呢個acc係特別為分享我箍牙經驗而特別開…
因為疊牙同爆牙既關係，我笑起上黎右邊d牙好似有個窿咁好樣衰，所以咁多年黎我笑都係多數合埋咀笑，露齒笑影相從來只影左邊面。因為怕痛、怕樣衰、怕麻煩種種原因一拖再拖... 箍牙與否一直困擾我多年，consultation都做過3-4次，終於上年下定決心搵左個有信心既醫生做左Invisalign透明牙箍！
我真係好後悔... 後悔點解隱形牙箍有左咁多年我都唔一早去做????細個屋企比錢都唔肯箍，大個出黎賺錢辛苦都要箍。正所謂有仔趁嫩生.. 有牙趁早箍！
本身牙齒問題：爆牙、疊牙、唔齊、中線唔對 牙箍總數：44個箍+16個箍(refinement stage) 箍牙年資：17個月，現refinement stage第6個箍 箍牙費用：$38,000包埋固定器，做分期
有關醫生： Dr Nicholas Tsang，私人執業唔係集團式入面個d…九龍港島有3間診所，佢星期一至星期日都開工。醫生唔係一講個名就識個d，但做invisalign非常有經驗，係Black Diamond黑鑽級。醫生非常細心，講解所有野都好詳細（有少少長氣），有問必答，就算出面有客等緊，都唔會話chur你時間趕住睇下一個症。
箍牙分享： 我個case唔洗剝牙$38,000，可以分期之後每次覆診比$1000，比信用卡…岩晒我呢d鍾意碌卡儲分換機票既c9仔。決定做之後既第一個appointment係比醫生影箍牙前既相，照xray同埋印牙模。第二次appointment係大概3個星期之後，呢次係睇invisalign條片睇下係點樣箍、箍完會點既樣。 第三次appointment係再隔左2星期左右就上箍啦！！因為我唔洗剝牙，但都要有返少少位比牙移動，所以醫生先幫我磨左少少牙隙，然後再係牙既上面加粒粒，d粒粒係用黎固定個箍，咁先夠力去移動d牙。 然後每3－4星期就覆診一次，醫生會睇下我d牙郁成點，跟唔跟得上進度（其實係睇你帶唔帶得足時間），之後就會比新箍我。覆診既等候時間唔算太耐，就算要等最多都係10－15分鐘。 箍到臨尾40幾個箍既時候，其實我已經覺得好好，比起原本靚左勁多！不過醫生真係好細心…話覺得唔夠完美，仲同我講refinement stage可以點樣再執靚d。我原本個44個箍已經箍晒，依家refinement stage箍緊第6個。 仲有樣野好值得講講既係…我個醫生真係好快！因為我之前見人分享過印完模後隔成4個月仲未有得上箍，我由印模到上箍只係6星期！聽聞呢樣野都同醫生勤唔勤力有關…
有關牙箍： 每日要帶22小時，晚上我用Retainer Brite浸箍（非常方便）。有d箍帶7－10日，有d箍帶2星期，視乎醫生叫你點帶。醫生會比1-2粒chewy你，每次帶箍都要咬，係用黎幫你咬返實個箍。 其實食野都可以帶住食…不過最好唔好啦（亦因為咁，箍牙期間食少左零食，係真係會fit左，因為成日都要除箍先食會覺得好煩，然後就索性唔食）。 另外要留返返，如果食強勁色素既野，例如咖喱乜乜，羅宋湯呀呢d…一定要除箍先食，如果唔係d色一定會食晒落個箍度。我試過食完刷完牙後先帶返個箍，大牙個d位都會有色食落去。所以我會建議換箍前一兩日先好食。 我下排牙帶到26個箍其實已經修正左牙齒唔齊既問題，不過因為上排要帶44個箍，下排一樣都要帶44個，不過27－44個箍係無分別。 另外要留意既係，即使換箍…上一套箍都一定要keep，以防唔見左都可以帶返上一套箍。我自己就所有箍都仲有keep住要黎留念haha。
