不打‧短評94：盂蘭神功 (有內容)

港產不打

不打評價：正場價 $56

不打總評：張家輝首次執導作品，有板有眼的正宗鬼片，值得支持

話晒張家輝首次執導作品，點都要入場觀看
So far 張家輝今次導與演也非常落力
而且睇得出有heart有信心有堅持
唔取巧、唔浮誇、唔煽情、唔sell gimmicks、唔低俗、唔譁眾取寵
好務實地做好導演及演員既工作
無論套戲合唔合你口味，誠意已經打動觀眾

以張家輝既演藝經驗，選擇拍笑片、動作片、警匪片、劇情片甚至乎愛情片都唔難
其實佢從影以來，驚慄片就拍過，正正從未演過鬼片
而且以新導演黎講，選擇拍鬼片其實係偏向苦山行既選擇
鬼片要拍得唔行貨，劇本要度得出色，兼顧劇情推進時，又要適當加入驚嚇位
要拍驚嚇位，氣氛營造好緊要，好需要燈光、美指及攝影既功力
劇本節奏同氣氛又要控制得好，為嚇而嚇太過泛濫，觀眾又會麻木
因此港產鬼片從來都會避重就輕
加入動作元素、偵探元素、古裝元素、愛情元素等等，但不堪入目既不盡其數
近既有林峰【詭嬰】、晶哥x葉雜碎既【猛鬼愛情故事】同埋垃圾【怪談電影】系列
純粹鬼片，而又係現代既，好看既已經要數到十幾年前彭氏兄弟既【見鬼】
So far呢套【盂蘭神功】，算係成功既第二套

我睇優先場全場爆晒，戲入面最少有3個驚嚇位全場真心尖叫，包括我老婆
車下鬼仔一嚇、醫院lift內死屍伸手再嚇、重看閉路電視自己跳樓再加女鬼係門口三嚇
未驚完，閉路電視鏡頭再突然見女鬼果下全場堅嗌
選擇傳統神功戲做背景，行規禁忌再crossover恩怨情仇，劇情鋪排有敘
以平行剪接手法交代前因後果，亦係有心思既安排，起到懸念既效果
綜觀除左個爛結局、同埋睇完戲見回頭女鬼果下有d笑位外，整體氣氛其實營造得唔錯

鬼片最難拍既地方，係決定幾時揭曉俾觀眾知而見到隻鬼既時間
玩太耐都唔見疑神疑鬼觀眾會唔耐煩，太早出現隻鬼清楚可見又會冇晒感覺
呢套衰在劉心悠太早鬼上身，唔計上床果幕，故事中段劉心悠已經明顯係張家輝和觀眾面前魔化
又係玩扭關節呢招其實好冇創意，冇晒神秘感之餘，結局更流於打喪屍式既困獸鬥，敗筆
而最後解謎亦唔清唔楚，究竟閉路電視女鬼係唔係張家輝自殺既女朋友？
上劉心悠身既係吳家麗？唔係點解要著佢件衫？如果係吳家麗為乜要害個仔？
照時序推論，吳家麗應該放完火就自殺，咁佢仲點生張家輝？
如張家輝係放火前生，但吳家麗同鹹濕班主當時根本唔係夫妻，咁即係班主和鹹濕班主係兩個人？
結局自殺一獲熟，其實又帶唔出咩信息，母債子還？點解安排只有班主一個冇事？
玩到成劇團人死晒，班主仲可以開到神功戲？
都係果句：港產片既定律，永遠有個粗結局

Youtube：港產不打
http://www.youtube.com/cheungsecond
Facebook：港產
http://www.facebook.com/cheungsecond
Weibo：港產不打_微博
http://weibo.com/cheungsecond
************************
港產不打
全職非牟利網絡打手
100%支持本地製作
乜戲都打，淨係唔打港產
************************

oop20022001

算係第一次拍鬼片,點都比下面啦

oop20022001

算係第一次拍呀,比下面睇下都好!!