上集猿人貴為神作，一來係美國情意結，二來係品牌效應，三來係……真係拍得唔錯
凱撒和男主角的感情有多層次多角度既描述，金門大橋一幕亦拍得精彩，成為經典
今集繼續保留寫情既細膩，但聚焦唔再係人和猿，而係描述猿人之間既勾心鬥角
主角凱撒和救過他一命的戰友高巴，由互信到不合、衝突到殺戮、謀朝篡位到大義滅親
一樣有多層次多角度既描述，「Apes not kill Apes」「Caesar love human more than Apes」更成經典絕句
主角凱撒背負族群領袖既使命，堅持人猿互不相干既主張
一方面要維持族人既尊嚴，一方面要顧全大局有限度援助人類
深明大義，軟硬兼施，對內強硬以武制衡，對外懷柔以德報怨，領袖風範敘述立體有力
縱然力挽狂瀾，到最終仍然難免演變為人猿大戰既無奈，刻劃出色
關鍵除左劇情鋪排層層有敘之外，最重要係凱撒和高巴都交到戲，表情豐富眼神十足
高巴詐傻扮懵搶槍殺人果幕，對比強烈，印象深刻
原作【Planet of the Apes】講既係種族歧視及階級主義，以倒退既文明反諷人類文明
Reboot既呢輯Series，明顯側重情既描述，以人性化既角度出發
冇偏頗，冇二元化，務實交代人係好係壞？猿係好係壞？不以物分，只在其心
高巴從人類學到的，只有仇恨，反之凱撒從人類學到的，有愛，有承擔，有氣量，有犧牲
沒有露骨既以猿諷人，亦沒有人類打異族膚淺既英雄主義
寫情為本，喻理為實，呢個堅持我非常認同，亦為荷里活大量腦殘爆谷片爭回一些深度
發表於 14-8-6 01:30 AM
