不打‧短評44：貞子2: 鬼胎輪迴(有內容)

港產不打

不打評價：長者早場$17

不打總評：上集太爛對比出今集冇咁爛，但都係爛

明明3D香港只上2D，証明院商都知膠底3D唔起
上集【貞子3D】係日本大收，香港觀眾眼睛雪亮的，票房合理地仆直
今集新光戲院優先場壞機臨時冇得睇全場燥晒底，原本冇打算看
但始終【午夜凶鈴】系列係我地班八十前既集體回憶，老婆話當笑片睇都要入場
最後setback到特登買邊位，打算必要時仲可以自己追返套【半澤直樹】大結局
結果……爛就爛架啦，但對比上一集我又覺得好睇好多，反而有DD驚喜

上集為左追上科技既進步，話晒日本係四屏生活既先驅
為左令貞子可以唔單止係電視爬出黎，連電腦、電話同平板電腦都出得
但又要避免屏幕太細貞子爬唔出黎既笑位，上集焗住將經典場面改為飛頭髮
從此一向靠隻血絲眼嚇死人既貞子，變左好強「髮」力要用頭髮掐死人
最後仲淪落到玩量產型，【生化危機】咁變左一隻隻蜘蛛怪周圍咬人
我地睇住【午夜凶鈴】大，前作貞子既恐怖係由心而發，係一隻充滿怨念既厲鬼
到左新一代貞子，殺人要靠武力要追要咬，變左一隻充滿獸性既怪物，我地完全接受唔到

今集最大既驚喜，就係貞子總算變返似一隻鬼，或者似【阿基拉】既超能力兒童
玩投胎由童星擔綱演出，細路女玩斜啤，總算拍出另一恐怖經典【咒怨】既少少味道
不停死人、突然爆音響、突然飛頭髮、突然彈鬼出黎呢類例牌恐怖招數就睇到麻木左
難得有三幕拍得唔錯，BB個口爆頭髮、保母突然跳樓未死再抓主角、女教授扮衣架突然撲出
仲有惡夢驚醒後見大佬以為安全，突然再變喪屍原來係夢中夢，都有少少離一離心既驚嚇效果
加上劇情今集總算幾完整，補完返上集好多冇交代既事，而且結局有扭橋
女童原來唔係貞子，佢都係受害者之一，姑媽唔捨得拋佢落海果幕更拍出少少感人
女童阿媽原來未死用肉體困住貞子，而貞子既真正目的原來係引女童黎借差佬殺阿媽再上女童身
結局又首尾呼應返女主角既童年陰影，比起上集又化蝶又獅吼功已經合情合理好多了

貞子玩眼特寫係定律黎既，今集先玩一刀插眼，再玩輪迴螺旋眼變古井，總算有D效果
貞子玩頭髮又係定律黎既，今集整體收斂左，但有場頭髮硬夾打印機流星槌全場爆笑
貞子玩古井更加係定律中既定律，不過今集個井好能膠，最後仲變左馬桶，吹漲
寫得咁詳細，因為唔打算叫大家睇，爛始終係爛，睇完文當睇左啦朋友
坦白講，我寫得仲精彩過套戲囉

Youtube：港產不打
Facebook：港產
Weibo：港產不打_微博
************************
港產不打
全職非牟利網絡打手
100%支持本地製作
乜戲都打，淨係唔打港產
************************