男 家 反 對 上 岸 撻 Q 貪 錢 周 麗 淇 榨 乾 紗 廠 闊 少

mr_tik

自從去年姣佘出手搶霉穎，輸家 Niki周麗淇避走大陸搵銀，感情似冇着落，原來係收埋瘟仔，與富豪仔暗交 1年多。
Niki新歡名叫 Eric卓，為毛紗廠太子爺，上週四（ 4日）更被本刊獨家拍得二人同車私會，再直上 Niki曼克頓山 1號香閨。據知急住嫁人上岸的 Niki，卻未得未來奶奶歡心，更被男方家長認定貪慕虛榮。 Niki想升呢做卓太，隨時撻 Q。


30歲中女周麗淇 Niki，對溝紡織界筍盤甚有計仔， 06年就曾與莫少聰外甥、老豆為紡織業商家嘅 Jordan Wong傳緋聞；今次新歡 Eric，其家人亦同紡織有關，卓家為金徽毛紗廠老闆，主要出口毛紗到韓國，除咗喺葵涌總部外，更在東莞設有廠房，卓家更住在西貢碧濤花園價值 3千萬獨立屋。

家姐搭路
Niki今次搵到筍盤，全賴家姐周汶錡 Kathy幫手。據知經常同富豪食飯嘅 Kathy，亦認識不少闊少，而 Niki被霉穎飛甩後， Kathy急忙為妹妹搵「碼頭」，不時帶佢出席飯局。據知情者透露：「年幾前 Kathy同朋友食飯帶埋 Niki，佢就喺嗰日識到 Eric喇。 Niki知 Eric嗒佢糖，即刻搶攻啦，好快佢哋就拍拖！」 Niki主動出擊，三兩下手勢已經姣掂 Eric，上年二月正式拍拖。

雖然父母極力阻止，不過 Eric對 Niki死心塌地，更因此同家人嘈交，只可惜貴為紗廠太子嘅 Eric，現時幫手打理家族生意，但實質揸手嘅物業同工廠股份都冇，就連溝女戰車 SLK 350都屬父母公司名下。本週一（ 8日） Eric離開公司，對同 Niki戀情就甜笑不作回應。

F：《 FACE》　 E： Eric
F：係咪同 Niki拍拖呀？
E：唔係！唔係！（甜笑）我哋係好朋友啫！
F：係咪好事近？
E：未！未！
對於 Eric同 Niki拍拖，卓家兩老口徑一致，見到 Niki張相都話唔識：「邊個嚟 o架？唔識喎（介唔介意佢同 Eric一齊？）出心做朋友一定唔抗拒。」
至於 Niki所屬的 BMA唱片公司董事總經理 Raymond則話：「我冇聽過 Niki話要結婚，佢啱啱先同公司續咗約，遲啲會出碟，鶽家手頭上仲傾好咗幾個廣告代言添！（係咪同闊少拍拖？）藝人私人嘢，我哋唔理！」

低調富豪
Eric父親卓仕章為金徽毛紗貿易有限公司老闆， 1986年創業，喺東莞有幢三層高嘅毛紗廠，香港辦公室喺葵涌，市值 220萬，而卓家 4口就住喺市值 3,000萬的西貢碧濤花園，亦有幾部靚車，除咗 Eric揸嘅 SLK350，更有 E350同埋令 Niki流晒口水嘅波子，絕對係低調富豪。