大家好,雖然題目係講座但係小弟自知未有資格去到可以去開"講座"呢個地步,更不要說可以"教"別人, 但...應朋友們的要求,多多少少在呢度發表一點點心得就好了,因為平時在server內通常都係打緊國戰,傾緊計,可能未必有時間或者答得夠詳盡,又怕自己會講少左某d野,所以就在這裡講好了
首先麻,技能逐一講解的部份就略過吧,大部份人都知弓遊有咩招,點用,點射用幾多pw之類,新手如果唔識去各大feZ討論區隨便搵搵都有一堆類似的文章,所以在此就容許小弟跳過呢一part啦
咁第一樣講的野,首先係幾個戰場上(國戰)的意識:
1: 弓遊絕不是單挑能手
弓遊的攻擊力不高人所共知,單挑對打,最多只能"磨"死對手,對上法師可能還好,1分鐘之內可解決掉吧,對上戰和刀遊可能一打就幾分鐘,對弓手的仲麻煩,大家互射攪來攪去可能成個字都分唔到勝負,所以建議大家如果對方血多過700就唔好浪費時間同對手紏纏(對手係法師除外),況且如果閣下係想屈傷上榜的,單挑所浪費的時候太多,會大大減低你屈到人傷的機會
2: 貫骨請盡量少用
貫骨呢一招.......好多人對佢又愛又恨,非弓遊的職日日都小貫骨遊.....我地係呢度暫且先不理其他職業的感受,只講使用的時機,貫骨使用的時機其實非常重要,但係在小弟眼中佢的用途只得一個,就係"救人",冇錯,就剩係得救人一個用途而已......屈傷我可以用箭雨/精準,壓線絕唔需要弓遊去沖前壓,所以請盡量盡量少用,最多有時用來保命都得的
3: 永遠同敵人保持距離
一個好的弓遊永遠唔會比對手埋身,而一個非常好的弓遊除左唔會比對手埋身之外仲識保持住你打到人而人地打唔到你的距離,粗略來講對單手戰離3-4個身位,對雙手戰就4-5個身位,對刀遊3-4身位,對法師就6-7個身位,咁對番弓遊呢?我會拉開到佢空襲岩岩射唔到我的地方再用飛鷹射佢!真實的距離感要大家多多上戰場體會,畢竟呢度講的只係大約的距離
4: 藍水唔慳得(保持穩定的攻擊輸出)
好簡單就如上面小題目所講,藍水唔可以慳,對面人越多請食得越大支,如果唔係就會pw到用時方恨少....因為成日坐地板會令輸出變低而且被cj的機會亦會被提高,所以記得要食藍水呀
5: 切記追殺同一目標時間太長
追殺冇血的敵人時,如閣下的眼界麻麻的話,建議唔好追太耐啦,因為你一直面向同一邊追一個敵人時,往往會忽略來自旁邊和後方對你的攻擊,好多時時追追下比人冰左/暈左先知咩事....咁點先為之追殺時間"太耐"呢? 容計我比一個簡單少少的定義,"4次攻擊"的時間,就係如果你追殺的目標在你發出4次攻擊之後你亦都打唔死佢或暫打唔中佢就好停手啦,到你再射第5箭,個追殺過程已經太耐,可能你已經成為其他人的目標啦
第一篇先寫到呢度,以上最簡單戰場意識的5點,希望對各位弓遊有用,但畢竟都係理論,多上戰場感受一下會比較好,下一篇會再比較深入講一下實戰上的小技巧,多謝大家比耐性看完
---------------------------------------------------------------------------------------------------------------------------------------------
多謝各位耐心看完上篇亦感謝有比意見的朋友,小弟又學到唔少野啦,呵呵
廢話少講,來下篇的主要內容,上篇講的係意識,而今次下篇講的會係實戰,由對各職的打法講起並將以下內容分成3小章
1: 對抗戰士之章
對應技能: 毒箭,強力,蛛絲,精準
戰士天生就係遊俠的勀星,所以要如何有效對抗戰士將會係弓遊的最大的一個難題
對上雙手戰時,首先最重要的係保持距離(廢話),要做到的確唔易,因為雙手戰有沖擊斬,可以快速拉近距離
我地弓遊可以做的第一時間要用蛛絲令對手變慢(難射得中請多練習)
在蛛絲得手之後先不要再攻擊,應該先再拉開一段距離,之後先用精準同毒箭來磨佢血,如被對方用沖斬逼近就放強力,因為沖斬完其實會有一小段硬直時間,打中後用小跳跳開再重複用蛛絲,在人多混戰的時候通常會有雙手戰鍾意不停小跳跳過來,我比各位弓遊的建議係練好強力,抓小跳落地位,佢跳一下,你射一下,準的佢跳到來之前已經比你打中3下
