明明話等我, 點解最後都要放棄 - 失戀治療所

查看: 4292\|回覆: 5	go 明明話等我, 點解最後都要放棄 [複製鏈接]

香港板~康仔

五星白金會員

Rank: 5 Rank: 5 Rank: 5 Rank: 5 Rank: 5

UID: 435770
帖子: 2236
積分: 2458
Good: 14
註冊時間: 05-6-24
在線時間: 1484 小時

1^#

發表於 12-3-7 06:46 AM |只看該作者 |倒序瀏覽 |打印

2007年5月20日, 對我黎講係一個十分重要既日子。當日能夠同你一齊, 的確唔係一件容易既事情。大家都考慮左好多因素, 到底應唔應該一齊呢? 無論係年齡同性格,的確係十分唔同。但到左5月20日, 我同你都決定一齊拍拖。

你果時20歲同15歲既我一齊拍拖, 年紀相差有6年,一心只係想同跟對方一齊。外界眼光全部唔理。

講返剛剛開始既日子裡面, 我同你的確係好開心。每次去食飯, 大家都會簡一間最平又抵食既餐廳。果陣時大家都無錢, 我仲用緊家人每個月俾既零用錢同你一齊拍拖消費, 金錢真係有限。你當初話同屋企人關係唔好, 自己搬左出黎住, 有時間我就會立即過黎揾你。最窮既日子大家都一齊捱過, 淨返幾十蚊食幾日又試過, 唔夠錢交租問人借又試過。當然呢D日子唔係支持到好耐, 過左幾個月後, 你就決定返屋企住。

好記得有一次, 我同你想去青衣城間扒王之王食飯, 點知去到入錯左另一間餐廳…一打開個餐牌, 嘩…價錢嚇死人, 立即靜靜地走返出門口。再去睇floor plan, 哈哈, 原來行錯左方向。食完飯, 大家去海邊行下散下心, 當時真係好幸福, 半點煩惱都無…同你一齊真係可以放鬆心情去做每一件事。

我所打既野, 雖然只係佔我同你發生過所有野既萬分之一, 但對於我黎講, 就好似永遠都刻左係我個心度。

早兩年, 大約2010年左右。我決定去英國讀書, 希望大學畢業後, 日後工作有更好既前途。我同你都約定左, 我一定會讀完書返黎同你結婚, 而你都話會等我返黎。你果晚有黎送我機, 我知你忍喊忍得好辛苦, 直到我咩住背包入閘既時候, 我雖然沒有回頭望你, 但我心裡面知道, 你眼淚已經流下來。我入閘後打俾你的時候, 你無講任何野, 我只聽到細細聲的呼吸頭氣聲。我知道你喊到講唔到野。好辛苦, 當時我更要知道, 我要努力返黎俾你睇, 唔會令你失望。

第二年, 你今次無送我機, 因為時間同工作上有D衝突。但係唔緊要, 我知道你唔送機, 唔代表唔愛我^^。但係今年就開始有D問題出現, 頭幾個月, 大家關係都仲係好好。得閒會打網絡電話俾對方, 關心一下, 呵護一下。但係由2月開始, 我就覺得你開始對我有D心淡, 來自你既電話開始漸漸減少。我個腦開始知道有不詳既感覺, 知道你在改變。到左3月4日, 我主動打電話俾你, 膽粗粗地問左你一個問題: 你係咪唔鐘意我喇? 你無即時答我, 只係講左句: 點解咁問? 到我追問既時候, 你終於肯決絕地講: 我唔想再等…我唔想等多你3年畢業後返黎, 仲要等你開始你既事業, 再打算結婚。我知道大家既問題就係年齡距離, 而家你已經26歲, 就黎27。而我就係20歲。當我聽到你講呢番說話, 我已經知道我地唔會再有一齊既機會, 因為而家既你對愛情既睇法已經唔同左, 可能年紀到左唔同既階段, 追求既野都會唔同。我亦都唔再過問, 只係講: 咁你仲有冇野係我屋企度未拎走? 佢話都無。從此大家呢幾日都無再通過電話。

一齊就黎5年, 時間過得好快。我好多謝有你陪伴過我。
埋怨既說話, 唔想係度講。
只希望你揾到個更好既對象, 可以同你結婚
祝你白頭到老!