透視Facebook港甲新女神

son88son

透視Facebook港甲新女神

文：Binlo子文

講到近排喺本地甲組聯賽人氣最勁，首選當然係攻陷各大討論區、Facebook Fans Club人數直線飆升嘅「大埔Fit Baby」Lulu董嘉儀啦！今日《太陽體育》就搵咗呢位幫新界地產和富大埔打氣嘅超級索女，同佢做咗個專訪，想了解Lulu嘅朋友，唔使上網搵「起底組」喇！

記：記者　L：Lulu

記：做咗「Fit Baby」後，多咗好多Fans喎，不如妳介紹吓自己！
L：大家好呀！我叫Lulu Tung，今年17歲，中五畢業後去咗喺屯門嘅香港酒店旅遊學院讀酒店旅遊高級文憑課程。性格方面，我會形容自己係傻傻哋、樂觀、好動、親切、平易近人、熱情咁啦……好容易就同人做到朋友；平時最鍾意係瞓覺同埋跑步，因為可以紓緩壓力，又可以畀自己靜吓諗嘢。其實我細個時好容易病，成日出入醫院，但自從多咗運動之後，病痛少咗又Fit咗！

記：妳喺網絡上紅咗，有人幫妳整Fans Club，點睇先？
L：多人add我當然開心，因為證明咗我開始受注視；但又怕add我嘅人有不軌企圖，又驚人哋用有色眼鏡望我，真係好矛盾！其實最初喺Forum見到一啲對我嘅負面評論真係好唔開心，但係學班老友話齋，依家Forum有八、九成都係正面、只有一成係負面已經好好。即係話有九成人都想我開心，自己又何必要為嗰少少嘅一成而嬲呢？咁豈不是好蠢！

最記得怕醜安杜
記：對大埔呢支球隊有咩感覺？有冇對邊個球員嘅印象特別深呢？
L：我之前係「足球白癡」，只係睇過幾場世界盃，亦唔知香港有足球聯賽。但自從被委任為大埔足球大使之後，我就開始惡補足球知識，仲睇咗幾場大埔嘅比賽，發覺原來喺現場睇波真係好開心，氣氛一流，老實講我依家有少少鍾意咗足球！至於最深刻嘅球員，梗係安杜啦！仲記得喺第一次記者會上，我被安排同佢合照，但安杜竟然唔敢搭我膊頭，只係用手指掂住我膊頭，原來外國人都會咁怕羞，真係好意外！仲有，聽班球員講，隊長陳旭智同埋安基斯都好高學歷，安基斯仲要係律師嚟添，但為咗踢波竟然放棄高薪厚祿，同啲人成日話「踢波無前途」啱啱相反。

希望令香港人更健康
記：對於球隊或者係自己嘅未來，妳有啲咩抱負？
L：我仲讀緊書，依家做Part Time Model都只係想攞經驗同識多啲人，所以都仲未諗過將來做乜！不過，我依家做「Fit Baby」除咗想多啲人為大埔打氣之外，亦可以幫Fitboxx做推廣同拍廣告，咁樣大家就可以透過我認識更多健身器械及知識，意識到做運動嘅重要，令香港人可以更健康！


Promote Girl變身生招牌

究竟係邊位「高人」諗到用「Fit Baby」打氣呢條絕世好橋呢？Fitboxx市場部經理Jason就話：「其實Lulu最初只係我哋公司嘅romote Girl，負責喺旺角幫手派傳單，但我覺得呢個女仔形象親切、外形清純健康，啱晒我哋健康器材產品路線，於是就開始搵佢拍廣告。今年我哋成為大埔球衣心口贊助商，於是就諗到搵Lulu呢個生招牌幫手，每次球隊主場出擊都去打氣，擔任球隊大使！事實上Lulu喺球場活潑嘅表現深受各界歡迎，唔少球迷、網友都對佢產生興趣。其實咁樣真係互惠互利，因為無論係Lulu、大埔或者係我哋，都可以攞到多啲曝光率，達到令人非常滿意嘅宣傳效果。」


一餐食4個公仔麵靠運動換纖腰

「Fit Baby」Lulu條纖腰恨死唔少女仔，大家一定以為佢要成日節食，但原來啱啱相反，Lulu係個正宗大胃王！問佢點解身形仲可以咁Fit，Lulu就話：「唔知點解！我試過一餐食4個公仔麵都面不改容！哈！可能係我新陳代謝快，每次食完飯就即刻去廁所『直上直落』。呢種食極都唔肥嘅身形，應該係女仔都好羨慕！」不過，Lulu都補充話要Keep到個靚身形，始終都要靠做運動，所以平日一有時間，就跑步機、健身單車不離手，所以Lulu條纖腰係靠努力得番嚟！

son88son

推推推推推推推推推推推推