不打‧短評106：飢餓遊戲終極篇自由幻夢1 (有內容)

港產不打

不打評價：租碟價 $10

不打總評：第一集爛！第二集更爛！第三集仲爛！而且係4次方的爛！

好難定義呢套係動作片，套戲基本上只有三場動作場面
爬樹炸白兵、老衝炸水霸、同埋tailor見過射箭打飛機呢三幕，加埋我估都唔夠十分鐘
所謂高潮所在既Saving Private Peter，一槍都冇開過，深入敵陣猶如深宵行商場咁
所謂緊張位只係突然開燈，之後斷線拍都冇拍，下個shot已經返到總部
成套戲佔左九成，都係女主角既文戲，糾糾纏纏，唔係玩自拍，就係誓師出發，悶到hi hi

唔係動作片，但我又好難定義呢套戲係劇情片
成套戲基本上冇劇情可言，或者應該說劇情簡單到一句講得晒
女主角成為革命英雌，推動各區革命，成功救返原來總統主動放走既洗腦Peter，完！
咁能淺白既劇情，用足兩粒鐘去拍，而且平鋪直敘，悶到hi hi
正式黎講，呢集應該交代革命一方如何部署革命推翻極權
但劇情粗到只要拍條MTV就得，由頭到尾連攻擊計劃都冇討論過
同總統既對話，又拍得無甚迫力；都城面對咁既威脅，連交代佢地既部署都冇
革命，只係聚焦係一個人度，劇情粗疏兒戲

嚴格黎講，我又好難定義呢套真係電影，如果唔係戲院睇，我以為係電視劇，而且係好爛既口水劇
套戲基本上得個講字，12區屠城，只有一個拍完又拍既瓦礫焦屍景，對白交代，回憶場面都冇！
總統反擊，應該高潮所在既空襲13區，可以粗到用雷達畫面加女總統旁述交代就算
之後一路炸，就係影住防空洞係咁震，避難者驚慌既表情，拍左足足3個字
成套戲場景十隻手指數得晒，拍來拍去都係地牢廠影
坦白講仲慳水慳力過D美劇，絕對係三集之中最低成本、最粗製濫造、最低質素之作

其實【飢餓遊戲】既核心價值係想表達革命、解放、反暴政、反建制、以下犯上
係好迎合青少年既口味，更加食正香港既時勢，特別適合黃絲帶既朋友欣賞
不過套戲講咩大道理都好，本身係爛，就係爛！
老掉牙既劇本，粗疏既劇情，粗糙既拍法，加上咁沉悶既鋪排
【飢餓遊戲】由第一集開始，從來都係垃圾戲！

Youtube：港產不打
Facebook：港產
Weibo：港產不打_微博
************************
港產不打
全職非牟利網絡打手
100%支持本地製作
乜戲都打，淨係唔打港產
************************

eee55555

thanks very much