不打‧短評45：極樂帝國2154(有內容)

港產不打

不打評價：正場價$50

不打總評：如果唔係由神作【District 9】既導演拍，我唔會咁失望

只有超級富豪才可生活於冇戰爭、冇污染、冇罪惡、冇疾病的巨型太空站既背景設定
極端貧富懸殊既世界觀，嚴重不公平既社會制度，本身已經充滿批判性
我會期待好似【District 9】咁，用外星人去寸地球人，去講種族隔離政策
點之背景係有貧富懸殊，但唔代表有批判貧富懸殊
全套戲既主線係主角為求保命最後犧牲自己救返青梅竹馬個女
反而帶出左國家大事放兩旁，兒女私情先好講既大道理
結局既解放成功，其實只係黑幫大佬忽然孫中山上身既自我主張
所謂既革命，根本亦係非常幼稚既鬧劇，你只係reset左個system，根本冇改變過個制度
黑幫大佬只係另一個總統，世界有改變麼？只係另一個人控制一切吧了
結果套戲攪咁大龍鳳，我覺得導演係為左表揚無國家醫生囉！我好失望

本身劇情成立係非常粗疏既設定上，我好難投入
冇奶油維持成個住十幾萬人既太空站系統，可以由一個人鐘意改就改到
而個條蛋散既然係notebook前好似仲易過玩GTAV咁就改到，點解唔改自己做咁聰明！？
就算系統改左，茱迪科士打可以控制電腦，都唔代表佢合法去控制電腦架
唔通電腦話邊個係總統，佢就係總統！？唔駛同人民交代！？
如果你係普通腦殘科幻片，由頭打到落尾sell特技，我唔會同你計較
你係Neill Blomkamp，仲自編自導，仲要開個咁批判既背景，我唔會對你冇要求囉？

當然Neill Blomkamp既拍攝風格──淒美女高音加慢鏡碎shot──依然存在
整體節奏亦控制得唔錯，受傷→綁架→大追捕→太空站混戰，總算冇咩冷場
只係尾場機械人突然消失，淪為隻dug，就明顯慳水慳力
另外，埋下一段青梅竹馬既感情加年幼時既承諾，情感交代亦算到位
麥迪文一向演繹呢類深情既角色駕輕就熟，反而佢既身型著上個套強化外骨骼冇咩突出，感覺格格不入
茱迪科士打好戲，霸氣凌厲內斂，只可惜淪為大配角，出場加埋唔知有冇十分鐘，亦死得兒戲

用類似既科幻背景，但真正做到批判人類社會
我首推木城幸人既經典日本漫畫神作【銃夢】(記住唔係【銃夢Last Order】)
已經由占士金馬倫一早買左電影版權，拍完【阿凡達2】就開拍
預計最快2017年上畫！超期待！！

Youtube：港產不打
Facebook：港產
Weibo：港產不打_微博
************************
港產不打
全職非牟利網絡打手
100%支持本地製作
乜戲都打，淨係唔打港產
************************

v0v123

正好比香港...窮富大戰