前言：本人玩左FEZ都有一年幾，自問唔係高手，但係每埸國戰都見到唔少人
係機械式咁打, 唔用腦, 一味衝高傷, 為左D數字而沾沾自喜以為真係好有貢獻,
所以開左呢個post同有心想FEZ玩家質素提高o既人交流交流。
 【聲明1】本帖純粹就事論事, 切忌對號入座, 面到現實先有進步
【聲明2】盡量唔好人身攻擊, 貶低人地都抬高唔到你自己
宜家講講我o係國戰成日見到o既現象(歡迎補充/更正~)
【1】坐水唔出水, 唔擴, 唔出召, 主動性極低
【2】打死一邊戰線, 唔多人唔去, 隔離比人打到尼都唔理
【3】壓線慢到喊, 退就快到笑
【4】追人追太前, 比對面圍毆
【5】8+1貫, 8+1雷D, on8+1破冰
【6】隊形散亂, 唔睇地圖, 唔睇隊友, 落單比人圍死唔知乜事
【7】幾條友追一個, 資源分配不當
【8】三不政策：不打塔、不守塔、不擴地
【9】亂踢人, D人又亂投票
【10】低攻技蓋高傷技(e.g.閃刺蓋地火)〔由退色之翼提供〕
其實, FEZ真係一隻好睇玩家素質o既Game, 玩家普遍水準高, 隻Game自然愈來愈
好玩, 相反玩家普遍水準低下, 隻Game只會愈來愈悶, 慘過玩單機。
有無人諗過點解日本FEZ玩家可以諗咁多新玩法新策略？日本仔勁D？日本仔醒D？
我覺得唔係。而係人地打每一埸國戰都有用心去打, 真係有諗下點樣會贏, 點解會輸,
成日聽人講「戰埸意識」, 咩係「戰埸意識」？「戰埸意識」就係當你每一次打國戰,
你都有留心咁去觀察, 了解一個決定所攜帶o既可能性, 隨時間累積, 就係「戰埸意識」。
以上述【2】做例子說明：
點解D人成日都鍾意打死一邊, 唔多人唔去呢？
唔通, 佢地睇唔到隔離比人打到尼？
唔通, 佢地睇唔到隔離有成座山o既塔等住人拆？
唔通, 佢地睇唔到咁多人逼埋一齊係打唔到？
唔通, 佢地睇唔到將戰線拉開會易打D？
唔通, 佢地睇唔到有人猛係頻道Call馬？
唔通, 佢地睇唔到報仇唔係對國戰貢獻最大？
唔通, 佢地睇唔到呃傷唔係對國戰貢獻最大？
唔通, 佢地個腦塞住左, 諗唔到其他方法？
唔通, 佢地當FEZ係隻單機Game, D人全部係NPC？
唔通, 佢地日常生活都係咁, 一本通"輸"睇到老？
可能有人覺得我言論過激, 但係當你打足一日國戰, 見到D人獲獲都衰o個味, 又唔知點
解咁鍾意衰o個味, 而你諗起你玩過o既單機Game, 發覺連NPC都醒過你隔離o個個9貫,
你可能都會無名火起, 如果真人o係隔離都車巴佢o個種。
其實我認為FEZ個人技巧非最重要, 量你再勁都唔可以1挑50, 所以你個人技巧完美又如何呢？
合作！合作先係最重要, 打o個陣唔好淨係睇自己, 望下你D隊友！
有句(我自創o既)格言我幾鍾意, 別人有破綻之時, 就係你上位o既時候！
別人, 唔係淨指你敵人, 仲有你o既隊友, 當你見到你隊友比人SM緊,
唔通咁唔係代表, SM緊你隊友o既人有個極大破綻咩？(一般而論, 實際上人多更複雜)
所以睇日本FEZ片, 你會好驚訝發現, 點解兩隊人行咁埋都可以無人出手？！
因為佢地知道一樣野, 當你出手之時, 亦係你破綻最大之時。
同埋, 所謂o既「戰埸意識」係要時間去累積
呢場呢招用得著, 可能下埸就係致命傷
所以各位除左要比D耐心自己同其他人之外, 亦唔好太執著同一種方式
帶住一顆開放o既心, 先可以學得更多, 發現更多
祝香港FEZ愈來愈好玩
[ 本帖最後由 abyss891025 於 09-12-23 07:53 PM 編輯 ] |
發表於 09-12-23 07:18 PM
發表於 09-12-23 07:25 PM