但係...........其實我會覺得對上雙手戰而不幸我方人少或剩你一個時,最好還是逃走啦
對上盾戰的時候就比較好打,大致情況和對雙手戰一樣,盾戰的猛擊攻擊距離同速度並冇戰士快,所以可以比較安心攻擊,但有一點值得留意的地方就係...如果你被猛擊擊中倒地,起身的時候切忘小跳(除非在崖邊),因為你一跳,落地的時候就會慘被撞暈.....應該起身時先向反方向走2步再回跳去盾戰方向,反而有機會避開暈擊(有可能跳到對方身後),人多混戰之中,請參考上面打雙手戰的方式
2: 纏鬥遊俠之章
對應技能: 空襲,精準,強力,飛鷹
對上大家同樣係遊俠的時候會比較考技術同耐性,一般都會纏鬥一排,所以耐性同技術係有必要的
對上弓遊的時候一般都會係雙方用空襲,精準同飛鷹互磨血的情況,首先最難避開的係空襲同精準,對閃避冇信心的朋友請將距離拉到空襲之外(空襲攻擊範圍比精準遠),再用飛鷹互射鬥眼界準,中近距離的情況就唔特別提啦,都係走位同眼界的問題,值點留意的一點係要閃避請唔好用小跳,好的弓遊一定抓到你小跳著地位,你一跳就等於送一次攻擊機會比對手(如果下次你在戰場上見到我你小跳的話,我百份百送你番主城). 在混戰的時候,多留意對面的弓遊的動作,如發現對方準備貫骨或者出箭雨時,請立即送佢一箭飛鷹,因為出貫骨同箭雨的動作比較慢,就算趕唔切打斷佢出招,亦要出手務求被打中的同時都要扣佢血
對上刀遊的時候.........遠身又現左型的唔講啦,大家都知應該點做,就集中講講被隱身刀遊埋左身或被cj之後應該點做啦,最利害的人會聽到聲而避得開cj,如果你唔得的話(我都唔得),就在被打中一的剎那跳起(按space bar),原因係唔好中完cj之後再被對方連破足,倒地克畢之後一起身唔好心急想住小跳先(情況同上面打盾戰避暈擊一樣),先走2步看看對手行動再向離開對手的方位小跳,呢次同打盾戰唔同,唔好再跳番轉頭,而係要跳走(其實仲有一個小心得不過先唔係呢度講). 如果不幸地已被破足的話,先唔好急亂走亂跳,呢個時候應該用精準攻擊對方(大前題係未被破武之前),射完一箭再小跳,不停重複直到你被破武或者破足效果消失,攻擊的目的係希望可以打斷對方的攻擊,好彩的話會打亂對方之後落來的殘技....至於在多人混戰時...你應該唔會見到有現左身的刀遊行來行去同你打掛(笑)
3: 凌虐法師之章
對應技能: 空襲,精準,強力,飛鷹 (同上)
遊俠天生係法師的勀星,一個成功的弓遊絕對要具備玩死敵方法師的能力
來到最容易的一部份,要有效玩死法師,其實剩係空襲同精準已經足夠,但我的建議係盡量用精準,因為扣得快d,免得你空襲要打到佢訓低又要再起身又再訓低,浪費的時間夠人地其他隊友來支援lu, 單挑法師唔多講啦,注意距離就係啦,大約拉開4-5個身位都夠ga啦
在多人混戰的時候,見到法師就射啦....點射法,以下有幾個選擇,看準法師準備出手時用飛鷹(遠),精準/空襲(中),來斷佢技,另一方法係最近我最愛用的方法,在對方法師左或右側向佢反方向行(距離要一直保持,即係好像2個人劃圓咁行).當然佢的目標唔係你,一直等到佢出手時送佢一下強力,打中之後請唔好心急,因為中左強力大部份法師都愛小跳,抓佢落地點再送多一下強力(爽), 當然啦,被冰實/暈左的法師強力打落去唔可以手軟(火箭接強力亦可,只係太麻煩我唔用而已),另外一個小小的心得,被法師冰左請記得唔好坐底,望實佢,佢一想出技就用空襲/精準打佢來cut技,時間同準度夠的,佢冰到你都只有乖乖行埋一邊,呵呵
以上3小章講的都係一d小小的心得而已,希望可以盡量幫到各位新手,中手或者老手弓遊啦,希望遲d可以出多個補完篇將遺漏的野講埋,暫時先寫到呢度,多謝各位耐心看完,謝謝!!!
[ 本帖最後由 samsam113 於 2009-1-6 06:01 PM 編輯 ] |
發表於 08-12-19 02:35 PM
發表於 08-12-19 03:55 PM