有關牙齒／牙箍清潔方面： 由於磨左牙罅既關係，牙罅唔密又唔疏咁，好似攝住d野食。所以我每次食完野，都一定要用牙線棒撩牙。而牙線棒我十級推介3M個隻！因為佢係特別幼，平時正常萬寧/屈臣買到個d條線太粗啦，要用力攝落條牙罅度，有時一就唔到個力就????左落牙肉度！ 我依家無左3M牙線棒生存唔到???? 點解用牙線棒唔直接用牙簽？因為牙簽好易撩疏d牙。而牙線棒有一面係牙簽，但佢係特別扁同細，就算篤到好入都唔會點整到d牙肉。我會先用牙簽個面係咁二篤走大粒既食物碎，再用牙線個一面。咁就會好乾淨！3M幼滑牙線棒我自己在台灣買／搵代購，永安呢d大型department store都會有得賣，但無一大盒經濟裝，只有獨立包裝）。 至於牙箍清潔方面，我上面都有提過我係用Retainer Brite每晚浸箍。除箍後係咁二用水沖沖個箍之後就放入清潔盒中，然後加水，再將Retainer Brite放入去浸10－15分鐘，之後攞起個箍係咁二刷下表面就可以。清潔盒我見過有$12蚊店有得賣，我自己個個係上網買的。Retainer Brite係我個牙醫賣比我，我之後亦有幫襯過一間網店買。 如果唔用Retainer Brite，可以每晚用牙膏刷下個箍，但我個人就覺得咁樣好麻煩，同埋覺得無咁亁淨。
Invisalign箍牙痛唔痛： 我覺得唔算痛，只係頭兩日換箍d牙會酸，有可能無乜力食煙銀既野，例如牛扒。但第3日就會適應。我覺得呢種「痛」比起傳統箍牙既痛應該唔算得上係乜。身邊都有朋友箍過傳統，見佢地成日刮損咀／生痱滋真係辛苦。我自己箍牙期間係一粒痱滋都未生過，有時佢會突然有d箍做得無咁好，會刮既話，只要用挫指甲個d挫挫返滑佢就ok。
箍牙比較： 其實咁多年黎我自己都consult過好多醫生，普通同專科都有。2012年中環一個專科亦曾經同我講過話覺得我做唔到Invisalign建議我做德國個隻內箍，仲要剝6隻牙！唔知是否當時呢種技術唔係度度都有得做，當時佢報價15萬幾。好耐之前我係有諗過箍傳統亦做過consultation，佢話我起碼都要箍3年以上…要做鋼牙妹最少3年！？！？我真係唔制… 之後我又做過Invisalign既consult，比較過唔同箍法，原來傳統箍牙唔會比Invisalign快好多，只係差少少但舒服好多。清潔方面傳統箍牙有粒粒一定都會易d藏細菌同較難清潔。唔少箍過傳統箍牙既人，箍完拆左箍都比人睇得出佢箍過傳統，就係因為拆左箍之後d污漬漬得太耐洗/刷唔甩。亦有人棚牙箍靚左箍齊左，但因為清潔做得唔好，導致牙周病/蛀晒牙我都聽過。 論美觀度，一定係Invisalign贏啦。我初初箍牙個陣，好多時唔到我食野除箍，朋友家人都唔知我箍緊牙。
有關揀醫生／Consultation: 我覺得箍牙黎講其實揀醫生都幾重要，因為佢會直影響你成個treatment plan同箍牙進度。我會睇醫生既經驗同埋consult時對醫生對環景既個人感覺。反而唔會太介意地點問題，因為始終一個月都係覆診一次姐。個人黎講都唔鍾意揀d特別出名既醫生，因為個d比我感覺好似係重量不重質，會chur時間同埋態度唔太好…當然亦見到有負評。有見過網友講某好出名醫生，比左錢印模成半年先有得上箍；又見過有人話某醫生收得好平，但講明唔會幫佢箍到齊晒；亦見過有網友話箍完咬合有問題但醫生又唔肯跟返等等。 做consultation，專科一般都一定收錢，我之前做過個間收左大概$2000左右（實數唔記得），但佢會幫你照晒xray影晒相又照埋你頭骨咁。普通科既話有d就會收診金幾百，有d有人做referee會免費，有d係咪都免費。最緊係要做之前問清楚。
仲有d咩有關箍牙既都可以問我：） 醫生名上面已有，有興趣可自行google已經可以搵到。想做consultation既版友透過我介紹可享免費檢查（本人不會從中得任何利益）
| 
發表於 17-7-24 12:20 PM
