不打‧短評82：魔警 (有內容)

港產不打

不打評價：正場價 $63

不打總評：林超賢試新野佳作，值得入場支持

大家要有心理準備，張家輝出場只有頭半個鐘，基本上只係配角
但角色存在感非常強，而且演技一流，角色鮮明
好明顯導演林超賢有心捧佢攞完影帝後，最佳男配角都想要埋

套戲主角其實係吳彥祖，so far佢演得落力，但綜觀火喉硬係爭少少
執著、迷失、自責、罪疚感由佢演來都係一個樣，相對【線人】霆鋒招牌歇廝底里
係欠缺一幕令觀眾留下深刻印象既演繹

導演林超賢既功力係【証人】【線人】同【激戰】已經獲得觀眾肯定
今年黑仔偏偏撞正拍左十年既【一代宗師】，唔係應該攞硬最佳導演，可惜！
佢以角色刻劃心理鬥爭為主，再配合港式動作槍戰，開創左動作文戲既嶄新風格
其實2012年賀歲檔期有周董既【逆戰】，同埋10年有黎明既【火龍】09年有陳冠希既【神鎗手】
都係值得一看既港產佳作，可謂香港碩果僅存，仍然堅持拍戲俾香港人睇既實力導演之一

今次套【魔警】明顯在動作文戲既基礎上，嘗試加入新元素
以火燄、油彩特效、鬼王面具等符號嘗試以意識流手法去交代虛幻既交錯
思覺失調既身份混淆，再帶出一段童年陰霾插敘交代前因後果
大橋有D似杜Sir【神探】但論劇情張力及畫面構圖猶勝前作
以火為引，貫穿整個故事，達到起承轉合既關鍵作用，佈局係港產片少有既精妙
而且火燒既特技出色，CG和真火互補，畫面夠搶印象深刻

當然好多觀眾可能會反感，入到場先知道家輝係配角而且死得兒戲，有D被騙既感覺
呢個又係所謂觀眾預期，但以戲論戲，家輝既死其實鋪排合理而且係劇情上係必需既
我唔覺有咩問題，反而瑕疵係鬼王幫其他成員度
正所謂強將手下無弱兵，家輝角色刻劃心狠手辣獨行獨斷殺人如麻
鬼王幫成員偏偏件件蛋散冇型冇格，落叉實在太大，以至家輝死後套戲張力大減
一錯搵歐錦棠，佢本身電視味太重，太入屋，搵佢做悍匪而且仲要衝動好色，完全格格不入
二錯搵甘草李國麟，佢一樣電視味太重，角色太柔弱，膽小怕事
三錯搵梁焯滿，佢做人面獸心既強姦犯其實入型入格，但硬加強暴盲妹果段其實冇咩意思
唯一撐得起既只有林超賢御用智叔，老戲骨就係老戲骨，係壓到場！

如果套戲係單純吳彥祖對張家輝，其實只會流於一般警匪片既層次
今次試新野，如果係荷里活拍，坊間唔會咁多負評
香港觀眾仍然習慣用兩套評審標準去看港產片：外語片就好能包容，港產片就好能挑剔
到底幾時先識醒！？

Youtube：港產不打
Facebook：港產
Weibo：港產不打_微博
************************
港產不打
全職非牟利網絡打手
100%支持本地製作
乜戲都打，淨係唔打港產
************************

godfrey999

thanks for sharing