我的另類愛情故事

katjai

愛情對我黎講，並唔係必需品，但係我好需要「愛」。

中五個年，第一日開學，佢編左坐我隔離，但係個位並冇人坐。
係開學既第唔知幾多日，佢終於出現，佢一入班房，一坐低，就趴係度訓教。
如是者，佢一時唔返學，一時就返學訓教。

有一日到放學個陣，佢依然係度訓教，我臨走之前放低左一粒朱古力係佢台面。
我覺得佢可能唔開心，又或者佢真係好眼訓，我純粹希望佢食完粒朱古力佢會精神d。

第二日，上堂個陣，佢放左粒糖係我台面度，同我講話還返比我，之後又趴左係度。
哈哈，當時我覺得好好笑，我即刻拍醒佢叫佢聽書，佢冇帶書，我就同佢share。
個一堂係數學堂，原來佢數學好叻，佢差唔多題題都好快就做完仲要答岩哂。
個一日開始，開始同佢有d溝通。有時仲會我請下佢食朱古力，佢又請下我食糖。
相處耐左，開始有講有笑，開始知道原來佢唔鍾意讀書，所以成日都唔返學或者返去訓教。

有一日我屋企發生左d野好唔開心，我成個上就係學校都冇講過野，同學叫我我都冇理佢地。
食完飯之後，佢寫左張紙仔問我發生咩事，我諗左一陣我就寫：冇野，有d唔開心姐。
之後我地成個下就都係度傳紙仔。
雖然個日唔開心，不過之後諗返起覺得好sweet，因為佢竟然會主動關心我。
開始好想同佢傾計，想同佢分享自己既野，不過一年過得好快。
會考完之後，差唔多冇乜聯絡，有時d大節日都會wtsapp對方同佢講聲節日快樂。

直到依一兩年，能夠溝通既渠道多左。
我同朋友一直都有玩網絡遊戲，開始搵多d朋友仔一齊玩，最後發現原來佢都一直有玩。
我邀請佢一齊玩同埋用聊天軟件傾計，方便打機溝通。

因為依個遊戲，依個聊天軟件，我地既溝通多左好多。
有時閒日會約出黎一齊睇戲，對方生日又會出黎一齊食飯。
每一日我用電腦就會好期待可以同佢一齊打機一齊傾計。

其實我從來未拍過拖
我可能唔知道乜野係愛
不過我每次見到佢都會心跳加速同埋面紅。
我就覺得，我應該係愛佢。

如果有人睇到依度可能已經好多疑問，覺得個故仔好似有d問題甘。
嗯，我係同性戀。
我鍾意左一個異性戀既男仔，我知道冇可能同佢一齊，所以我冇同佢表白過。

對我黎講，我既愛一生只可以比一個人
縱然我永遠得唔到回報
但係有一個人能夠比我去愛，我覺得好幸福。
可能有人覺得我亂up/你未拍過拖先甘講姐
不過起碼我暫時既想法係甘樣....

依個就係我既「愛情」故事。

PS：可能有人會對同性戀反感
          在此說個對不起。

nps05066

多謝分享

diuleelom0

多謝分享 對同性戀冇乜評價

yee333

多謝分享

風吹麥浪

不過起碼我暫時既想法係甘樣....

小太陽彤彤

謝謝分享 勇敢愛