2000FUN論壇

標題: 不打‧短評61：飢餓遊戲2星火燎原 (有內容) [打印本頁]

作者: 港產不打 時間: 13-11-24 11:02 PM 標題: 不打‧短評61：飢餓遊戲2星火燎原 (有內容)

本帖最後由港產不打於 13-11-24 11:22 PM 編輯

不打評價：長者早場$16

不打總評：第二集飢餓遊戲，再係一套垃圾戲

上年飢餓遊戲第一集，我出長文【飢餓遊戲又係一套垃圾戲】插到佢反轉
當時有好多死忠插爆我，話套戲美國票房好收得，證明係神作
條！【十二生肖】係國內夠收得，唔通又係神作？！

美國新一代觀影質素越來越差係不爭既事實
唔計美漫改篇電影同合家歡動畫電影 (事實係近年美國十大票房中佔左一半係呢兩類戲)
近年好多垃圾戲都會被追捧【賤熊30】【魔境仙踪】【星空奇遇記：黑域時空】【名瞞戇族】
套套都爛到不堪入目，而呢套也一樣
上集我狠評：劇情鬆散、粗糙、荒謬、兒戲，諗住轉左導演會有期望
點之今集變本加厲：劇情更鬆散、更粗糙、更荒謬、更兒戲

為了解釋原著既世界觀，用左接近個幾鐘文戲去交代，但一樣交代得唔清唔楚
咁Q多文戲都刻劃唔到女主角既立場同心理轉變，兩個男主角同樣淪為大茄
【飢餓遊戲】既荒謬，一樣冇解釋到，點解咁凶殘既生死殺戮又可以係最受歡迎既娛樂節目？！
都城既極權統治、嚴重既貧富懸殊、極端既階級分層根本一開始已經唔合理
所謂勝利之旅根本唔通，每屆只有一位生還者你逐個區去難道被殺果區既市民會歡迎你咩？！
用個濕九GAME去維穩既前設根本一開始已經荒謬派膠，仲要偏偏去到第74屆市民先開始醒覺？！
個GAME既設定同樣粗糙，今集話晒係歷屆勝出者互劈，參加者質素仲衰過上集
幾條蛋散一兩分鐘都冇就死左，基本上打team，重點打既唔再係敵人
而係每隔一小時既遊戲危機：毒霧、血雨、狒狒、雷劈、滋擾鳥、大海無量，好能求其
最後結局又兒戲到一支穿雲箭成個系統可以爆晒，你條線當頂到都冇可能突然咁長掛？！
攪咁大場龍鳳原來為左挾走女主角！？佢未去勝利之旅前又唔挾？！
橫豎你幾時挾都俾到藉口都城滅區架啦，有乜分別呢？！
其實成個系列只係想講革命，咁極權既統治要反要解放又有幾大批判性呢？！
咁能老掉牙既橋都要糾纏咁多集，好能悶，好能拖！

影后Jennifer Lawrence係唯一亮點，本身有戲，只係套戲本身冇位俾佢發揮
亦冇對手俾佢撞出火花，條假愛情線同真愛情線都冇咩時間描述
難得對總統既一幕，劇本都可以寫唔出咩張力，白白浪費左個對立位去角色塑造

【飢餓遊戲】係繼【吸血新世紀】同【魔都獵人】系列後又一熱爆全美之作
共通點都係小說先爆，再爆電影，同係青少年做主角，劇情同樣取悅青少年
矢志不移既愛情、以弱勝強、反傳統反建制既革命等元素，電影亦選正當紅型男索女擔正
咁簡單既公式，就咁成功
美國觀眾會唔會too simple, too naive？！

Youtube：港產不打
Facebook：港產
Weibo：港產不打_微博
************************
港產不打
全職非牟利網絡打手
100%支持本地製作
乜戲都打，淨係唔打港產
************************

歡迎光臨 2000FUN論壇 (https://www.2000fun.com/)