海水魚之分享

NinoXMarco

唔經唔覺，原來都養左成年海水魚啦。第一日開缸我仲好記得係２０１１年８月１日，當時養海水魚既諗頭係由於我老豆同細佬話要養，但媽媽反對，因為係我中二果陣有個殺生既經驗。

還記得中二果陣，我老豆話要養海水魚，於是叫左同事上黎幫佢set個缸，果陣應該係２４吋既現成缸，再加沙底，行一個頂濾而已。果陣我連biology都未讀，梗係唔知道nitrogen-cycle係咩啦。我老豆又聽佢同事講，淨係check一隻element，唔知係No2定Ph啦,當時佢話係Ph，仲同我講話會行一個圈先養到，而家諗番起，應該係No2啦。到個缸行好哂，佢一次過加左好多魚落去，我記得有關刀同藍圈，結果係點，我諗大家都知道啦，反缸。至於點解反缸，下面我會提一提下。

到左而家，我媽話只可以比佢地養淡水魚，於是佢地又再一次行頂濾，沙石底。但又係不停死魚，我估計可能係過濾系統唔足夠啦，最後我提議佢地行底濾，將所有屎屎同廢物吸哂落底，一個月清一次，到左而家，叫左定左d了。

講番海水魚先，見到佢地果缸穩定左，自己又不禁想養海水魚，因為真係好靚，神仙魚仲要識得變身，好得意。於是我就不停上網搵post睇啦，順路同大家介紹下幾個大型海水魚forum先。
呢兩個就我成日都上去既
SeafishZone─賣魚既店多數都係呢度出post，出得好快。
SeafishFans─交易廣場好多野賣，但同時亦好多人買，如果要買到心頭野，真係要好似睇股票市場咁，日日睇實。
另外有幾個都多人上既
Aquarium, ReefHK, HKCoralFish
不停日日睇精華post，睇下究竟有咩要準備，要買，要注意……

Nitrogen cycle
陸地又好，海洋又好，佢地既屎屎都要處理先可以繼續係好既環境生存的，所以就有一隻叫硝化細菌既東西出現啦。佢會將：屎屎→Nh3/4→No2→No3。
No2 (Nitrite) 對珊瑚同海水魚有害既
No3 (Nitrate) 對珊瑚有害，海水魚冇影響
而海水魚缸入面正正就係要發展呢個marine system。

魚缸類別
FOT (Fish Only Tank)─即係得魚冇珊瑚, 呢個亦係好多人既選擇, 因為岩岩提過, No3係對魚冇害的, 所以養FOT的話, 我地可以唔洗理會No3既concentration, 易d打理。
RT(Reef Tank)─以珊瑚為主, 入面仲有其他生物, 好似醫生蝦, 海星, 海兔……魚都會有, 但唔多, 同埋多數唔會係蝶魚同仙魚。呢個比較難打理, 因為No3對珊瑚係有害既, 所以我地要借助其他設備去減低No3。

仲有一種, 混養缸, 珊瑚同海水魚都一半一半, 仲有仙, 蝶魚係入面, 呢個難度係最高。因為仙, 蝶魚都喜歡食珊瑚, 一開口就食唔停口, 所以除左要打理No3 concentration之外, 仲要教識魚魚唔食珊瑚, 食糧。

設備
睇左咁多精華post, 好多人都會建議新手由24吋缸養起, 之後慢慢換大缸。我都讚成的, 因為24吋, 話大唔大, 話細唔細, 岩岩好既一個size, 換水, 落藥都方便d。至於用咩型既缸就睇下大家既喜好啦, 而家一共有三款既缸比大家揀。

濾桶魚缸─用一個普通魚缸再配上一個濾桶, 入面放滿哂生物環, 最頂層放一塊白棉, 呢個都係好多新手會用既缸, 因為過濾系統行外置既關係, 所以更換棉, 清洗設備上都會方便d, 唯一既唔好處就係, 每次換棉都要開濾桶, 長期咁開, 好易整爛個開合位, 到時就要買個個新既濾桶。仲有一樣野, 就係拆濾桶果陣, 可能會整到成地都濕哂= =
另外亦有人會行底濾, 係沙中養硝化細菌, 呢個方法都可行的, 但用耐左, 底喉可能會塞, 最後起沙一洗, 會死好多硝化細菌。

