不打‧短評101：男人唔可以窮 (有內容)

港產不打

不打評價：正場價 $59

不打總評：拍出原著神髓，拍出地道香港特色既喜劇，笑中有SAY

話晒繼【一路向西】【紅Van】後第三齣高登小說改篇電影，巴打絲打一定捧場！
實體書去年榮登商務印及三聯暢銷書榜第一位，四個月內加印至第六版
續集反應同樣熱烈，去年書展首賣5,000本，總銷量比網絡神作【紅Van】更高！

一手策劃呢套戲既來頭不少，係BANANA創辦人及行政總裁唐家輝
香港廣告商會 (HK4AS)會員，最年輕既4As會員公司創辦人
成名作係香港首個3D立體寫真光碟【周秀娜3D蜜月之旅】
曾主辦香港最大型時裝展「女生天下」、NBA籃球表演賽等
擅長策劃國際項目，客戶遍佈法國、英國、美國、台灣、上海
近年積極製作微電影，作品有【四面夏花】、【傷戀時間】、【夢想之都】及微網劇【女生公寓】

導演係資深前輩鍾澍佳佳哥，入行超過20年，曾擔任製片、電視編導、監製及電影導演
早係2000年已獨具慧眼，乃第一批回國發展的影視製作人，參與製作多部大陸著名電視劇
近年執導既電視劇【孽緣】，更係2010年全國上半年收視冠軍
要係國內開戲一定冇難度，反而願意回港拍呢套地道小成本作品，非常有heart

佳哥近年執導【72家租家】【我愛HK開心萬歲】【勁抽福祿壽】【2012我愛HK喜上加喜】
睇落好似幾爛，但無可否認既係，全部都保留到地道香港特色，亦証明佢最擅長拍喜劇
今次遇上網絡神作【男人唔可以窮】，情節同角色都開正佢個範，結果冇令觀眾失望！
雖然與原著有唔少改動，但保留到神髓，同樣引發當代港人既共鳴
透過男主角面對愛情、友情、兄弟情、父子情成功刻劃出當代港男港女面對既種種問題
表面係以男主角既角度去批判港女特質，但實際係自嘲返港男缺點
幼稚又貪玩、自卑又自負、逃避責任又唔面對問題、冇擔帶又冇計劃、唔著重承諾亦唔守承信
唔信人亦俾唔到人信心、自己冇安全感亦俾唔到人安全感、有事永遠依賴他人亦唔會歸咎自己
如果【一路向西】詮釋為係港男對港女既一次勝利，咁呢套一定係港女大獲全勝！

佳哥選角眼光唔錯，以咁少既budget，搵到正價比最高既組合
Bosco其實一直有喜劇天份而且演技越來越好，陳偉霆自從【紮職】後亦讓觀眾刮目相看
高登女神鄧麗欣演出自然角色亦令觀眾同情，驚喜仲有身材和演技都咁突出既詠春女陳嘉桓
對白唔悶，情節唔拖，笑位夠又有共鳴
都係果句：你可以話題材太地唔合你睇，但唔可以話佢係爛片

同一班演員，以往由葉念琛拍，套套垃圾；今次由佳哥執導，又拍出另一番味道
劇本固然緊要，導演一樣重要

P.S. 此文撰寫於旺角示威現場，男人唔可以窮寄喻香港人唔可以輸！
Youtube：港產不打
Facebook：港產
Weibo：港產不打_微博
************************
港產不打
全職非牟利網絡打手
100%支持本地製作
乜戲都打，淨係唔打港產
************************