不打‧短評60：爆3俏嬌娃 (有內容)

港產不打

不打評價：$30

不打總評：女性角度拍既男性電影，取悅唔到男生亦討好唔到女士，兩頭唔到岸

利申左先，我由【芝See菇Bi我未成年】開始已經支持卓韻芝
苦榮同小苦妹係我既年少回憶，阿芝出道雖然唔係sell樣但勝在夠脆
名校畢業中學會考英文攞A，14歲已經係電台兼職，17歲已經獨立主持節目
當時黎講係好多少男既女神、少女既偶像，我地睇住佢成長，出書拍戲開展覽揀篤笑一直撐佢

佢第一套執導而上畫既電影其實唔係呢套
早係2001年已經執導【戀愛起義】其中一段【不得了】，係令人刮目相看既作品
之前1999年編劇作品【過海隧道】已經囊括多個國際電影節獎項
之後編寫及監製NOW網劇【男女字典】備受好評
進修回港後，自監自編自導自演短片【你還可愛麼】的【打錯】及海港城【你係鐘意呢度既】廣告
勇奪《IFVA 2012》公開組銀獎及《蘋果創意廣告獎2011》創意平面廣告銀獎，足見編與導既功力

因此，阿芝拍野有信息、擅長剖析兩性關係、刻劃新世代戀愛態度等等，已經拍左好多
今套【爆3】反而豁了出來，綽頭商業片掛帥，sell女sell波sell打，明刀明槍冇包袱
顧勿論套戲質素係點，娜姐著住黑皮三點式內衣埋身肉搏，推到上心口既事業線盡現
仲有一班網絡紅人粉墨登場，講爆講話題，其實已經相當成功
只不過咁糜爛既劇本再加上三條女咁拙劣既演技，套戲好難唔爛

其實套戲俗而不粗，始終阿芝係writer底，亦保留阿芝一貫冷嘲熱諷、一矢中的既風格
角色塑造鮮明、對話精闢，亦成功刻劃出時下女性既特質、價值觀、生活態度等
三條女既對話撞出喜劇效果，笑位和事業線經過計算咁不停出現，娛樂性係有
不過始終作為女性導演，以女性角度出發妄想拍一套取悅男性既電影
似乎唔太掌握到男性真正想睇既野
講露，我地覺得唔夠，唔係下下著晒內衣就叫性感，冇mood冇感覺拍唔出性感既效果
講打，我地又覺得唔夠，動作求其手無縛雞之力，招式推砌又冇旗鼓相當既對手，好假好悶
仲加插女生真面目、毒男學拳、小肥派膠超現實兩女爭仔等等好un眼既情節
成套戲既男角連花瓶都不如，嚴重失衡，細佬夠毒，兩打手仲膠過安堂機械人
踐踏男性自尊，但又要d女獻媚獻波，冇維護女性既尊嚴，結果兩頭唔到岸，兩邊唔討好

不過香港女性導演已經唔多，新一代還看麥曦茵、黃真真、楊采妮同佢
或許應該俾多d支持同空間佢地茁壯成長

不過講到尾，如果套戲係AKB48做主角，相信大量男生會好受落
2014都黎緊，沙中線都就快通車，而家先黎拍娜姐！？
我地唔止要爆，其實要脆！

Youtube：港產不打
Facebook：港產
Weibo：港產不打_微博
************************
港產不打
全職非牟利網絡打手
100%支持本地製作
乜戲都打，淨係唔打港產
************************