關於男人的5大愛情迷思！

ＭＡＮＤＹ

喺愛情上，女生成日俾人話口不對心，其實男人又何嘗唔係呢﹖有時候男人將自己嘅感受收收埋埋，單憑觀察佢哋嘅行為表現，真係好難理解佢對自己嘅愛有幾多有幾深。女人會誤會自己男人唔愛自己，都係由呢啲問題開始。不過當你拆解咗以下幾個關於佢哋嘅迷思之後，相信會體諒佢哋多啲。

1.　男人都好堅強？

男人表面堅強， 內心都有脆弱嘅時候，因為佢哋都係人，只不過佢哋想令身邊嘅伴侶覺得自己好堅強，而且絕對有能力保護你。

2.　男人唔會為女人流淚？

成日話女人用水做，好易喊，雖然男人無女人咁感性，但男人都一樣喺難過嘅時候會流淚。之不過，要知道嘅係，一旦男人為你流淚，就代表佢去到一個好灰心嘅地步，亦都暗示住你哋嘅關係有即將結束嘅危機。

3. 　男人分咗手仲對自己噓寒問暖，係咪想復合？

有樣嘢一直令女生好費解，就係EX會喺分咗手之後，仲對自己噓寒問暖。我哋第一個反應會諗佢哋點解要搵返我哋，係想挽留﹖定係想做朋友﹖其實好多男人都有咁嘅「傾向」，同係咪企圖復合未必有關，可能只係自然地覺得對女仔有種責任，就算分咗手都想知你生活成點，或者覺得分咗手都可以做普通朋友。佢哋嘅動機通常都無我哋想像得咁複雜。

4. 　點解男友會咁在意自己個EX？

男人會咁在意你嘅EX，唔係因為佢唔夠自信，而係對你缺乏咗啲安全感，當一個男人認真愛上一個女人，都有權變得敏感同無安全感架，你要做嘅唔係一味笑佢小器，而係俾返足夠嘅信心同安全感佢。

5.   點解男人總係唔想講「我愛你」﹖

男人唔係唔想講，只係覺得無咁嘅需要，佢哋唔習慣將一切掛係嘴邊，只要自己知道，而佢又覺得你明白同感受到佢嘅愛意，佢就會覺得無講出口嘅需要。