爐石戰記趣味卡牌介紹(一至九)

harveyin

Hello大家好，今次同大家介紹既係一副控場力比較高既牌組－元素賊。因為要利用親王而放棄左剔骨等比較實用既解場牌，所以就投入返元素方面既Combo同埋前期利用海賊既快速鋪場來加強返控場能力。

基本Combo
螢火 / 唬爛海賊 / 凱雷希斯親王 + 暗影閃現
利用暗影閃現回收低費優質戰吼，同時可以配合連擊使用，更可以作為制作巨人范克里夫既基礎，暗影閃現係盜賊Deck入面根本係神卡。

元素Combo
睇個名都知就係最簡單既元素利用，基本上呢副卡組需要用到呢個Combo既只有召焰者，因此只要記得留得一張低費既元素配合召焰者就可以（螢火最佳）。

牌組介紹

單卡分析
螢火係非常好用既一張前期卡，特別係面對住需要鋪場或者打快攻既Deck，一般對面想要係初期處理螢火都需要打2次，咁樣可以有效拖延對方既節奏，而且螢火唔似海盜或者魚人有天敵既存在，而呢副牌組係玩元素體系，螢火係最為理想既發動機，螢火買一送一，除左可以令元素既Combo容易成功，更加可以輕易觸發連擊效果，所以螢火係目前最好既前期選擇。

係兇惡幼雛同船長之間放棄左船長，雖然船長在場時配合海盜既效果非常之強，但係呢副牌組入面海盜只係單純前期鋪場作用，打到後期船長就只會單純係一隻3/3/3既白板，單計呢一方面，兇惡幼雛就強好多，兇惡幼雛有能力改變戰局。

如果你玩得夠耐，你一定會試過抽牌唔順既情況，前面抽成堆高費用牌，後期又無手牌可用，前期抽成堆高費牌就無咩好方法可以解決，但係後期無牌可用就可以避免，盜賊既抽牌卡入面疾跑所需費用太高，高到並唔適合拎出來用，而類似既抽牌亦欠奉，因為呢個牌組既後期生物都尚算優質，所以就選用擬態莢果，來補足一下手牌。

火羽鳳凰同召焰者係類似既牌所以放係一齊介紹，火羽鳳凰可以好靈活咁造成2點傷害，可以當成一個高費用少少版本既軍情七處密探，係盜賊呢一種比較靈活既體系入面算係比較適合既，直接造成傷害可以避免差少少傷害而無法斬殺既尷尬。呢副牌一共有八隻啟動用既元素，所以加入左召焰者，召焰者既傷害相當於一張法師既傳送門，如果法師既傳送門可以召到召焰者呢種體質就真係不得了，元素體系支撐住親王賊既傷害，強化左終於遊戲既能力。

小編小建議
基本上所有親王賊都係一樣，起手有親王必留，能夠親王加暗閃基本上就贏大半。低費由海盜來搶節奏，元素Combo穩定場面，雖呢套牌有唔少低費牌，但因為無咩抽牌片，所以要注意敵人既套牌類型，避面被一次清場， 由於水晶線尚算平滑，所以順住咁落牌就可以營造到一定既優勢。

harveyin

爐石趣味卡牌介紹(二) 王禍賊

今日要同大家分享既係一副比較新既DECK，叫做王禍賊，顧名思義，呢副DECK既核心就係最近追加既傳說武器<<王禍>>，係我既心目中，盜賊係應該用自己手中既匕首，輕鬆解決敵人，而係王禍呢把武器出來之前，盜賊可以用既武器實在有限，作用亦只係用來解下場，但係亦要冒住自己扣大量血既風險，但係今時唔同往日啦，王禍呢把武器既出現，令到我既夢想終於可以實現。

牌組運作基礎
起手有王禍就留王禍，起手無王禍就優先留洞穴亮亮搜尋者，有王禍或者洞穴亮亮搜尋者係手就盡量留有強化武器效果既法術係手，冒求以最快既速度強化到王禍成為一把神器！
前期如果有辦法強化王禍就強化王禍，無辦法就盡量想辦法抽牌，早期而可以諗下辦法用連擊同低費卡造出一隻大型范克里夫，法多雷蛛行者係非常優質既新卡，配合呢副一有加基森拍賣師就可以不斷抽牌既牌組，可以瞬間鋪滿一台4/4生物，精靈說唱人既連擊效果可以令加基森拍賣師準時上手既機會大大提高！如果大家以前有用過奇蹟賊既話，相信會對呢種運作模式非常得心應手！

