不打‧短評92：逆權大狀 (有內容)

港產不打

不打評價：Imax價 $90

不打總評：表面係法庭戲，實則係學運電影，義正詞嚴，發人深省！

韓國史上第9部超過1,000萬人次入場觀看的本土電影
描述一個為錢放下尊嚴有法官唔做，去做不動產登記既平民律師
因為甚有交情既食肆老闆娘個仔突然失蹤，追查下發現被軍隊以國家安全法為由逮捕
學運領袖被嚴刑逼供屈打成招，被逼自認為北韓共產黨間諜
係軍事獨裁既政權下，法官、傳媒、司法界皆被政府操縱既情況下
平民律師為公義、為良知，義無反顧為學生伸冤，堅持學生無罪抗辯到底
具說服力既係，故事以八十年代真人真事，發生係釜山既釜林事件改篇
更具說服力既係，故事主角原來就是二十年後成為韓國史上第一個平民總統的盧武鉉

夠膽又夠份量去演呢個角色既宋康昊冇令大家失望
演技精湛，頭半部輕鬆笑得，中段猶豫掙扎又得，尾段大義凜然義正詞嚴仲得
法庭戲其實好靠角色既演繹撐住，成也演技，敗也演技
呢套除左主角好戲外，飾演學生既任時元，演活學運領袖既堅持及被虐者既徬徨無助
飾演軍官既郭度沅，演活暴政下助紂為虐既軍人，以國家安全為由殺人放火乜都做得
霸氣內儉，眼神凶悍，堂上作供時和主角撞出火花，引爆連場戲味

韓國電影一向節奏較慢，呢套一樣，其實好多場口都可以剪得tight D
同為法庭電影，上年韓國神作【戇爸的禮物】笑中有淚，老少咸宜，係好睇少少
呢套論電影技巧其實中規中矩，但佢表達既電影信息遠比套戲本身更具價值

7月1日剛剛過去，幾十萬人遊行又話係九萬
七十幾萬人公投又話係冇代表性，689票難道又有嗎？！
遊行、拉布、圍立法會、佔中，我地乜都試過
但新界東北方案依舊眾目睽睽下強行通過
唔想香港未來變成呢套戲咁、軍政主導、黑色恐怖、唔想警權越來越大
值得入場睇下呢套戲，定有唔同既體會及啟發
亦對站出來公民抗命既朋友，多一份肯定，多一份認同

戲裡名句：「為了讓我的孩子們，不會活在一個荒唐的世界！」
家長們，醒吧！別要孩子孤軍作戰！

Youtube：港產不打
Facebook：港產
Weibo：港產不打_微博
************************
港產不打
全職非牟利網絡打手
100%支持本地製作
乜戲都打，淨係唔打港產
************************