不打‧短評65：宇宙海盜夏羅古 (有內容)

港產不打

不打評價：正場價$50

不打總評：經典作品重塑，影像出色但劇情混亂，有技術但冇內容

新一代可能唔識日本漫畫家松本零士
但佢既經典名作【宇宙戰艦大和號】【銀河鐵路999】【千年女皇】你總會聽過
松本零士其實同宮崎駿和石森章太郎同輩，均屬殿堂級漫畫宗師
佢既代表作【宇宙戰艦大和號】屬日本國寶級文化遺產
想當年講緊七十年代，熱爆日本備受青少年推崇，成為當時日本動畫業興起既指標性作品
更奠下聲優行業既發展基石，與及促成動畫專業雜誌既興起
而佢既成功，亦成功開拓了初高中生既動畫市場，亦初証動畫衍生玩具這個商業模式既成功
因此BANDAI才願意投資開發當時黎講幾大膽既嘗試：機動戰士高達，成為後世國寶級產業
承上啟下才出現【超時空要塞】【五星物語】等等經典名作，掀起科幻動畫熱潮

那些年的回憶，我咁既年齡細個都睇唔到【宇宙海盜】，懂性時已經係睇【銀河鐵路999】
但宇宙海盜夏羅古既經典造型，招牌骷髏黑皮裝配紅披肩加隻鷹，一直深入民心
估唔到事隔三十幾年，有人將佢重新3D CG打造搬上大銀幕，真心讚！真心推！

導演係荒牧伸志，睇開日本動畫既朋友一定識佢
作品包括【依煞】【吹波糖危機】【蘋果核戰】【鋼之鍊金術師】等等套套經典
今次3D重塑夏羅古，無論人物造型、機械設計、幽靈戰艦、宇宙大戰、暗物質既處理皆非常出色
影像華麗，畫功震撼，戰鬥場面充滿逼力，3D效果突出，論畫面真係冇得輸

不過動畫歸動畫，劇情始終太過漫畫化，自圓其說，未能說服觀眾
主角和奸角果段無間道兄弟情其實開得唔錯
只可惜加埋勾大嫂既前設下，兩兄弟既打鬥淪為肥皂劇
主角優柔寡斷又突然棄暗投明，最後更繼承埋夏羅古，交代得太急太亂
而堂堂夏羅古幾次係敵人背後開冷槍，被揭往事又會意志消沉一蹶不振，一D信念都冇堅持
引爆時空節點重置過去呢條線最後更不了了之
結局交代混亂，木星炮月球咁粗點知連一隻艦仔都可以打唔中
最後爆盡暗物質以為要摧毀木星炮，點之衝落地球唔知為乜，咁佢可以再發炮，根本冇解決問題
條外星女明明灰飛煙滅，唔明落到地球又會突然復活，仲可以屈機殺出重圍
總之越睇越一頭霧水

其實宇宙海盜象徵解放、革命、反建制精神
但呢套表達唔到呢種信念，淪為一班烏合之眾既恐怖襲擊
套戲亦變左3D CG雕花既實驗作品，技術畫功一流，但卻是冇左靈魂既軀殼

Youtube：港產不打
Facebook：港產
Weibo：港產不打_微博
************************
港產不打
全職非牟利網絡打手
100%支持本地製作
乜戲都打，淨係唔打港產
************************