牌組介紹

單卡分析
呢副牌組既核心，無佢就無呢副牌組，王禍呢張卡非常優秀，一般情況之下，呢張卡係呢副牌組最後會變成一把5攻有吸血同致命劇毒既可怕神武，而且呢把武器係耐久值無晒之後仲會返入你既牌組入面，變相係一般情況都唔會因為無牌而扣血，呢副牌組因為抽牌速度會幾快，所以好快就會變成王禍無限Loop既情況，完成型既王禍應該係後期算係比較無敵既存在。當然王禍唔係完全無辦法被處理，王禍非常怕被爆牌直接送落墓，又或者比術士除外。因此如果知道對面係玩爆牌既就要小心Ｄ啦。

法多雷蛛行者係新卡入面亦係一張非常優質既好牌，佢既能力再配合上呢一副抽牌速度唔錯既牌組，可以令自己既場面好容易就會有一堆蜘蛛佔據場優。4攻既體質亦令牧師呢種解場能手相對頭痛。

精靈說唱人既連擊效果係呢副牌組入面好有用，因為呢副牌組入面生物既數量唔算多，因此無論抽出邊兩個手下基本上都係令呢副組牌既核心運作得更順暢，拎到加基森就可以令神武快速成型，拎到蛛行者就可以拎場優，拎到洞穴亮亮搜尋者就可以王禍上手，拎到軍情七處就可以解場，即係拎到咩都有好處。

小編小建議
呢副牌組最近係天梯出現既次數都開始增加，實際上亦係一副好有潛力既牌組，基本上呢副牌組有好多卡都有可取代性，例如毒化武器同吸血毒藥，都唔係必需既卡，基本上只要有一把常駐五攻既武器都已經好可怕，可以換入血法師薩爾諾斯同埋暗影之刃來強化解場能力。而可以因應自己既喜好，調整成為一副自己得心應手既王禍賊。

harveyin

爐石趣味卡牌介紹(三) 號召戰

今次要同大家分享既係一個新System為核心既牌組，一般稱呼為號召戰，號召係啱啱係呢個新版本加入既新型特技，號召係指隨機召喚自己牌組入面既手下，由於普通牌組使用號召既隨機性太大，號召出來既手下如係低費既怪就有點兒浪費，所以呢副號召戰，係完全無低費手下，而且高費手下全部都係優質既手下，務求每隻號召出來既手下都係物有所值，可以一舉逆轉場局又或者令對手難以處理。

牌組運作基礎
起手有大怪就換走大怪，最好起手就係一隻手下都無，前期主要係不斷咁疊盾，如果對方鋪場就利用旋風斬加沉魚落堰或者鬥毆清場來控制返個局面，只要成功號召到，就開始可以控制到戰局，因為號召出來既手下全部都係強效生物，當然成功號召到亞煞拉懼就最賺，而「龍王」死亡之翼既死亡之聲可以一次過召晒手上所有龍類手下出場亦係好強的絕殺，因為呢副牌得9隻手下，而其中有5隻都係龍類，對手見到龍王都需要考慮到底殺唔殺佢好。而用來號召手下既分別係6費既集結隊伍同8費既破怨斧，如果怕自己黑仔抽唔到既，起手可以留底一張確保自己可以準時號召！

牌組介紹
單卡分析


既然叫得號召戰，呢兩張牌當然就係核心，號召即係召喚自己牌組入面一個隨機手下，就咁理解似乎唔係非常強大既效果，通過將牌組修改成只有優質強大既手下，就會成為強大既特技，破怨斧仲可以最多號召3次，又可以打人，簡單係神兵利器。

地塑師伊普係今次新版增加既新戰士傳屬傳說手下，佢本身個能力好似唔係好勁，但當放係呢一副大部分卡都係用來疊盾既Deck之後就有相像以上既威力，由於低費放既全部都係疊盾同解場牌，因此正常來講盾值應該有返咁上下，佢召喚出一隻最高係10費既手下，如果佢同亞煞拉懼一齊出場，咁你每次end turn都會多2隻強大既手下，對手見到都咪話唔頭痕。

