不打‧短評100：浪客劍心京都大火篇(有內容)

港產不打

不打評價：正場價 $65

不打總評：Fans必看！雖然未出天翔龍閃，但同樣精彩！

睇經典漫畫/名著改篇電影，尤其係近代流行作品，自有另一番味道
角色親切，情節、招式、場景、人物關係耳熟能詳
睇住佢一幕幕經典場面真人實拍重現，好滾動！
雖然【變態超人】【黑執事】【Death Note】【Liar Game】都有同樣感覺
但真正忠於原著而且大製作仲要粒粒星既，已經要數到08年既神作【20世紀少年】
而呢套【浪客劍心】，絕對位列同級，同樣精彩

上集冇出密探：蒼紫、醜鬼、火佬、大隻佬，某程度上算係雜碎既刃衛
飛天御劍流出得一招「雙龍閃」既情況下，都拍得咁精彩
今集講到明係京都大火篇，係漫畫裡最緊張最精彩既一篇
點樣改篇都好，蒼紫、志志雄真實、十刃、比古清十郎點都一定要出晒，戲碼十足
淨係睇完全違反物理既飛天御劍流奧義「九頭龍閃」及「天翔龍閃」點樣實拍呈現已經非常吸引！
加上前因後果基本角色上集已經交代晒，今集可以即刻入直路，由天劍暗殺大久保開始，劇情非常緊湊
經典角色逐個出場，短打、單挑、街頭戰、追逐戰、群揪混戰一場接一場，娛樂性豐富
劍心既信念、不殺人既執著、與阿薰既愛情線亦有恰到好處既描述
當知道淨係打十刃都可能要一集，坦白講Fans 絕對唔會介意佢預左分兩集
更讚賞導演大友啟史認真而尊重地拍，堅持接近100%原著重現，非常滾動！
明白雜碎尖頭可以刪去，阿張把蛇劍要做特技難拍少少，十刃不二才槌既超現實係要改一改既
而呢集結局選擇黑船海戰呢一幕，劇情係有少少改動
不過官方消息透露只係暫時未炸黑船、未交代二重勁，唔代表改左
反而比古清十郎咁樣登場又順理成章合情合理
我完全冇做資料搜集入場，突然見到伽俐略又不失霸氣，非常有驚喜！

未睇過漫畫和第一集既觀眾，其實都可以入場，套戲交代清清楚楚
少少瑕疵只係未能清楚刻劃蒼紫既執著，變左同老頭生死戰冇睇漫畫既有D突兀
而篇幅所限，第一鑄劍師新井赤空既信念，殺人劍和逆刃刀既意義，都未能如原著中陳述
志志雄真實既邪惡，天劍既過去，也要放到下集交代

其實漫畫改篇實拍電影，Marvel已經證實work，而且好work，擁有龐大商業價值
【復仇者聯盟】同【Ironman 3】橫掃全球票房US$27.3億，進佔歷史排名第三及第六位
而呢套上集【浪客劍心】更係日本狂收30.1億日元，更力壓當時上緊既【復仇者聯盟】
足證漫畫→動畫→電影→再出周邊呢個商業模式既成功、成熟而持續既產業鏈
從【捍戰太平洋】到【哥斯拉】，作為日本漫畫迷，更開心既係，呢套係日本人自己製作

數其他經典作品，除左神作【Akira】【銃夢】【五星物語】已經俾荷里活買左版權外
實拍而夠技術拍到既，我非常期待【Jo Jo】、【幽遊白書】、【超音戰士】和【強殖裝甲】

Youtube：港產不打
Facebook：港產
Weibo：港產不打_微博
************************
港產不打
全職非牟利網絡打手
100%支持本地製作
乜戲都打，淨係唔打港產
************************