不打‧短評34：藍精靈2(有內容)

港產不打

不打評價：正場價$55

不打總評：睇完開開心心的兒童電影

有人插話舊酒新瓶，但我就話係終於自己風格
正如Toys Story，你話條橋來來去去都係咁重複！？但集集大收旺場你又吹唔脹
設定得意可愛、動作鬼馬論盡、對白抵死過癮
橋段老土但節奏明快、劇情簡單但言簡意駭
有齊以上既元素，加埋現場小朋友笑聲不斷
唔算係一套成功既兒童電影嗎？

前年第一集藍精靈我出長文激讚
藍精靈既特徵係友善、親切、誠懇、冇機心，感染到觀眾睇得開開心心
而且成功刻劃精靈爸爸既承擔、捨身、顧家、安全感、遇事鎮定既好爸爸形象
今集繼續描述父子情，而且加入後父既情意兩難，感動位猶甚
男主角對後父一直不滿，最後先發覺後父一直為佢付出，冰釋前嫌確立父親地位
精靈爸爸一直視美芝為女兒，卻意外發現美芝和生父加達及兩弟妹生活可能仲開心
一度迷惑，最後堅持由美芝自己選擇，結局當然永遠大團圓，仲多左兩位新成員

今集少左歌舞場面，「啦啦，啦啦啦」冇咁洗腦
當然「藍精靈，十分勁，揸住xx亂咁fing，fing到秀茂坪」依然冇唱到
但粵語配音同樣精彩出色，糖兄妹、泰臣、羅敏莊及度對白既編劇應記一功

其實荷里活既動畫電影一向高質素，好多都仲好睇過一般腦殘爆谷電影
近期【怪獸大學】【壞蛋獎門人2】搶盡票房風頭
但同期【極速Turbo】【綠國奇兵】其實唔差，一樣值得大家入場！

睇兒童電影要用小朋友既心態去看
重拾童真，一票無價
香港人，輕鬆D啦！

Youtube：港產不打
Facebook：港產
Weibo：港產不打_微博
************************
港產不打
全職非牟利網絡打手
100%支持本地製作
乜戲都打，淨係唔打港產
************************