呢張強大既傳說手下相信大家都見慣見熟，每回合結束可以係牌組召喚一隻手下，而牌組入面全部都係高費優質手下，即係無論召喚到邊一隻都係賺賺賺！
如果第一隻號召出來既手下就係佢，就勝算大增啦！

龍王之前比較少出現，就算係玩亞煞拉懼既牌組都好少會用佢，因為佢個效果用唔到就只係一隻高費白板生物，而今次特別提到佢係因為新版本出左一隻高費既優質龍類<<愛睏龍>>，再加上呢副牌組放埋普通版既死亡之翼同伊瑟拉，龍類就有5種，如果對手隨便就殺死龍王既話，有可能會變成更多龍飛出來幫龍王報仇。

小編閒談
呢副牌組係打中後期既，所以前期需要盡量令到自己可以疊比較多既盾同埋用解場牌處理對手既佈陣，同牧師不斷特召自己牌組同墓地既優質怪算係有異曲同工之妙，雖然威力上可能無牧師咁穩定強大，但總算係為戰士打開另一條道路，希望係未來各界高手既調整之下，會打出一片天。

harveyin

爐石趣味卡牌介紹(四) 任務德


相信如果唔係新手既話，大家應該都對任務唔會陌生，回望當初紅極一時既任務賊，令人頭痕既任務戰，又或者到今時今日都仲會出現係賽場既任務法，我地唔難發現當初除左以上提及既三個職業之外既任務都比較冷間，而我今日要介紹比大家既就係當初極為冷門既任務德，而點解當初任務德會冷門係因為呢一個任務係當時既環境比較難以快速完成，所以大部份人試左幾次都放棄左，但係由於今個版本出左同任務德相性好好既牌，所以我今日就係呢度同大家分享。
牌組運作基礎
起手一定會抽到任務，而當然唔需要講任務係必定會留底，而其他牌最好就係用來跳費既牌（野性成生或翠玉之花），有辦法出受詛咒的信徒就盡量出，可以用無面操縱者複製受詛咒的信徒去加快完成任務既速度，由於牌組入面4費或以下就只有受詛咒的信徒，因此用橡木之喚叫出來既一定係受詛咒信徒，所以前期抽到橡木之喚就即管用，總之就想辦法有咁快得咁快去完成任務，完成任務之後召喚巴納伯斯可以令牌組入面所有手下變成0費，之後就可以獲得巨大既優勢。
牌組介紹

單卡分析


叫得做任務德，任務當然就係核心，完成任務既條件召喚5隻攻擊力5以上既手下，睇落去唔難，但其實以前往往都要比較後期既時間先可以完成到，而完成得太慢就好容易比快攻或者中速既牌組霸凌。不過呢副版組就可以令任務完成速度比以前快得多，而完成後既獎勵巴納伯斯就係最關鍵既核心，令到牌組入面所有手下費用變成0，令一回殺變得可行同輕鬆。
受詛咒的信徒係新版本加入既中立手下，本身係5攻，死左之後又可以召一隻5攻手下，亦因為呢一張手下同任務德相性非常之好，要快速完成任務，呢張牌必不可少，基本上有辦法打出佢就盡快打出佢，能夠自殺而唔會浪費就即管自殺，務求最快完成任務。

橡木之喚亦係新加入既德魯伊專屬牌，係任務完成之前，佢係用來快速召喚受詛咒的信徒，而完成任務之後，佢就變成可以任務號召一隻手下。而呢副牌組入面既手下數量唔多，因此會召到咩手下其實真係有數得計，為Combo開路。

真菌領主係德魯伊既新傳說手下，佢既能力乍看之下好似唔係好強，但實際上佢係呢一副牌組入面相當重要，呢副牌組既靈魂Combo就係，完成任務之後，所有手下變０費，然後召喚真菌領主，再召喚瑪里苟斯，再召喚無面操縱者複製瑪里句斯，咁樣就即係+20法術傷害，一發月光術可以造成21點傷害，一張揮擊幾乎可以毀天滅地，呢個組合帶來既快感非三言兩語可以解釋到。

