不打‧短評64：掃毒 (有內容)

港產不打

不打評價：正場價$69

不打總評：八十年代港產警匪片既集體回憶返晒黎

好多導演都有自己既個人風格
徐克既武俠情懷、吳宇森既暴力美學、陳可辛既文學視野、杜琪峰既黑色幽默
澎浩翔既譁眾取寵、林超賢既心理刻劃、王家衛既畫面美學、彭氏兄弟既恐怖懸疑
就算係粗野：成龍夠膠、曾志偉夠爛、黃百鳴夠韌，總有一樣野被觀眾記低，偏偏陳木勝冇

陳木勝係影壇既存在感無疑係較弱，但事實係佢同劉偉強同輩，90年開始執導，默默耕耘廿幾年
其實佢既導演處女作已經係經典神作【天若有情】，不過外間普遍歸功於監製杜琪峰
之後真係個人響朵既，要數到出道6年後既【衝鋒隊怒火街頭】(其實唔算好神既人性化拍法)
仲有拍比靚仔睇既【特警新人類】(而家講返只會記得陳冠希與Rachael)
之後令我刮目相看既水準之作有【雙雄】(我buy呢套既黎明)【三岔口】(可謂郭富城既第一套歇斯底里)
隨後【保持通話】更調返轉買荷里活劇本拍出港產片風格，fusion得唔錯，有堅持又有本土特色
只可惜前年套【全城戒備】嚇能死人粗糙不堪，變種人crossover小李飛刀我接受唔到
【新少林寺】2010年國內都收超過2億，香港都有2千萬，票房算唔錯，但普遍影評麻麻
回顧廿年佢既作品，水準不穩，而且套套都算係跟風之作，果期hit乜就拍乜，永遠紅星搭夠
拍落一大堆警匪動作片，卻冇一套國際知名，亦冇創立出自己既導演風格

今套【掃毒】一樣，掃毒為表，警匪為裡，動作為本，寫情為實
寫兄弟情誼、寫角色矛盾、寫人性掙扎、寫命運抉擇；陽剛氣烈，義膽雄心，恩怨情仇，絕境求生
與其說向【英雄本色】致敬，不如說係【喋血街頭】既新版
說穿了除左少隻白鴿，基本上係模仿吳宇森；不過，卻學得徹底而且融會貫通
沒有著眼吳宇森既暴力美學，沒有刻意特寫握槍既動作、槍與人既構圖、快慢鏡頭既運用
反而保留吳宇森招牌既男性浪漫，男人既情義刻劃，道義兩難既掙扎，命運自決既執意
天台控訴及羅蘭病床兩場絕對係神來之筆，堪稱近年港產經典名場面之一
前者以對話前後呼應交代三個角色既立場，情感豐富，引人入勝
後者以自白互換身份交代自己和對方既立場，巧妙細膩，感人肺腑
一首誓要去入刀山貫穿全場，只可惜Rubber Band始終不是 Beyond，難與當年【灰色軌跡】相比
綜觀全套戲節奏明快，寫人敘事、動作心理皆取得絕妙平衡，足見陳木勝編與導既實力
係時候離開別人既影子，踏出新一步，創出自己的風格吧！等你！撐你！

港產片既定律：永遠有個粗糙結局
今套也不例外，太刻意既英雄本色，沒有集體回憶既新一代可能接受唔到
既然打算寫家輝唔死得，又冇必要寫得咁盡，懸崖下仲係鱷魚潭！？變左非常自圓其說
而為了遷就國內人，太多野太早講得太白
古仔打電話比八面佛果場其實可以事後回憶先交代
青雲當年手槍冇子彈呢個位亦唔駛大仔一拿支槍就自己講
所有野留返天台果場先向觀眾交代，相信戲味更濃！

呢套戲普遍大獲好評，八十前既相信感受更深
其實套戲只係拍返當年大行其道警匪英雄片既感覺
足証當年既警匪英雄片，確是港產片輝煌時代重要資產之一，事隔數十年，同樣精彩！

Youtube：港產不打
Facebook：港產
Weibo：港產不打_微博
************************
港產不打
全職非牟利網絡打手
100%支持本地製作
乜戲都打，淨係唔打港產
************************

daniellechang

ok...for man..

jackylok827

Thanks so much!!