不打‧短評75：古文明救兵 (有內容)

港產不打

不打評價：長者早場 $28

不打總評：佐治古尼眼高手低之作，悶到hi hi，爛到仆X

佐治古尼自資自編自導自演之作
對我黎講，佢既演繹係實力既保證
前作【引力邊緣】戲份少但非常搶，演活遇事鎮定又可以操控大局既隊長又不失自信幽默
【繼承大丈夫】更對戴綠帽既中年男士有深層次多角度既演繹
不過演而優則導，唔代表一定有料到
前作【選戰風雲】坦白講悶到hi hi
今次【古文明救兵】一樣，粒粒星撐場，但同樣悶到趕客離場

錯明顯不在演員，觀乎有戲之人細膩演技互拼，其實交足功課
只係佐治古尼藝不高、人膽大，妄想用動作片既包裝去掩飾文藝片既真相
又嘗試用記錄片既視野去呈現幽默喜劇效果
忠於史實既情況下，角色分散，劇情鬆散，故事無甚起伏，喜劇效果多餘無聊
完全錯晒！完全催眠！非常吃力不討好！
其實呢段二戰保護歷史文物藝術品既經過只適合出小說
根本唔適合拍電影，完全無電影感可言

佐治古尼有heart表揚當時呢班由英美歷史學家、考古學者及博物館人員組成既部隊
為歷史文物藝術品甘願犧牲既情操，為人類挽回珍貴文化遺產既貢獻
但用兩個鐘、7,000萬美金去拍一部文藝片偽商業片，會唔會有d一廂情願？！
不如用真實人物採訪加歷史片段再配現代舊地重遊拍一系列紀錄特輯，放係電視播
反而仲有感染力和真實感，觀眾亦會更多

有人話套戲有深度，我糾正，應該話套戲有信息
套戲拍得淺白露骨，最後仲加一幕畫蛇添足，佐治古尼既匯報
講埋出口，為歷史文物藝術品甘願犧牲，文化遺產vs人命既價值

深度，從來應該由觀眾自我領悟感受
深度，從來應該有多層次多角度既傳釋
講到出口，係交代，係一種通知
正如你唔會覺得政府新聞署既通告有深度掛？！

Youtube：港產不打
Facebook：港產
Weibo：港產不打_微博
************************
港產不打
全職非牟利網絡打手
100%支持本地製作
乜戲都打，淨係唔打港產
************************