坑道蠕蟲都係一張新加入既中立手下，佢既效果非常容易觸發，因此佢算係一張低費既5攻擊力手下，用來加快完成任務可謂功不可抹，而即係唔係用响呢一段組牌，呢一張手下既性能都相當優質，算係一張比較百搭既牌。

小編閒談
呢副牌組係主要打一回殺，完成任務之後，除左用法術一回擊殺之外，亦可以瞬間將場面鋪滿，令到對方無辦法應對。今次介紹既任務德未必係好強力既牌組，但係會係一副娛樂性唔錯既牌組，亦希望今次既分享係拋磚引玉，可以令到更多人去開發唔同冷門職業任務既可能性，為舊牌打開新既出路。

harveyin

爐石趣味卡牌介紹(五) 法術獵

今次要同大家分享既係法術獵，呢副牌組最特別既地方就係牌組入面完全無任何一隻手下，所有既手下都係靠法術或者變身成為死騎之後用天生技合成，亦因為如此，幾乎可以完全避免所有條件係敵方召喚手下既秘密，呢副牌組既玩法相對簡單，而且所需要既粉塵相當低廉，雖然唔算係強勢既牌組，但亦有其趣味性同潛力所在，希望日後有更多既人可以享受固中既樂趣。

牌組運作基礎
起手可以留弱效翡翠法術石同埋秘密，盡量令到弱效翡翠法術石升級到最高級，而秘密亦可以同時配合到鷹角弓既充能效果，各種解場法術，配合特召手下既法術，同平時既獵人玩法一樣，都係不斷打頭，務求用最快既方法獲得勝利，由於有各種唔同既解場法術，所以應對性亦都相對靈法，比較少出現被壓制既情況。

牌組介紹

單卡分析

洛克德拉爾係新版本加入既獵人專屬傳說武器，而同時亦都係呢一副法術獵既核心牌，由於呢副牌組本身就無放任何手下，所以唔存在發動時機呢樣野，當抽到呢張牌時，就唔好考慮咁多，盡量將手上既牌全部交出去，務求用呢張牌既能夠賺到盡，拎到最多既法術。

弱效翡翠法術石係新版新加入既獵人專屬法術，當呢張牌係手上既時候，只要打出一張秘密就可以升級，再打出多一張秘密就可以升到最高級，變成一次過召喚四隻3/3既狼，算係好強大既鋪場牌，如果對手無群體清場牌，咁就會好容易進入斬殺線，而且呢副牌組本身有好多解場法術，所以對手想用嘲諷去抵擋進攻係無咩用既。

鷹角弓相信大家都唔會陌生，一張最古早既獵人武器，由於呢副牌組想配合弱效翡翠法術石呢一張牌，所以呢副牌組都放左唔少秘密，而秘密同鷹角弓既相性相信大家都好清楚，只要配合得好，就可以變成一把能夠打好多次既神兵利器。

來我身邊！亦都係新版新加入既獵人專屬法術，其實就係介乎於動物夥伴同埋野性呼喚之間既牌，一樣都係只能夠召喚胡佛、米莎同埋里奧克三種動物夥伴，而呢一張就係一次過隨機召喚三隻動物野伴入面既其中兩隻，可能有人會好奇咁點解唔用野性呼喚呢？其實好簡單，因為獵人都係偏打快攻，而9費既野性呼喚實在偏慢，而且越早抽到洛克德拉爾越好，當抽到洛克德拉爾時手上能夠盡快清空係最理想，所以太高費既法術就唔考慮。

小編閒談
法術獵雖然曾經有好多人嘗試過，但由於新版本有更多利害既牌組，所以大家好快就轉投左其他牌組既懷抱，但其實法術獵並唔係完全無競爭力，因為已經有高手用法術獵打上排名既高位，打牌當然就係想贏，但如果只敢用Meta牌組去玩就未免太無聊啦，希望法術獵可以令大家得到樂趣。

harveyin

爐石趣味卡牌介紹(六) 打頭薩


打頭薩大家應該都見過唔少，但係今日介紹既呢一副就同一般既打頭薩有啲分別，一般既打頭薩都係偏向大量小怪鋪場，然後用嗜血術一波爆發打爆人地個頭，而今次介紹既呢一副打頭薩雖然都係一波打爆人地個頭，但係就唔係用人海戰術，而係類似心火牧既一拳超人咁，係用Buff去加強手下令到佢擁有打爆敵人個頭既威力。當見到一隻超高攻既手下打中人地個頭個時出現個下重擊特效其實都幾爽架。希望大家會鍾意呢副牌組。

