不打‧短評54：國定殺戮日 (有內容)

港產不打

不打評價：長者早場$15

不打總評：自圓其說既極品，有橋但冇料，白白浪費左條大橋

好大膽既題材，未來美國法定每年有7小時所有犯罪豁免刑責
7小時內警察救護消防醫院也停工，姦淫擄掠殺人放火乜都得
原因卻只係開場果幾句VO同戲內幾個電視播放碎shot交代
大概係令到國民合法宣洩與生俱來既殺性、大幅降低其他日子既犯罪率
而且更交代有錢人個個全家安裝保安系統，窮人或失業人士冇錢裝，被人狩獵
國定殺戮日背後既真正目的，其實係減少低下階層人口，減輕社會負擔

呢個前設已經相當荒謬
果D所謂保安系統仲流過菲律賓差佬，門窗加塊鐵版就算
根本求其揸架車撞埋去都得，或者放火燒你全家你實要走出黎架
咁既系統根本冇可能運作咁多年，仲要個個有錢人都裝囉
正常既推理，有錢人果晚一定離開美國，邊有可能感恩節咁係屋企團圓？！
而且俾所有人可以合法殺人，正常既都會演變成窮人去殺富豪，或者去搶錢打刧勒索啦
邊有可能可以維穩，仲可以減少低下階層人口呢！？
最荒謬係電影一開始已經用咁一廂情願既前設，而且唔係剛剛實施，已經實行多年
所有市民都已經接受晒呢個事實，觀眾自然會將電影入面既道德標準架空，純虛構咁睇
偏偏主角個仔又會孫中山上身，放三唔識七既被狩獵者入屋救佢
而佢地一家又會最後良心發現全家頑抗其他狩獵者？！忽然又講返現實既道德標準，好能混亂
成個故仔非常非常自圓其說，好難令觀眾投入

至於套戲本身Budget仲低過TVB師奶劇
成個故仔就係屋內困獸鬥，賣保安系統既中年主角忽然好揪
一個殺幾個，之後永遠臨被殺時背後有人放冷槍
呢個模式不停重複又重複，女主角→個女→鄰居→黑鬼，悶到Hi Hi

最後播字幕抽美國政府水「我昨晚失去左兩個仔，我以前以美國為榮，而家唔會」
睇得出而家美國國民，明顯好唔妥美國政府
其實條大橋好有可塑性，和當年【大逃殺】一樣
如果導演有料到，可以拍出一套發人深省又具爭議性既神作

Youtube：港產不打
Facebook：港產
Weibo：港產不打_微博
************************
港產不打
全職非牟利網絡打手
100%支持本地製作
乜戲都打，淨係唔打港產
************************

intimoon71

good.......................