不打‧短評81：愛‧尋‧迷 (有內容)

港產不打

不打評價：正場價 $52

不打總評：有文人既情懷、回顧香港大事同批判社會既視野，但冇電影感

文人自編自導，往往唔擅長用影像去交代劇情，好多野都靠角色講到出口
而且往往輕視左導演真正既關鍵工作，「導」角色去「演」既重要性
So far 我深信陶傑只係指手劃腳，實際由執行導演做晒，但仍然一樣，最大問題係選角！

選羅霖去拍床戲，可能對七十前好有gimmick
但佢除左識叫床，成程睜大對眼一個表情，正常導演唔會收貨
羅霖飾演既角色其實好有發揮空間，更有一幕母子爭仔既荒謬亦爭議既經典場口
只可惜陶傑唔識導，羅霖唔識演，白白浪費左呢個可以搏攞獎既角色
同樣情況出現係天佑，全程木口木面憂鬱書生樣，條感情線薄弱到喊
佢既角色同樣關鍵，係代表執著，又有援交師生戀同變性老豆最後仲要自殺
偏偏咁多經歷既角色，天佑都可以演到好抽離，情緒冇起伏，平平無奇淡如水
至於Mandy，確實有前有後夠淫夠放，但只係流於花瓶靚模既層次
唯一真心讚係關楚耀同矚目新人盛朗熙，做鴨有鴨味更拍出gay味
盛朗熙絕對係盲拳打死老師傅，第一次演出演技力壓片中所有演員，來年大有機會問鼎最佳新演員

文人劇本當然穩打穩紮，陶傑以三段不尋常既情慾關係去側寫現今香港既光怪陸離
嘗試以扭曲既愛情觀去映射現今扭曲既價值觀
香港大事回顧為主，政治隱喻同社會批判為副，帶出不少社會議題
一場酒吧景加一年除夕約定首尾呼應
刻劃婚外情、雙性戀、同性戀、變性、援交、師生戀、養鴨、召妓衰十一
角色象徵放蕩、縱慾、自私、報應、執著、功利、迷失、墮落
確實係有say又有heart既新嘗試，值得大家入場支持

其實呢套【愛尋迷】和上年套【末日派對】同樣精彩，亦有異曲同工之妙
只係一個情慾故事做包裝，一個銀行刧案做包裝，實際都係想寫當代香港既荒謬
【末日派對】絕對係上年港產片滄海遺珠被人忽略既佳作
黃貫中同謝安琪撞出火花，泰迪羅賓表現更勝【打擂台】
值得大家一看！

港產片，一直有誠意之作，請大家多多支持！
p.s. 【紅van】唔算，大家唔駛入場！

Youtube：港產不打
Facebook：港產
Weibo：港產不打_微博
************************
港產不打
全職非牟利網絡打手
100%支持本地製作
乜戲都打，淨係唔打港產
************************