牌組運作基礎
起手可以留大漩渦傳送門同末日預言者，用來應付對方既前期鋪場，基本上覆焰無面者同土元素如果可以準時出場，就可以比到對面一定既壓力，特別係土元素，由於具有嘲諷，所以土元素出場之後就可以直接出護光者，如果對手唔了解呢副牌組係玩咩既話，咁我地就可以比較容易做到我地想做既Combo，亦都係呢副牌組既必殺組合技，護光者配上大怪再加埋治癒之雨，令到護光變成可怕既高攻手下，一拳打到對手個頭都爆開。

牌組介紹

單卡分析


呢兩張牌放係一齊講係因為佢地就係呢副牌組既王牌組合技，護光者既效果係每當一個角色受到治療，就可以令自己+2攻擊力，而治癒之雨既效果係最多可以為友方所有角色回復12點生命，而回復既方法係同火雨爆發一樣每1點咁樣做，亦即係話最多可以觸發12次護光者既效果，變成+24攻擊力，咁當然，就算唔使成功+24攻擊力，只要令到護光者既攻擊力上升到15以上，配合上風怒，一般既情況下就等於直接斬殺。

先祖之魂係最初版本就存在至今既經典卡，佢既作用主要係用來放係大型手下身上，令到對手需要用更多既牌先可以處理，一般情況下用係土元素身上就最為理想，當然就算放係覆焰無面者都係唔差，又或者你怕對手太容易處理護光者，想令護光者可以比較大機會可以生存到自己回合，亦可以選擇放係護光者身上。

炸雞勇者呢張卡大家一定唔會陌生，雖然曾經被削弱過，但係佢依然係一張非常唔錯既收尾牌，當對手處理一個低血量狀態既時候，炸雞勇者就係一張非常具有威脅性既牌，由於一般都係用來收尾，所以佢既副作用召喚兩隻1/1幼龍比對手基本上係可以無視，之所以會加入呢張牌既原因係怕對手了解呢副牌組既必殺技，完全唔比機會護光者留係場上，到時候就只能夠靠其他高攻手下同埋炸雞勇者去打爆人地個頭，炸雞勇者加上石化武器同埋風怒既斬殺線都幾高，可以令對手難以提防。

小編閒談
打頭薩有好多種，但唔係每一種都會令人覺得有樂趣，勝負固定會影響心情，但係用有趣既組合技獲勝會令人更加滿足，希望呢副牌組可以令大家得到一啲啓發，發掘出更多有趣既必殺技同組合技，畢竟如果玩遊戲唔開心又點會玩得長呢？

harveyin

爐石趣味卡牌介紹(七) 四騎聖


爐石戰記呢款遊戲要獲得勝利既方法主要就係令對手既生命值歸零，無論係用手下攻擊又或者用爆牌既方法令到對手不斷因為疲勞既失去生命值，最後獲得勝利既原因都係因為對手既生命值歸零，大家又有無諗過有無辦法係可以唔需要理對手既生命值幾多都可以勝利呢？其實係冰封王座呢一個版本既時候，暴雪就已經提供左另一種勝利方法比大家，就係今日介紹既呢一副牌組既核心牌「黯刃騎士」烏瑟既英雄能力，召喚四騎士，當場上集齊四騎士既時候，就可以直接觸發摧毀敵方英雄呢個特殊效果，效果發動個時仲有固定特效添，都幾有趣架。
牌組運作基礎
起手留低費手下，由於呢副牌組有大量抽牌卡，所以要抽到關鍵既牌應該唔會太難，所以關鍵牌無必要一開始就留係手入面，呢副牌組既核心當然就係集結四騎士獲得勝利，但係如果要一隻一隻咁召喚，就太無效率，而且對手都口吾係傻既，又點會比你咁易成功？所以我地既目標就係响自己既回合入面一次過召喚曬四騎士出場，而且的確係可行既，只不過需要一啲條件，條件就係需要己經變身成為「黯刃騎士」烏瑟、有十個水晶而且手上要同時集齊拍賣大師比爾杜加上3個幸運幣或者2個幸運幣加一個秘密。

