直擊 LG首爾大本營 Full LED× 3D今年最癲！

civiclau

■終於到佢出場，佢就係今年主打嘅 LX9500，但推出時間及售價未定。

http://hk.apple.nextmedia.com/template/apple_sub/art_main.php?iss_id=20100327&sec_id=12187373&art_id=13865280

戲院 3D電影一套接一套，心諗：究竟你班友仔睇劇情定係睇特技？我都唔識答！不過， 3D已篤定成為本年度 AV界種子殺手，任你價錢幾貴，各大廠照排住隊公佈，日前輪到 LG，小記直擊韓國首爾大本營，親睹今年大作 LX9500，佢唔單止係 3D，仲內置全新 Full LED技術，呢 Round到佢做宇宙第一！

對比度高達千萬級

■戴咗 3D眼鏡，畫面清晒、顏色立體感出晒嚟！

Full HD就聽得多，咁 Full LED又係乜東東？簡單啲講，最早期嘅 LED原來係一塊過，即使畫面上有九成九黑晒，但因為有一小部份發光，也會導致其他黑位都光埋，所以一般對比度只有 3,000,000:1；後來，再由 LED Plus過渡到 Full HD，今次最大分別係 LED已被分割成一小小粒，而且由電腦獨立運算，即係話，暗位可做到更暗，光位亦可以更突出，亦即係層次感更分明，也難怪呢部 LX9500，對比度可達到 10,000,000:1的境界。

如果淨係講 3D，可能 Sony首部 Bravia 3DTV會比較佔優，但係 LX9500又點會齋玩一項分唇，你可以話佢夠全面，除剛才所講嘅 Full LED技術，佢仲內置最新 TrueMotion 480Hz，睇賽車或運動之類片段，明顯又比以前流暢啲；另外，機身亦夠薄，掛牆、放客廳唔阻碇；仲有一點係佢支援 Motion Sensor，遙控可以當 Wii咁玩，機內本身有體感遊戲，如果你買去外國用，仲可以夾埋 Web TV，當 Mouse咁 Click電視節目！


■ Show Room竟裝有瞳孔電子鎖，十足銀行保險庫咁森嚴。




1.當地 LG專家向傳媒介紹各種 LED的分別。


2.由右至左，係 LED的三個變化階段，夠清晰。


3.呢幕煙花片段，得一部份 LED發光，層次更分明。


4.試睇追逐和爆炸畫面， TrueMotion表現出流暢一面。


5.跟機先送 4副 3D眼鏡，唔夠仲可以單獨購買。


6.右邊內框配置開關掣，要着燈先睇到效果 o架！

2010新產品逐樣睇

15"激薄 OLED TV

■機身薄到離譜，同樣售價亦貴到離譜。

記得 SONY亦出過一款薄如紙張嘅 OLED TV，不過本地電器舖唔多覺眼，說穿了，可能係價錢太貴先真！諗吓，屏幕 Size細到得 10"至 15"，但售價卻可以賣成兩萬幾蚊！ LG呢一款基本玩法同 Sony無分別，而且售價無落過，想香港玩家撐佢都幾難。


約$21,000
推出日期：已售（韓國）

中古 CRT擺房仔

■顏色有兩款你揀，就係橙白和黑白。

唔知同近期保育新聞有無關，突然， LG竟推出一款中古式 CRT電視！齋講下面 4隻 UFO腳已經有睇頭，機頂仲裝埋兩條開叉天線，唔係流嘢，調靚個台真係靠佢！不過，呢款 14SR1DB突然送隻 Remote你用，後面更可接駁碟機睇戲，感覺有啲到喉唔到肺。


約$2,000
推出日期：已售（韓國）

圓柱式藍光組合

■當隻碟由喇叭內伸出機外，幾乎型到要拍掌。

唔知點解，外形都係有啲 SONY影子，呢支大炮叫 HB994PK，屬於無線藍光影音組合，最特別係圓柱式設計，雖然聲音唔似得 SONY咁可以 360度四圍走，不過效果認真唔錯，值得一提係出碟入碟嘅位置，同埋輕觸式按鍵位等，當擺設已經好型，但代價大到無倫。


約$29,000
推出日期： 7月（歐洲）