涼拌手撕雞

tintinAA

材料非常之簡單，可以作餐前小吃或當主菜都可以，菜式就係「涼拌手撕雞」，若然唔想做冷盆，浸熟的雞都可以做美味的白切雞。或一次過浸兩隻 雞，一隻拆絲做涼拌，另一隻雞做白切雞，一舉兩得。浸完雞的雞湯加埋拆出來的雞骨及雞殼可以放回入雞湯內煲，留作用來烚菜或煮餸用的上湯。

烹煮時間: 1小時


材料:

　　光雞1隻 700克、即食海蜇 1包、甘筍 100克、青瓜 1條、已炒白芝麻 1湯匙

醃雞料:

　　幼鹽 2茶匙、紹酒 2茶匙

調味料:  (預先拌勻)

　　鮮露 3湯匙、雞粉 1/2茶匙、砂糖 1/2茶匙、麻油 2湯匙、白醋 1湯匙


做法:

1. 光雞去除內臟，沖洗乾淨抹乾，將醃雞料的紹酒及鹽搽勻在雞皮及雞腔內，放入雪櫃醃3-4小時或醃1晚。

　　
2.  燒熱一鍋熱水，水滾將雞放入，改用細火將雞慢火浸煮25-30分鐘至熟，用刀插入雞脾位置，若無血水流出，即代表雞已熟透。然後將雞放入冰水內浸涼，盛起瀝乾。

　　
3.  青瓜及甘筍去皮沖洗，切幼絲放入大碗中，加入調味料拌勻，放入雪櫃醃15分鐘。

　　
4.  將雞肉用手撕出雞絲，加入青瓜甘筍絲內拌勻。

　　
5.  將即食海蜇排在碟上，然後將雞絲排放在海蜇上，最後撤上白芝麻即成。

小貼士:

　　浸雞的熱水不能太滾，否則雞肉會粗嚡（音：鞋）而不好吃，浸熟的雞要立即改浸冰水，雞皮及肉才會爽口滑溜。