牌組介紹

單卡分析
「黯刃騎士」烏瑟當然就係呢個牌組既核心，無佢就無呢副牌組，佢出場個時會直接裝備一把有生命竊取既5/3武器，佢既英雄能力係召喚一個四騎士，而當成功集結全部四騎士係場上就可以直接獲得勝利，而都係我地呢副牌組最主要既目的。

水文學家係一張比較汎用既聖騎專屬手下，佢可以發現一個秘密，可以因應當時既需要去選擇唔同既秘密，而無論選擇左咩秘密都好，因為聖騎既秘密都係只需要1費用，所以就算即時無咩大作用都可以留返係手作為我地核心Combo，召喚四騎士時所必要用到既低費法術。

搶刧暴徒係呢副牌組入面一張非常關鍵既牌，能夠用佢既效果成功得到幾張幸運幣係會直接影響呢副牌組既必殺組合技能否成功與否既關鍵所在，一般對手就算唔知你既牌組到底係玩啲乜都好，都會優先處理搶刧暴徒，所以正常來講，係出搶刧暴徒之前，應該先將對手場面清空，例如前一回合放出末日預言者，確保對手要用法術先可以處理到搶刧暴徒，咁先可以確實獲得幸運幣。

拍賣大師比爾杜亦都係呢副牌組既核心牌，因為無佢就無可能一回合召喚齊四騎士，佢既效果係只要施放法術就可以回復英雄能力，利用佢配合幸運或秘密來達成一回合集結四騎士。
四騎士Combo = 先變身成為「黯刃騎士」烏瑟，係擁有十水晶既回合先召喚拍賣大師比爾杜，使用「黯刃騎士」烏瑟既英雄能力隨機召喚一個四騎士，然後使用幸運幣重置英雄能力，再使用英雄能力隨機召喚另外既四騎士，重覆以上步驟直到四騎士集結。

小編閒談
四騎聖係一副娛樂向既牌組，但亦不失威力，因為打出Combo既時候，對方完全無辦法做任何事情，所以只要集齊所需要既牌，就只需等待到自己回合獲得勝利。

harveyin

爐石趣味卡牌介紹(八) 惡魔術

今次要同大家分享既係一副惡魔術，雖然係叫惡魔術，但係真正擁有惡魔種族屬性既手下其實唔多，呢副牌主要係利用新版本加入既新技能號召，去快速咁令到自己獲得場面既優勢，而惡魔則係為最大化利用曼那瑞之顱既效果而落，所以雖然一般叫惡魔術，其實都可以叫橡心術，因為成副牌既核心就係新版本新加入既傳說卡橡心大師！只要能夠利用到橡心大師既效果，就可以令對手大感困擾。

牌組運作基礎
起手主要留低費生物，由於呢副牌組既低費生物都係屬於比較優質，雖然狗頭人圖書管理員同粗鄙的魔胎都有扣玩家生命值既戰吼，但係唔會構成太大既問題，最主要係盡量抽牌令到曼那瑞之顱同埋橡心大師可以準時出場，佔據場面優勢，即使對手能解清理場面，我地仲有死騎古爾丹可以再次令場面鋪滿，又或者可以利用首席門徒琳恩既效果，選擇利用爆人地牌去獲得勝利都不失為一個唔錯既決定。

牌組介紹

單卡分析

橡心大師係呢副牌組既核心，佢既效果最多可以一次過係牌組號召三隻唔同既手下出來，而牌組一早已經為左配合橡心大師既技能，而將可以號召到既手下範圍縮到好細，務求效益最大化，最好就當然係拉到焦油蠕行者、粗鄙的魔胎同埋虛無領主，就算無辦法拉到以上既組合，直接由牌組號召三隻手下都能夠佔到唔少優勢，令對手大感頭痕呀。

虛無領主係新版本加入既術士專屬手下，佢既體質同效果可以令到對手既攻勢完全咁慢落來，當然正常來講呢張牌既費用就相對高左些少，但係係呢副牌組入面我地基本係可以直接無視佢既費用，因為基本上我地只會用橡心大師或者曼那瑞之顱既效果去號召佢出來。

