本帖最後由 jeffrey1025 於 13-4-25 11:24 AM 編輯
我係咩人我諗無謂再自我介紹, 簽名有寫, 眼見港服就黎玩完, 總結下回憶日後有時間囉番出黎睇下都唔錯 
由公測一開始就玩呢隻遊戲, 直到今時今日, 都差唔多有五年時間, 最令我深刻絕對係留係Myth的呢三年
係自我回憶之前同大家介紹下呢三年黎一路支持我的幾位好拍擋, 冇佢地的支援我係冇可能帶到My行到今日呢一步
就好似大家對我平日的想像一樣, 我呢個團長, 好火爆, 只要有人敢講My壞話, 下一秒你就會見到我已經出聲吊鬼, 吹雞團戰, 開波, 發炮
有人話我係一個有感染力的團長, 但其實我呢個團長又火爆做事仲有小小"拿西"
My冇敗係我手上, 除左一班手足支持, 仲多得幾位好拍擋
傻乂siu肥 : My另一位團長 (其實My後期係行雙團長制), 佢同我的合作無間, 大家只要兩三隻字就已經明大家想點樣, 立即有哂行動, 兩個人指揮同一個人指揮冇分別, 係好多團隊事務, 重要決定上邊, 有小肥的意見每次都令成件事更加完美
My咁多位手足都好清楚, 兩個團長, 一個火爆強硬, 一個穩重, 兩者互相平衡, 小肥呢個識左五年的好拍擋, 係我FEZ最大得著
幻影乂月 : My戰士團的槍頭, 由街場都團戰, 每一戰我地每一次沖擊呀月都會走係最前, 每次My攻勢一出, 我就會叫: 呀月, 做野! 下一秒呀月就會一路帶住全團戰士入陣
狂獅Zero : 直頭係My守護神, 全團擴召由佢負責, 有佢在場我冇擔心過輸擴召, My係二十人集合的時候, 我分俾佢幾多水工? 兩個  My五十人同場, 我分俾狂獅幾多水工? 唔好意思都係兩個, 三個就已經係俾到盡, 但就算係咁, 狂獅依然可以大大聲同我講: 閒雲你專心帶, 擴召冇問題! 事實上狂獅冇令我失望過
秋月x恆 : 人在美國, 上的時間同另外三位拍擋比起上黎當然比較少, 不過秋月每次都可以令到暴走中的我冷靜落黎, 因為有秋月的做少左好多錯誤決定, My咁穩定秋月絕對係原因
仲有我的女秘書, 為左我的秘書人身安全我決定唔爆名, 不過有個女秘書唔係講笑, 有人幫我汁頭汁尾真係好輕鬆,
同埋都幾爽 
當然唔少得呢三年黎一直跟住我一路走落去的咁多位手足 ( 點名多謝呢樣FB gp做左呢度就咪搞啦, 已經好字海唔好再增加字數 )
唔好話令My打出名堂, 冇你地一路支持我連團長呢個位都唔會坐得穩
當初入My, 係白夜叫我去, 一開始入去My, 集合唔知有冇五個, 最初入去係本住陪朋友玩就算的心態入去
點解到最後變左係我搞團, 團長變左係我做, 好老實我都唔太記得
唯一記得就係同一班My友點樣一齊令My由一個集合吹哂雞都唔知有冇五個的細團, 變做團戰吹雞五十隻
呢三年黎同無數的團對戰過
最初約戰V團, 完敗連輸三場, 因為咁個一期全團接近負士氣, 仲記得個陣我地一班副隊, 約出黎食飯, 仲好認認真真傾過, 係全團冇哂士氣情況下, 到底仲支唔支持落去
如果冇大家支持, 我當時應該已經放棄左
(禁止任何BL幻想, 多謝合作 )
結果大家唔服氣, 決定苦練, 一練就係四個月, 係呢四個月, 中間每一場打完, 全團人都會一齊去檢討, 團練係個陣時直頭係話黎就黎, 一搞就齊人, 上至團長下至新入的團員, 當時冇一個會同你講"唔得閒", "唔想團訓", 想打國戰" 等等, 只要一聽到有人召集特訓, 就立即出現
四個月後, 終於係溫古, 嬴頭一場, 仲記得係最後一刻, 見到"勝利"呢個介面彈出黎個一下, 成個RC同時爆咪個陣, 其實都幾熱血
同V團大戰過後, 我地另一個, 同樣係對戰得最耐的對手, 櫻焰赤龍
My同櫻龍的關係, 係對手同時都係朋友, 兩團人大戰過, 同樣都一齊團聚過, 最多人個次就係平安夜My+櫻龍接近30人係我屋企打邊爐, 之後上天台一齊吹水, 30幾個一齊係我屋企過平安夜我咁大個仔真係頭一次
兩團關係真係非常好, 好到直頭唔少唔知情人士以為My同櫻龍係同一團人, 呢個問題同樣都有唔少人問過我: 到底My同櫻龍係咪同一班人? 多數我同追風聽到之後都會笑而不語
My戰力進步得最快同樣都係同櫻龍認識個一年, 呢一年主要團戰都係同櫻龍打, 打完之後, 兩邊都會一齊交流, 一齊同對方講番有咩野位可以打得更好
個陣同櫻龍團戰, 我諗一星期都至少見佢地三四日, 以前My集合係每日都有集合, 基本上當時同櫻龍可以每星期都打到十場以上, 每一場大家都係搏哂老命咁去打, 當時我一星期到就要入點買一次石
係個一排, 入場講得最順口, 講得最多就係: 對面櫻龍! 全部認真打! Are you ready guys!