背/側滴魚缸─一個魚缸入面間起左一部份拎黎做過濾系統, 呢個做法比起行濾桶, 會更慳位, 因為所有野都擺哂係一個魚缸入面。換棉果陣係背滴位度換就可以了, 方便快捷。而佢個原理就係以下呢張圖咁, 水由右邊入, 一路由第一倉流去第四倉, 最後由上水泵帶番d水出去。除左上水泵果倉之外, 其他都可以放滿哂生物環, 比起行濾桶, 水質會穩定好多。


滴漏魚缸─另外用一個魚缸(沙缸)做過濾系統, 由於用左另一個缸做過濾既關係, 所以可以擺好多好多生物環係度, 從而增加硝化細菌數量, 令水質更穩定。

呢3款缸我都用過哂, 個人覺得新手可以直接用背滴漏缸, 因為慳位, 同埋所有野收埋哂係後面見唔到, 唔洗擺係魚缸內咁礙眼, 魚魚又可以有多d地方游。

我第一次用既24吋缸係行濾桶, 果次一換棉真係畢生難忘, 一開個桶, d水係咁漏出黎, 整到成地都係水, 超麻煩= = (不過可能係小弟技術唔好啦, 其他師兄應該冇我呢個問題)。
所以我轉左做24吋背滴缸, 呢一個就真係用左一後時間啦, 我10月換缸的, 一用就用到今年6月啦。
最後點解會轉滴漏缸呢, 係因為我實在太多魚係個缸度= =完全唔夠位比佢地大同埋游, 同埋缸細魚多, 成日會打交, 水又容易黃, 所以決定換滴漏缸。

上水泵/濾桶
上水泵/濾桶每小時既流量要係成個缸既水容量x15~18比較好, 即係話, 如果個缸有60L水, 最好用900~1080L/H比較好。
濾桶牌子: kotobuki, eheim
上水泵: eheim, aquabee, newjet, powerjet, waveline等等

Skimmer (化氮器)
原理係通過水同水之間既撞擊力, 分解出水中既雜質, 令水質更好。呢樣野基本上係海水魚必要既工具, 因為佢會幫到你好多, 令你可以換少好多次水, 有朋友同我講, 如果唔用化氮, 好可能一星期要換2次水, 用左可以一星期換一次。最後我都用左, 雖然一開頭都係一星期換一次, 但慢慢就懶啦, 一星期, 10日, 2星期, 20日先換一次水= =但d魚魚都好健康, 冇咩病痛。
牌子: nac, surchen, H&S等等
Skimmer都會寫住for幾多L水既魚缸用, 大家都會揀番自己缸水量既2~3倍左右黎用, 例如: 我缸有100L水, 咁我用番一個200~300L水用既skimmer會比較好, 有人會揀4倍添, 但我個人認為用太大倍數既skimmer反而唔好, 因為佢可能仲會打走埋缸中海水既微量元素, 用2~3倍已經夠了。

生物環
成個過濾系統既主角, 因為硝化細菌係生長係生物環呢d好密小孔既地方, 所以冇左佢＝冇硝化細菌咁 (當然, 如果你行底濾, 係沙中養細菌例外)
牌子: ma, ph, eheim

鹽度計
用黎度缸中海水既鹽既濃度, 一般setting係1.023左右啦, 市面上都有好多唔同既鹽度計。有d用光學, 有d用漂浮, 有d用指針等等。

沙樽
固名思意, 呢個係一枝由水泵推動, 裝住好多沙既樽, 都係養細用。

Uv燈
殺菌燈, 水透過uv燈可以減少水中既有害細菌。 但注意, 一定要慢水流先可以令燈發揮功效, 所以要另外用一個慢流量既水泵推的。

豆豆樽

透用一個慢流量既泵去推動樽內豆狀既物體, 從而減低No3 concentration, RT必定要有既設備, 但需要run in的, 所以RT人士一定會開缸果陣就行的。

T5/T5HO燈
一般用既魚缸燈, T5HO就光d, 用既w數大d, 會熱d。

LED燈
呢年好興既一種燈, 雖然貴, 但勝在慳電, 唔算好熱, 夠光, lifetime都長的。RT人士必用既燈。

開缸
新買番黎既缸, 最用先行一日淡水, ensure個缸冇漏水, 冇爆, 同埋清洗一下個缸入面既玻璃膠, 因為始終都有毒的。
行完一日淡水, 倒哂d水, 重新裝過水, 再加海鹽, 牌子有好多, 我自己就用ab鹽, 溶得快, 個桶又夠大, 換水一流。

