不打‧短評104：浪客劍心3傳說落幕篇 (有內容)

港產不打

不打評價：星期二特惠 $45

不打總評：fans失望之作！漫畫經典場面面目全非，和上集比完全係兩個層次

上集京都大火篇我激讚，經典漫畫完美重塑，還左fans一個心願
讚佢接近100%忠於原著，讚佢認真而尊重原著地拍攝
點知原來導演用盡一切心思一切方法，只係第二集保持以上崇高情操
到呢集大結局，幾乎完全自我創作，對比太強烈，落叉太大，我接受唔到

最大亮點：九頭龍閃→天翔龍閃，要弒師先學識既最終奧義
換來一個月鄉郊既密室培育，冇生死相搏，冇經歷什麼而大徹大悟
只係接近一面倒既對打……應該係虐打，亦冇任何招式上既傳授
難得係福山雅治做比古清十郎，整個修練過程非預期地拍得好粗糙好兒戲
而佢最耍帥既九頭龍閃秒殺十刃不二，又成段cut左，白白浪費左呢個角色

二重勁，完全cut左，變左安慈和左之助又係打爛仔交，悶！
最精彩既葵屋攻防戰完全cut左，變左完全冇篇幅刻劃其餘的十刃，淪為雜兵咁既層次
最後有五個：蝙也、不二、才槌、鐮足、夷腕坊，大頭都冇，一招都冇出過
仲要俾普通差佬打贏拉埋，更遑論交代外印既存在
有招出既心眼宇水，亦唔見得有好交代，冇眼漫畫既觀眾根本連佢係未盲既都唔知
只係淪為俾齋藤一招牙突秒殺既活動佈景版，對白一句都冇
既然明知十刃冇時間交代，就唔好係第二集煞有介事咁重點講召集佢地啦，好欺場囉！
有詳盡篇幅交代既宗次郎，又唔見得拍得好好
武打場面上，因為改左天翔龍閃只係最後對志志雄才第一次用
變左強如天劍，好似只係用普通招式就打嬴，削左
而對宗次郎既心理及信念，對志志雄既崇拜，都冇深刻描述
變左打輸後內心價值觀既掙扎刻劃唔到，冇睇漫畫既觀眾以為佢患偏頭痛，錯晒！
與蒼紫死鬥又改左係往東京既路上，雖然明眼人睇得出其實KO佢既係九頭龍閃
但完全冇highlight，亦冇特別效果，只係好直接咁連斬不同部位九刀，fans好失望
而結局志志雄死鬥，又自我創作係四對一，蒼紫無啦啦出場感覺特兀
由頭到尾冇交代無限刃既特殊功能，又冇交代紅蓮腕既由來
冇睇漫畫既根本唔知點解把劍無啦啦會著火，仲會爆炸？！
高潮戲火產靈神對天翔龍閃，冇交代天翔龍閃係極速拔刀術，因此更加冇交代真空再吸呢個物理現象
火產靈神純粹變左火焰劍，天翔龍閃純粹變左一招由下而上劈既普通劍招，fans好能失望！

節奏慢，劇情拖拉，漫畫經典場面面目全非，只能說係草草收場既作品

Youtube：港產不打
Facebook：港產
Weibo：港產不打_微博
************************
港產不打
全職非牟利網絡打手
100%支持本地製作
乜戲都打，淨係唔打港產
************************