櫻龍同My個陣都係戰士陣, 平日對戰個陣條主線係幾十隻戰士對撞, 係個陣時My打櫻龍的場, 你打個sea可以見到入邊有70幾80隻戰士, 遊俠? sorry, 其實櫻龍除左月風, My除左小黑, 差唔多冇遊俠
個陣時的My, 大家一條心, 由最初打櫻龍十場輸足十場, 去到最後大家五五波, 除左My咁多副隊唔怕辛苦, 大家同我一樣放完工放完學集合完, 係深夜仲要聚埋一齊傾足兩三個鐘有咩可以改, 成個戰士陣點樣可以打得更好, 仲有咁多位團員俾心機落個團, 就算最初輸多嬴少士氣依然係咁高, 一路約戰櫻龍
同樣因為櫻龍的朋友無私咁同我地交流, 就算係對手都好俾心機去同我地一齊檢討, 一齊特訓
My由最初五人細團去到團戰有五十人的團, 唔係只係我地呢班團長, 副隊, 全部團員, 同埋我地的好對手, 其實出左唔少力
係FEZ呢五年, 最大得著就當然係識到一班好手足, 大家由最初話題黎黎去去都係FEZ, 去到今時今日, 大家出黎傾計, 大家出黎聚的時候係講心事, 一班人係我屋企天台一路飲野一路傾計
大家係My呢三年一齊令My好多野由冇變有, 呢一路上都係大家一路陪我行出黎
冇你地我呢個團長唔係團長, My都唔會係今時今日呢個My
講指揮能力, 我比唔上無哂影等等老牌團長
講團隊戰力, My比唔上C團, SA, 鳥合
但係講團結, My咁多手足同我係絕對有信心講一聲: 我地係最團結
仲有一班一直支持我地的兄弟手足
係FB起底事件入邊, 其實真係令我好warm, 講真, 俾雷神搵到我幾張profile相真係好小事
但當時大家比我本人更加緊張, 仲記得個晚我食完藥好早訓, 無啦啦又電話又wtsapp好緊張咁叫我上rc
上到去我都未問清楚咩事就睇住大家好緊張咁搵個個其實唔存在的"出賣閒雲FB的25仔"
睇住大家比我更加緊張, 我個刻真係好warm, 仲要大家一個接一個咁黎陪我安慰我 (但其實我根本冇擔心過, 你地太多心  )
到最後發現原來只係我profile pic一直都係public根本乜人都囉到相, 真係辛苦大家為我咁擔心
最後當然想係呢度多謝My咁多手足, 我呢個團長, 其實好"拿西"
多得小肥呢個好拍擋, 我呢個"拿西"團長先唔會撞板
另外多謝咁多位團員, 手足, 無論係一直跟住我的手足, 定係後期加入的兄弟, 你地係My無數次低潮入邊都冇離開到, 依然支持我行落去, 冇你地又點會有My?
同時辛苦哂我咁多位女秘書, 平日集合有番個女秘書幫我汁頭汁尾又真係舒服好鬼多  搞到後期收新人, 開隊組人等等原本我自己做開的都依賴哂一班女秘書
其實到左今日都唔怕同大家講, My其實俾我收收埋埋好多女仔, 不過佢地都係我D秘書黎, 冇大家份, 死心啦 
至於非My朋友, 不妨可以係度講下大家對My有乜野感覺
以下有幾位要特別感謝
櫻龍的追風, 夜神, 魔魔等等幫過My唔少的友團朋友
當然唔少得, 我地綠國的GM初音, 你為左FEZ有幾辛苦我地有眼睇有眼見架
音音我都唔怕老實講, My好多時搏哂老命吹齊雞去做活動都係俾面你先會出動 :donno:
不過, 港服消失都好, My同埋My精神依然存在, 大家依然聚埋一齊, 我地堅決每個月都會團聚, 一齊出黎見面, 一齊玩一齊笑一齊喊 (so gay :donno: )
黎緊My會係日服再戰, 咁多年黎我地堅持用戰士團去作戰, 就等日本人見識下My戰士團
我地戰士團的堅持, 熱血絕對唔輸俾任何人
My戰士們! Are you Ready Guys?
Lets Party!! |
發表於 13-4-24 10:32 AM
發表於 13-4-29 10:24 PM
(逃
