佢擦身而過時, 我總係裝作望第二度, 而唔係望住佢, 而家諗起都有 d 後悔

有幾次四目交投時, 我回避目光, 隔左一陣我發現佢仍然望緊我
當然我明白愛情路上係"可能"會有好多錯覺, 但個情況絕對唔係你講既咁樣"我長期望住人地"

作者: 〞kIu﹑    時間: 13-1-10 11:43 AM

其實樓主真係夠鐘醒下啦...

作者: 劍天影    時間: 13-1-10 03:05 PM

我都想醒下, 但只恨我忘記唔到, 心煩意亂......有一次我暗戀過一個女仔, 用左5年時間都忘記唔到佢

而家畢左業, 識女仔既機會更少, 機會一次又一次咁錯過, 得失錯漏都沒法解釋, 難道我命中就已經註定係孤獨一生? 諗到呢度真係好灰......

作者: CHoK!麟=)    時間: 13-1-11 05:14 PM

樓主唔好咁唔開心，世上唔會得唯一一個選擇的。而且成篇文都只係由你角度出發，亦如你所講，可能會有好多錯覺，你諗到咁可歌可泣，對方會唔會咁諗~?定還是他只當你是普通團友?你把你自己的期望定得太高了!

其次就係世事無常，機會唔會時刻在你面前等你的!經一事，長一智，下次記得把握稍縱即逝的機會!
作者: 劍天影    時間: 13-1-12 02:51 AM

或者你講得o岩, 世上唔會得唯一一個選擇的, 唔洗為左一棵樹放棄成個森林~
但一年又一年咁過去, 真的不知要等到何年何日先可再遇到另一個心儀既女仔......

在此再次多謝各位既耐性同回覆! thx!
作者: CHoK!麟=)    時間: 13-1-12 11:25 AM

一定會有既~~試下join多d唔同既活動，擴闊下自己圈子~~見到d人就自然遇到架啦!
我相信你都係一個有耐性既人~~你都想搵個好既~~始終要慢慢等啦!

加油師兄，support u!
作者: 花濺淚v3v    時間: 13-1-14 03:54 AM

〞kIu﹑ 發表於 13-1-10 11:43 AM
其實樓主真係夠鐘醒下啦...

我唔係呢區版主
就話可以叫醒佢姐

但你係呢一區版主
你要治療佢喎
作者: 〞kIu﹑    時間: 13-1-14 10:49 AM

花濺淚v3v 發表於 13-1-14 03:54 AM
我唔係呢區版主
就話可以叫醒佢姐

我都係講事實

一係樓主去恩明社搵番佢啦,但都要直系親屬先得

既然你知道沒有恩明社就應該面對現實
作者: jy754015    時間: 13-1-19 02:54 AM

人生如夢~唔好諗咁多~e個世界好細嫁....我返大陸都撞到我之前小六鍾意既校花.....之後咪又行返堆一起~
作者: Ting§Infinite    時間: 13-2-2 01:44 AM

要搵既一定會搵到:)
樓主要加油!!!
作者: 拉筋手下    時間: 13-3-25 11:20 AM

劍天影 發表於 13-1-4 04:35 AM
唔好意思,我知道篇野真係有少少長,但我想講清楚個情況同故事既發展,比大家分析下,有5-10分鐘耐性先好睇落去 ...

你係個d 想拎高分 但係怕exam 想溫書但冇溫 個種垃圾!
作者: kuen9090    時間: 13-3-28 04:16 PM

劍天影 發表於 13-1-4 04:35 AM
唔好意思,我知道篇野真係有少少長,但我想講清楚個情況同故事既發展,比大家分析下,有5-10分鐘耐性先好睇落去 ...

樓主既一見鐘情但係亦無法得到愛既感情我十分同情,請問樓主有個個女仔既小小資料?,例如名字,或者任何既資料,
如果有既話睇下我幫唔幫到你查到佢d野?



歡迎光臨 2000FUN論壇 (https://www.2000fun.com/) Powered by Discuz! X1.5.1