養水
然後就係買開缸魚啦, 點解會叫開缸魚啦, 因為你缸中而家冇任何硝化細菌, 加左魚, 有屎屎, 硝化細菌先會產上同埋行動, 慢慢形成個系統, 需時大約45日。係中段時間, No2 concentration會爆升, 果陣真係加咩魚都會死, 除左魔魚之外, 呢一科既魚好受得No2, 一般情況下都會挨到個cycle完左為止。
我開缸果陣就用黃尾藍魔, 藍魔開缸, 因為我太喜歡藍色啦= =
/****************係養水既期間, 千其唔好加任何魚, 仙, 蝶, 小丑, 通通都唔得,因為佢地完全受唔到No2,加落去＝送佢地去死, 唔好殺生****************/
 
終於挨到個cycle行完一次啦, 點解我會講一次呢, 係因為雖然硝化細菌已經有同埋行動左, 但而家既數目只能夠負擔到你缸而家魚既數目排出黎既屎屎, 所以如果一旦再加魚, 個cycle會行多一次, 不過當然啦, 由於你已經有菌係度幫你將No2轉No3, 所以個No2 concentration只會升一格左右, 一星期後又會跌番落黎。
所以, 加魚既時間, 最好一星期一條2.5~3吋左右, 再大d既, 我建議10日左右一條。

除Cl
而家我地既水喉水都會有Cl嫁啦, 呢d element都對魚魚有毒的, 所以一定要remove左佢, 有兩個方法:
1.        將水過一晚過夜, 等佢自然散走
2.        用Cl removal, 牌子: seachem出既Prime

Q魚
新買番黎既魚, 最後自隔離7日, 確保佢冇任何細菌帶到落魚缸, 咁樣就可以避免左魚魚既損傷。有人會選擇另外開一個魚缸做隔離新魚用, 咁樣做的確方便d, 我自己就用一個4L~8L既水桶2個, 開好哂海水, 將兩個桶放埋一齊, 每日換水形式去q魚, 例如: 2桶水, 一桶a, 一桶b, 魚魚第一日會係a桶, 第二日會係b桶, 然後a桶既水倒哂佢, 再開個同樣份量, 鹽度既海水, 開係b桶隔離, 等兩個桶既溫度差唔多, 過桶果陣就唔洗對溫。

對溫
岩岩番黎既魚魚, 連魚袋, 放係q缸/q桶度漂浮1小時, 等魚袋中既水同q缸/q桶既水溫差唔多/一樣, 目的係想魚魚適應溫度, 因為魚魚對溫度比較敏感, 差1~2度都會好唔慣, 最後可能會身亡添。

對水
對完溫, 可以拆魚袋, 加個打氣石落魚袋中, 然後每15分鐘加150ml左右既水去魚袋入面, 目的係想魚魚習慣水中既鹽度同埋element既concentration, 因為魚袋中既水既鹽度同各element既concentration都同q缸/q桶/主缸既水唔同, 魚魚亦會因呢樣野而唔慣, 最後有機會身亡。

淡水浴 (Fresh Water Bath─FWB)
新買番黎既魚魚可以同擺佢落去一桶純淡水度5分鐘左右。目的係想透過淡水, 比壓力魚魚, 等佢體內既細菌(ufo)走出黎, 從而避免左佢會因呢ufo而生病既情況出現。

Q夠7日啦, 魚魚就可以落缸, 當然, 同樣要對溫對水啦。

例行維護工作
換水─大約一星期~10日換一次水, 每次1/3缸水, 我就冇開定海水隔一晚夜的, 你可能會問, 冇開定水, 換水後既水溫咪會好唔同囉? 呢個係, 特別係冬天, 但我覺得魚魚養定左, 佢既適應能力會強左, 對水溫爭1~2度都可以的, 所以我每次都係即刻開海水換的。
有錢的話, 可以買支海水素, 因為其實換水其中一個目的, 係補番缸中水既微量元素入去, 因為隨住skimmer既行動, 日子既長短, 缸中既海水元素會慢流失, 所以要補番落去, 而其中一個方法就係換水 (因為海鹽中已有大量微量元素)。
當然啦, 呢d元素對魚魚係好既, 所以換水果陣加d海水素都ok, 你亦可以一星期加一次, 我覺得咁做可以遲少少先換水都冇問題XD

大約就係咁樣啦, 當中可能有好多錯誤, 如有的話, 煩請指出, 謝謝

陳詩翰

頂你頂你纖纖先

Msz．Shiranui

屋企養海水魚?

單身派對

很詳細呢 我都唔識分‘’‘