《童話十年回憶尋人篇》(一生不能忘記的睡美人)

tommyfai0614

　　我嘗試寫低呢篇文章，重溫一下童話帶比我既純真，即使來去匆匆十年之久，我仍會掛念這童年回憶，從剛接觸線上遊戲的衝動，到今日終於只想尋回不知道何時消散的真摰情感。
　　對於童話，我似是個新手，因為根本玩黎玩去都唔似老手般衝等，不斷升工作技賺錢，所謂一分耕耘一分收穫，自知比唔上其他人，但係我有個朋友，朋友都係升斗小市民，我地算係互相扶持又互相勉勵既拍檔。我要兼顧學業又要培育個小矮人，怕佢餓親又怕佢比怪恰，組隊既隊友一日比一日少，有一次仲慘到走去西迷路森林探險時，冇水冇糧，結果要ｃａｌｌ佢出黎送藥水比我，有陣時我真係諗，玩呢隻ｇａｍｅ真係出門靠朋友，本來坐係度陪隻寵物做下動作，玩半個鐘都會儲夠血殺出去，但係餓既時候就似個賣火柴小女孩咁，餓住等護士抬你走，有一次我個朋友打趣咁同我講，你都唔知人地為抬你走行左幾多路，其實我係諗，你咁遠水路都黎捱義氣，班護士算係咩丫。
　　直到免費童話既出現，我終於可以比人帶升，３００幾敏之後根本可以無視撞怪，坐架車車就任我行，然而我寧願升到可以一個人獨自傲遊既時候就停落黎，唔再為升ｌｖ而升，倒不如日日留係吉恩，細數當年小學遊戲的點滴。
　　回歸正傳，我要搵既係咩人呢？而誠實既我將會話比大家知，我根本就冇唔見到佢，而一開始陪我玩童話既人，兜兜轉轉十幾年，一直仲係我既朋友，時而亦有相叙，可能有時講起童話，真係令我倆哭笑不得，今時今日屋都搬左，冇乜機會搵佢玩，而佢又要遠渡澳洲，童話已經係歷史，強行要我諗返佢叫咩名我都唔係好記得，我既ａｃ又經十多個寒暑之後，大概亦不復存在，最近一個同樣棄置左好耐，但係算係最近期既ａｃ叫＂愛在童話＂，呢四個字算係我對呢位朋友最大既祝福，唔好誤會，我呢位朋友係男仔黎，佢幾乎每次都陪我重開ａｃ，再玩一次所有職業，幫吉恩的漂亮護士送信給土神殿的美眉，幫爺爺婆婆解決孫子的不和，偷吃那送不完的蘋果桃子，其實所有任務情節我都記得，甚至可以背誦如流，因為以上種種都係我同朋友既共同回憶，如果你要我比一個原因，講點解我一定要搵返呢位朋友陪我玩，我會答你，「我唔會放棄唔玩童話，連你都一樣唔會放棄，陪我一齊玩！」
　　係現實生活之中，童話帶比我既野，唔單單係小學時期一段難忘往事，我會將＜童話＞呢個遊戲，奉為本人成長之餘，保持純真的一個基石。係回憶既洪流入面，我彷彿見返我所創既第一個家族，到我再搵返果位伯伯果陣時，佢同我講佢退左休，我又依稀記起２５ｌｖ既法師－煮飯仔，多謝你陪我傻下傻下又一日，仲有傻健可憐我無家可歸，比左我一個大家族，諸多必須言謝之人，如今只能託遺嚮於悲風，細味昔日酸甜交雜既童話，縱使搵唔返你地，我都會掛念你地呢班朋友。