釀菇人呢張牌係新版本加入既中立手下，一般牌組好少會見人放，咁點解呢副牌組會放佢呢，主要係因為呢副牌組既低費手下有兩種都擁有扣玩家生命值既戰吼，而術士既英雄能力亦都係會扣玩家既生命值，所以能夠恢復生命值同時亦可以補上翻4費線空白既釀菇人係非常好既選擇，而且因為釀菇人係4攻，唔會成為橡心大師既對象，所以唔需要擔心會影響到橡心大師召喚出虛無領主既機率。

首席門徒琳恩係新版本加入既術士專屬傳說手下，佢本身既體質並唔優秀，但係佢擁有一個非常有趣既死亡之聲效果，就係將第一封印加入手牌，第一封印既效果就係召喚一隻2/2既手下，再將第二封印加入手牌，如此類推，直到成功將所有封印都用完之後，就會得到「吞噬者」阿薩利，阿薩利既效果就係直接推毀對手既牌庫，即係話可以令對方直接進入疲勞，一般來講，如果成功發動到呢個效果，應該都差不多贏，但係因為使用每個封印都需要5個水晶費用，所以其實都幾難用。

harveyin

爐石趣味卡牌介紹(九) 火球法


法師相信係爐石戰記入面最多人一開始練既職業，皆因法師既基本牌都比較實用，有好多一開始就存在既基本包牌到今時今日都仲係最佳選擇，而今日所介紹既呢一套火球法，亦都用左唔少既基本包牌，所謂既火球法就同大家熟悉既任務法一樣，係靠大法師無限火球Combo去贏取勝利既，但係就換湯唔換藥，雖然最終手段一樣，但係我地唔玩任務，一樣可以做到大法師無限火球呢一個一回殺Combo。

牌組運作基礎
起手有法力龍鰻必留，秘法學家同埋派洛斯都係唔錯既起手。前期主要係防速攻型牌組，所以如果對面係睇起來似打快速既職業，最好留末日預言者來防止被迅殺。而中期抽到幻象分體時就可以開始複製手上既巫士的學徒，當手上有兩張用幻象分體複製出來既巫士的學徒時，就可以打出地脈操縱者去令到巫士的學徒變成0費，咁一回殺Combo既零件就準備好啦。
一回殺Combo：打出手上既安東尼達斯，打出手上既兩張0費巫士的學徒，再打出手上既巫士的學徒同熔火鏡像，或者打出兩張熔火鏡像。

牌組介紹

單卡分析

新版加入既法師專屬手下，就係因為有佢，所以我地終於可以唔需要再靠任務去完成無限火球呢個一回殺Combo，佢係呢副版組入面既作用就係用來將用幻象分體複製出來既巫士的學徒變成0費，從而達成一回殺Combo既可能。而其實呢一張牌既作用並唔單單係可以咁樣配合，可以同佢配合既牌其實仲有唔少，但由於同呢副牌組無關，所以如果有機會再提及既時候會再講。

幻象分體係冰封王座版本時加入既法術牌，佢既作用係用來複製手上消耗費用最低既手下，亦都係呢一副火球法既核心所在，要注意既係如果你手上既全部手下都相同費用既話就會變成隨機複製，所以係用呢張牌之前，要確保除左巫士的學徒之外無其他低費手下。

經典中既經期，第一張既法師傳說手下，亦係由開始到宜家以來最實用既法師傳說手下，火球法之所以叫火球去都係因為佢，只要佢存在係場上既時候，每出一張法術，我地就可以免費得得一張火球術，而火球術係4費法術，所以只要場上有4張巫士的學徒去降低火球術既費用，就可以完成到無限火球一回殺Combo。

新版本所加入既法師專屬傳說武器，強大既效果令到每一個回合結束時都可以抽三張牌，大大加快左法師既抽牌速度，令到核心牌可以快速上手，不過由於有佢既時候抽牌速度太快，所以如果選擇用呢張武器既話，一般都唔會放高費用既牌係牌組入面。

小編閒談
火球法一直以來都有一個強大既地方就係難以提防，唯一怕既就係關鍵牌被爆牌落墓，咁就真係神仙難救，雖然火球術現起上來好似有啲自閉，但係當你完成到個Combo既時候又真係幾爽架，所以大家不妨一齊來做下自閉仔。